Спартакиада чэрчитинэн, үлэһиттэр эстафетаҕа, атах оонньууларыгар, волейболга, буулдьалаах саанан ытыыга, мас тардыһыытыгар, сахалыы остуол оонньууларыгар (хаамыска, хабылык), канаат тардыһыытыгар, көрдөөх стартарга күрэхтэстилэр.
Сунтаар хамаандата эстафетаҕа, атах оонньууларыгар, канаат тардыһыытыгар, ытыыга, көрдөөх стартарга бастакы миэстэлэри ыллылар. Манна биһиги улууспут култууратын үлэһиттэрэ кыахтаахтарын көрдөрдүлэр. Ол курдук, хабылыкка, хаамыскаҕа Маар Күөлтэн Татьяна Алексеева, Түбэй-Дьаархантан Ангелина Петрова, Дьаархантан Василий Васильев үчүгэй оон-ньууну көрдөрдүлэр. Ытыыга Сиэйэ кулуубун директора Мария Ефимова, Күндэйэттэн Леонид Сав-винов олус кыраҕы харахтаахтар эбит. Бу көрүҥҥэ иккиэн бастакы миэстэни ыллылар. Волейболга иккис миэстэ, манна эр дьоммут үчүгэй оонньууну көрдөрбүттэрин бэлиэтээн ааһар тоҕоостоох. Утарсааччыларын барыларын хоттулар. Кыргыттарбыт да үчүгэйдик оонньоотулар. Мас тардыһыытыгар Дьаархан кулуубун үлэһитэ Дмитрий Кондратьев бастакы, Күндэйэттэн Арнольд Меняков иккис, Кутана кулуубуттан Саргылаана Иванова үһүс миэстэни ылары ситистилэр.
Спартакиада бастакы күнүн киэһэтигэр балаһыанньа быһыытынан, «Олоҥхо дьиэтигэр» ырыаҕа, уус-уран ааҕыыга күрэх ыытылынна. Күрэх быыһыгар түөрт улуус култууратын үлэһиттэрин олус сэргэх концерын көрдүбүт. Ырыа күрэҕэр «Добун» култуура үлэһитэ Айсен Федоров кэргэнинээн Мариялыын дуэттарын дьүүллүүр сүбэ үрдүктүк сыаналаата. Онон бу көрүҥҥэ биһиги култуурабыт үлэһиттэрэ бастакы миэстэни ыллылар. Уус-уран ааҕыыга Тэҥкэ кулуубун директора Розалия Ефимова монолог ааҕан, дипломант буолла. Кэппэндээйиттэн Олимпиада Спиридонова Сайсары эмээхсин монологун аахта.
Быйыл бастакытын ыытыллар «Библиоледи» диэн библиотека үлэһиттэрин күрэҕэ ыытылынна. Манна Түбэй-Дьаархантан Айыына Никонова-Титова олус бэркэ кытынна. Кыыс олус талааннааҕын, идэтигэр бэриниилээҕин дьон бэлиэтии көрдө. Айыына бу күрэххэ иккис миэстэни ылары ситистэ.
Уус-уран оҥоһуктар быыстапкаларыгар биһиги улууспут култууратын үлэһиттэрэ иккис миэстэни ыллылар. Манна даҕатан эттэххэ, сунтаардар быыстапкаҕа туруорбут үлэлэргит төрүт үгэскэ олоҕуран оҥоһуллубут диэн бэлиэтээтилэр. Сиэйэ «Утум» музейын үлэһитин Октябрина Максимова флористиканан дьарыктанарын дьон сэргээтэ, улуустар гиэрбэлэрин бу ньыманан оҥорбута үрдүктүк сыаналанна. Ньурбалар саҥа ньыманы киллэрбиттэрэ кэрэхсэннэ. Ол курдук, сорох кыттааччылара дойдуларыгар олорон үлэлэрин терминал нөҥүө көрдөрдүлэр. Оһуохай күрэҕэр Марина Хомподоевабыт үһүс миэстэ буолла. Онон уопсай түмүккэ сунтаардар 24 баалланан, бастакы миэстэни ыллылар. Ньурбалар 27 баалланан иккистээтилэр. Үөһээ Бүлүү уонна Бүлүү хамаандалара үһүс миэстэҕэ тигистилэр. Эһиилги V спартакиада Үөһээ Бүлүү улууһугар ыытыллыаҕа.
Түмүккэ, тэрийээччилэр спорт отделын үлэһиттэригэр (нач. С.А.Павлов) махталларын тириэрдэллэр. Спортивнай күрэхтэһиилэри идэтийбит тренердэр, өрөспүүбүлүкэ таһымнаах судьуйалар иилээн-саҕалаан ыыппыттарын, кинилэр сөптөөх сыанабылы биэрбиттэрин спартакиада кыттыылаах-тара бэлиэтээтилэр. Кылаабынай судьуйанан ДЮСШ директора Александр Михайлов үлэлээтэ. Онон быйылгы спартакиада туох да улахан мөккүөрэ суох ыытылынна диэн этэллэр. Маны сэргэ бу тэрээһиҥҥэ Дьаархан, Күндэйэ, Сиэйэ, Кутана кулууптарын үлэһиттэрэ олус көхтөөхтүк, бары көһөн киирэн кытыннылар.
Комментарии
Авторизация на сайте через социальные сети