Куоракка аан бастакы маннык куонкурус аҕам саастаах дьон аан дойдутааҕы күннэрин чэрчитинэн ыытылынна. Дьокуускай к. Киин уокуругун управлениета уонна дьахталларын сэбиэтэ, «Киин» уопсастыбаннай тэрилтэ уонна оҕо айар дьиэтин дыбарыаһа тэрийдилэр. Куорат алта уокуругуттан уонна куорат таһынааҕы нэһилиэктэртэн 55-75 саастаах 9 кэрэ аҥар кытынна.
Атын куонкурустар курдук, бу күн кыттааччылар бэйэлэрин билиһиннэрдилэр, айар дьоҕурдарын көрдөрдүлэр, киэһээҥи былааччыйалаах сцена устун хаамтылар.
Дьүүллүүр сүбэ чилиэнэ, СӨ нэһилиэнньэни социальнай өйөөһүн фондатын бэрэссэдээтэлэ Роман Пестерев иһитиннэрбитинэн, куонкурус кыттааччылара бары чөл олохтоохтор, араас дьарыктаахтар. Онон куонкуруска бастыҥтан бастыҥнар кытыннылар. Кинилэр тас көстүүлэрэ, ис дууһалара барыта дьүөрэлэһэр.
Социальнай өйөөһүн фондатын көмөтүнэн хас биирдии кыттааччы хаартыскаҕа уонна видеоҕа түһэр кыахтанна. Онон кинилэр идэлээх фотографтан хаачыстыбалаах хаартыскалары уонна өйдүү-саныы сылдьарга видео-устууну ылыахтара.
Кыттааччыларга уоннуу-сүүрбэлии «ыалдьааччы» кэлбит буолан, саала иһэ ньиргийэн олордо. Куоракка ыытыллыбыт бастакы сэргэх куонкурус түмүгүнэн «Көмүс саастаах көхтөөх Хотунунан» үлэ бэтэрээнэ, РСФСР үөрэҕириитин туйгуна, СӨ үтүөлээх учуутала, Тулагы с. олохтооҕо Любовь Скрыбыкина буолла.
Комментарии
Авторизация на сайте через социальные сети