- Сөбүлэһиигэ киһи болҕомтотун ордук тутуу уонна кэлиҥҥи сылларга олохтоох нэһилиэнньэ ортотугар элбэх ыарахаттардааҕынан биллибит доруобуйа харыстабылын, үөрэҕирии, суол, олох-дьаһах боппуруостара тардар. Манна үгүс сылларга туруорсуллубут тутуулар быһаарыллар турукка киирбиттэрин бэлиэтиир тоҕоостоох. Ол курдук, Бүлүү куоратыгар 200 миэстэлээх оҕо саадын тутууну үбүлээһинин көрүҥэ ГЧП (государственно-частное партнерство) быһаарылынна уонна быйылгыттан үлэтэ саҕаланар буолла. 73 миэстэлээх балыыһа комплексын бастакы уочаратын (уопсай блок, 26 миэстэлээх хирургическай отделение) тутууга анаан өрөспүүбүлүкэ 2015 сыллаах бюджетыттан 25 мөлүйүөн көрүлүннэ, Бөтүҥ нэһилиэгэр быйыл 80 миэстэлээх таас оскуола улэҕэ киирэригэр үп көрүллэн үлэтэ салҕанна.
- Ону таһынан Бүлүү куоратыгар тупсаҕай көрүннээх Култуура дыбарыаһын тутуу саҕаланар буолла. Бэс ыйын 15 күнүгэр бырайыагын экспертизата бүттэ. Бу иннинэ техническэй чааһын экспертизатын ылбыт буоллахпытына, билигин сметатын экспертизата билиннэ, дьиэ бырайыагын ООО «Якутгазпроект» тэрилтэ оҥордо. Тутуу сыаната уопсайа 289,09 мөл. солк. буолла. Бу улахан тутуу үбүлээһинэ оройуон бюджетыттан көрүлүннэ. Былырыын улуус баһылыга Сергей Николаевич туруорсуутунан АЛРОСА АК дивиденин харчыта туһааннаах улуустарга быһаччы тиийэрэ ситиһиллибитэ. Дивидент харчытын туһаныы хайысхаларын туһунан быйыл саас Саха Өрөспүүбүлүкэтин бырабыытылыстыбатын кытта үс сыллаах сөбүлэҥҥэ илии баттаммыта. Ол онно Култуурабыт дыбарыаһа бастакыннан сурулла сылдьар. Быйылгы сылга тутуу саҕаланыытыгар диэн 75 мөл. солк. көрүлүннэ. Бу ый бүтүүтүгэр аукцион биллэриллиэ. Тутуу 2017 сылга бүтэрэ былааннанар.
- Салгыы сөбүлэҥҥэ Бүлүү куоратыгар спортивнай сааланы тутууну Российскай Федерация 2016-2020 сыллардааҕы судаарыстыбаннай бырагыраамматыгар киллэртэрэргэ Саха Өрөспүүбүлүкэтин Спортка уонна Экономикаҕа министиэристибэлэрэ эбээһинэстэннилэр. Аварийнай туруктаах дьиэлэртэн олохтоохтору көһөрүү салгыы ыытыллан, 2014-2015 сыллааҕы тутуллуохтаах дьиэлэр куонкурустара биллэрилиннэ.
- «Мин Сахам сирэ XXI үйэҕэ» чэрчитинэн быйыл Илбэнэҕэ, Дьөккөҥҥө 50 миэстэлээх оҕо саадтара үлэҕэ киириэхтээхтэр, Өкүндүгэ 60-миэстэлээх оскуола, Лөкөчөөҥҥө 50 миэстэлээх оҕо садын дьиэтин тутуу быйыл саҕаланар.
