Сайыҥҥы бэлиэ күҥҥэ Ил Түмэн депутата Михаил Габышев, улуус баһылыгын бастакы солбуйааччы Сергей Бурнашев, улуус баһылыгын солбуйааччы Геннадий Васильев, Хоро нэһилиэгин баһылыга Виктор Крылов, улуус Сэбиэтин депутата Леонид Сергеев, о.д.а. кытыннылар.
Евграф Михайлович үөрэхтэнэ илигиттэн айылҕаттан айдарыылаах худуоһунньук буолара көстүбүтэ. 1941 сылга бэйэтэ тылланан Аҕа дойду Улуу сэриитигэр барбыта. Арҕаа фроҥҥа политругунан, взвод хамандыырынан сулууспалаабыта, “Артилерия туйгуна” бэлиэнэн, “Аҕа дойду Улуу сэриитигэр Германияны кыайыы иһин”, “Килбиэннээх үлэтин иһин” мэтээллэринэн наҕараадаланан сэриини түмүктээбитэ.
1947 сыллаахха Москватааҕы художественнай училищены бүтэрбитэ. Кини Саха сирин айылҕатын сэҥээрэн уруһуйдуура, бастакынан Арктика оройуоннарын кэрэ көстүүлэрин полотноҕа дьүһүйбүтэ. Евграф Михайлович биллэр үлэлэринэн “Өлүөнэ өрүс” (1957 с.), “Өймөкөөн хайаларыгар” (1957 с.), “Төрөөбүт алааспар” (1963с .) о.д.а. буолаллар. 80-ча үлэлэрэ СР Национальнай художественнай музейыгар харалла сыталлар.
Уйгу быйаҥ ыһыаҕы СР үтүөлээх артыыһа Владимир Заболоцкай алҕаан арыйда. Хоро нэһилиэгин баһылыга Виктор Крылов улуус, нэһилиэк салалталарын уонна депутаттарын быһаарыыларынан Майаҕас сэлиэнньэтигэр биэс сүүс миэтэрэ уһуннаах уулуссаҕа Евграф Михайлович Крылов аатын иҥэрэр туһунан уураах тахсыбытын туһунан иһитиннэрэн дьонун үөртэ уонна уурааҕы Евграф Михайлович төрөппүт кыргыттарыгар Валентина уонна Галина Крыловаларга туттарда. Мантан ыла бу уулуссаны тупсарар үлэлэр ыытыллыахтаахтар. Ил Түмэн депутата Михаил Семенович, улуус баһылыгын маҥнайгы солбуйааччы Сергей Сестикович, улуус Советын депутата Леонид Михайлович уһун сылларга үрдүк таһымнаах үлэни көрдөрбүт нэһилиэк олохтоохторугар наҕараадалары туттардылар.
Майаҕастар ырыаһыт талааннаах дьонунан биллэринэн, ыһыах кэнсиэрин үксүн бэйэлэрэ ыыттылар. Төрөөбүт алааһыгар саха эстрадатын мэтрэБүөккэ Бөтүрүөпыллаан биир дойдулаахтарын үөртэ. Кинини кытары Иннокентий Васильев – Лэгэнтэй, Любовь Готовцева, Александра Алексеева, Виталий Очиров, Егор Степанов ыһыаҕы дьон таптыыр ырыаларынан киэргэттилэр. Ыһыаҕы тэрийээччилэр Евграф Михайлович хартыыналарын быыстапкатын тэрийдилэр.
Ыһыах үгэһинэнараас күрэхтэһиилэр ыытылыннылар. Дьахталлар сүүрүүгэ, таас быраҕыытыгар, сэппэрээтэр таҥыытыгар, хара баттаһыытыгар уонна мас тардыһыытыгар күрэстэстилэр. Манна кыайыыга дьулуурдааҕынан Александра Вихрева-Крылова буолла уоннатаҥас сууйар массыына бириис хаһаайкатынан буолла. Оттон эр дьон сүүрүүгэ, хапсаҕайга, мас тардаһыытыгар, “Үс төгүл үскэ» уонна таас көтөҕүүтүгэр күөн көрүстүлэр. Кыайыылаах Хоро боотура Герман Копырин нэһилиэк дьаһалтата туруорбут бирииһинэн — мотоциклынан биһирэннэ.
Комментарии
Авторизация на сайте через социальные сети