Бэс ыйын 24 күнүгэр Дьокуускайга СР Ил Дархана Егор Борисов республика бары улуустарыттан 500-тэн тахса медалиһы кытта көрүстэ. Оттон бэс ыйын 25 күнүгэр Аллараа Бэстээххэ Олоҥхо дьиэтигэр туйгун үөрэнээччилэрбитин чиэстээһин буолла.
Оройуон баһылыга Николай Старостин 10 тыһыынча солкуобайдаах стипендиялары анаата. «Үөрэххэ уһулуччу ситиһиилэрин иһин» кыһыл көмүс мэтээллэри оройуон баһылыгын социальнай боппуруоска солбуйааччы Иван Птицын туттартаата.
Үөрэнээччилэрбит Майатааҕы лицейтэн Нарыйа Васильева, Надя Кычкина, Надя Морозова, Галя Скрябина, Паша Тарасова, Андрей Христофоров, Лера Григорьева, Катя Никитина, Аллараа Бэстээх 2 №-дээх оскуолатыттан Элеонора Габдулина, Сардаана Лаптева, Хорообуттан Вадим Ермолаев, В.П.Ларионов аатынан Майа оскуолатыттан Нина Захарова, Ньургуйаана Игнатьева, Саргы Колосова, Анжелика Никитина, Катя Прокопьева, Айыына Скрябина, Айта Сотникова, Төҥүлүттэн Уйгулаана Романова, Алтантан Сардаана Седалищева, Тумултан Кеша Слепцов, Хаптаҕайтан Сардаана Стручкова үөрэх туйгуннарынан уонна араас таһымнаах олимпиадалар, конференциялар, фестиваллар, күрэхтэһиилэр кыайыылаахтарынан буолаллар.
Оройуон баһылыгын аатыттан эҕэрдэни этэн туран Иван Петрович: «Бэйэҕит ситиһиигитинэн улуускут дьонун-сэргэтин, учууталларгытын эрэ буолбакка, күндү төрөппүттэргитин олус үөртүгүт. Күннэтэ дьулуурдаах үлэҕитинэн үөрэххит үтүө түмүктэммитинэн астынабыт. Салгыы үөрэнэн төрөөбүт-үөскээбит улуускутугар, республикаҕытыгар эмиэ тарбахха баттанар идэлээх үлэһиттэр буола үүнүөххүт диэн эрэнэбит», ‒ диэтэ.
Салгыы үөрэх управлениетын начальнига Михаил Колмаков үөрэнээччилэр төрөппүттэригэр Махтал суруктары туттартаата. Төрөппүттэртэн Зоя Габдулина, үөрэнээччилэртэн Кеша Слепцов харда тыл эттилэр, үрдүк ситиһиилэргэ кынаттаабыт оскуола коллективыгар, учууталларга махтаннылар.
Учууталлар ааттарыттан быйыл кылааһыгар 6 медалиһы иитэн-үөрэтэн таһаарбыт Майатааҕы лицей нуучча тылын уонна литературатыгар учуутала Евдокия Тарасова үөрэнээччилэригэр дьаныардаах үлэлэринэн маннык улахан ситиһиилэммиттэринэн эҕэрдэлээтэ, улуустарын, республикаларын туһугар бэриниилээх, киһи быһыытынан сырдык, ыраас, дьоһун дьон буолан тахсалларыгар, талбыт идэлэринэн үөрэххэ киирэллэригэр алгыс тылларын тиэртэ.
Комментарии
Авторизация на сайте через социальные сети