- Доруобуйа харыстабылыгар Бөтүҥ, Тыымпы, Өкүндү нэһилиэктэригэр ФАП-тары тутууну, Бороҕон, Тыымпы, Балаҕаччы балыыһаларын хапытаалынай өрөмүөннэрин Доруобуйа харыстабылын министиэристибэтин туһааннаах бырагыраамаларыгар киллэлэргэ диэн туспа пуунунан бэлиэтэммит. Халбаакы Үгүлээт, Кыргыдай, Кыһыл Сыыр балыыһаларын анал исписэлиистэринэн хааччыйыыны «Земский доктор» бырагырааманан көрөргө, Бороҕоҥҥо, Өкүндүгэ, 1-Күүлэккэ, Үгүлээккэ, Баппаҕаайыга, Кыргыдайга биэлсэрдэри буларга сөбүлэһии оҥоһулунна. Быйыл Үгулээт нэһилиэгэ биэлсэринэн хааччылынна. Манна даҕатан эттэххэ, Доруобуйа харыстабылын министиэристибэтин кэллиэгийэтэ бэс ыйын 8 күнүгэр Бүлүү куоратыгар ыытыллыбыта, онно миниистир Горохов А.В. уонна улуус баһылыга Винокуров С.Н. бииргэ үлэлээһин дуогабарын түһэрсибиттэрэ инники өттүгэр бу хайысханан үлэ сөргүтүллэригэр эрэли үөскэтэр.
- Тыа хаһаайыстыбатыгар сүрүн боппуруоһунан «Тойон Хонуу» бааһынатын нүөлсүтэр систематын уларытан оҥоруу буолар. Бу боппуоруоһу миэстэтигэр билсэ тыа хаһаайыстыбытн миниистирэ А.Е.Артемьев бэс ыйын 5 күнүгэр кэлэн барда. Бу күннэргэ дефектнэй акт оҥоһуутугар министиэристибэ анал хамыыһыйата тэриллэн үлэтин саҕалаата. «Устойчивое развитие сельских территорий на 2014-2017 гг. и на период до 2020 года» программанан быйыл саҥа дьиэ тутуутугар 23 квота көрүлүннэ (35-тэн үөһээ саастаахтарга – 9 квота, эдэр ыалга, эдэр специалистарга – 14 квота).
- «Дьыыппа» үрэх туорааһынын бэтэрээ биэрэгин оҥоһуутугар улуус үбүлээһининэн бырайыактыыр-чинчийэр үлэ ыытылынна. Инникитин 1,5 килэмиэтир сири оҥорууга 11 мөлүйүөн суумалаах үлэ ыытыллыахтаах. Ол үбэ быһаарыллыахтаах. Гравий таһыллан быйыл сайын өрөмүөн үлэтэ барыахтаах.
- Олох-дьаһах министиэристибэтинэн «Көтөх», Лөкөчөөн нэһилиэгин тутууларын хааччыйыы былааннанар. Манна Көтөх хочуолунайын тутуутугар инвестиционнай бюджеттан 42 мөлүйүөн үп көрүлүннэ, улуус бюджетыгар дивидент харчытыттан 20 мөл. көрүлүннэ. Оттон Кыһыл Сыырга уу ситимин «Сахатранснефтегаз» оҥорор. Бу үлэ 2016 сылга бүтүөхтээх.
- 2015 сыл Предпринимательство сылынан биллэриллибитинэн, Бүлүү улууһугар министиэристибэ иһинэн предпринимателлэри кытта ыкса үлэлииргэ штат көрүлүннэ.
- Түһэрсиллибит сөбүлэһии чэрчитинэн Кыргыдайга, I Күүлэккэ, II Күүлэккэ, Хаҕыҥҥа, Балаҕаччыга баар баһаарынай хамаандалары анал техниканан хааччыйалларыгар Ойуур сыһыаннаһыыларыгар департамент уонна Саха Өрөспүүбүлүкэтигэр олох-дьаһах куттала суох буолуутун хааччыйар судаарыстыбаннай кэмитиэт эбээһинэстэннилэр.
- Бырабыыталыстыба уонна улуус икки ардыгар баттаммыт сөбүлэһии өрөспүүбүлүкэ өттүнээҕи эбээһинэһин сүрүн көрүҥнэрин көрдөххө итинниктэр. Бу ыйыллыбыт үлэлэр туолууларын ситиһии инникитин элбэх үлэни эрэйэрэ саарбаҕа суох. Онон улуус салалтата, управлениелара, ону сэргэ нэһилиэктэр дьаһалталара туһааннаах министиэристибэлэрдиин бииргэ үлэлээтэхпитинэ сөбүлэһии олоххо толору киллэриллиитэ хааччыллыаҕа.
- К.В. Гаврильева, Бүлүү улууһун дьаһалтатын үлэтин салайааччы
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети