Эбээх орто оскуолатын 9-11-с кылааһын үөрэнээччилэрэ - биэс кыыс уонна биэс уол, Фёдор Колесов салалтатынан “ОЛИМП” лааҕырга 23 күн сырыттылар. Оҕолор Ынтаах учаастакка балаакканан хоно сылдьан оттоотулар. Кинилэргэ иитээччи Аркадий Васильев, тырахтарыыс Александр Третьяков күүс-көмө буоллулар.
Ходуһа уулаах буолан, оҕолор охсуллубут оту илиилэринэн харбаан, кураанах сиргэ таһааран, куурдан бугуллаатылар. Атырдьах ыйын 24 күнүээҕи туругунан, барыта 21 оту туруордулар. Онон былааннаах 50 тонна оннугар 57 тоннаны оттоотулар. Ардах мэһэйдээбэтэҕэ буоллар, өссө элбэҕи оттуур кыахтаах этибит диэн лааҕыр салайааччыта санаатын үллэһиннэ.
Оҕолор лааҕыры сөбүлээн, астынан, эһиил эмиэ кэлиэх буолан эрэннэрдилэр. Кинилэр оттообут отторун сайаапканан чааһынай дьоҥҥо атыылаан, хамнастарын балаҕан ыйын бүтэһигэр ылыахтара.
Оҕолор, маладьыастар! Биир күн дьылы аһатарын өйдөөн, ылыммыт былааннарын толорон, биир дойдулаахтарыгар улахан көмөнү оҥордулар.
Комментарии
Авторизация на сайте через социальные сети