Ол 2013 сыл бэс ыйын 24 күнүгэр 3 саастаах кырачаан кыргыттар – Айаана Винокурова уонна Алина Иванова - сүппүт чахчыларынан РФ Холуобунай кодексатын 105-с ыст. 2-с чааһын «а», «в» пууннарынан холуобунай дьыала тэриллибитэ. Ол эбэтэр, бэйэтин көмүскэнэр кыаҕа суох икки киһини соруйан өлөрүү бэлиэтэ баарынан.
Бу икки сыл иһигэр араас барыта буолбута: оҕолор сүппүттэрэ тоҕус ый буолбутун кэнниттэн кыргыттар ийэлэрэ Москва куоракка, ТНТ ханаалыгар «Битва экстрасенсов» биэриитигэр кыттыбыт көрбүөччүлэри көрсүһэ барбыттара. Маннааҕы көрбүөччүлэр кыайан көмөлөспөтөхтөрүттэн, силиэстийэ уорганнарын өттүттэн туох да сибики суоҕуттан, бүтэһик эрэл оҥостон, онно тиийбиттэрэ. Көрбүөччү Фатима Хадуева «Мин сүппүт дьону көрдөөһүнүнэн дьарыктаммаппын, кыргыттар көстүбэттэр» диэбит этэ.
2014 сыл олунньу 10 күнүгэр РФ Силиэстийэлиир кэмитиэтин Саха сиринээҕи управлениетын салайааччыта Олег Мезрин бу дьыаланы силиэстийэлээһин 2013 сыл ахсынньы ыйыгар тохтотуллубутун иһитиннэрбитэ. Бу ураты ыар буруйу оҥорууга уорбаланааччы кимин кыайан быһаарбатахтарынан сибээстээн.
2014 сыл муус устар 20 күнүгэр Алина эһээтэ Силиэстийэлиир отделга бэйэтэ кэлэн, кырачаан кыргыттар өлүүлэригэр сыһыаннааҕын туһунан эппит уонна буруйун билинэр сайабылыанньа суруйбут этэ. Сарсыныгар, муус устар 21 күнүгэр, силиэстийэ уонна полиция үлэһиттэрэ Сиинэҕэ суһал-силиэстийэлиир дьайыылары оҥороору, бөртөлүөтүнэн тиийэн, Иванов ыйбыт сирин көрбүттэр этэ да – өлүктэри булбатахтара. Ол кэнниттэн кини бэйэтин көрдөрүүтүттэн аккаастаммыт этэ.
2014 сыл ыам ыйын 9 күнүгэр Сиинэҕэ ампаарга «Сиинэ дьыалатыгар» туоһу быһыытынан доппуруостаммыт 32 саастаах Латышев өлүгэ көстүбүтэ. Кини сүрэҕэр быһаҕынан анньыллыбыт, ыйаммыт этэ.
Бүгүҥҥү күҥҥэ бу дьыаланан хамсааһын, туох да уларыйыы суох. Силиэстийэтэ сонон тохтотуллан турар. Полиция оперативниктара бу ураты ыар буруйу оҥорууга сыһыаннаах киһини көрдүүллэр диэн буолар. Дьыалаҕа суолталаах ханнык эмит иһитиннэрии, чахчы биллэн, силиэстийэ хат сөргүтүлүннэҕинэ, ону ааҕааччыбытыгар тиэрдиэхпит.
Комментарии
Авторизация на сайте через социальные сети