1959 с. сэтинньи 20 күнүгэр ХНТ Оҕо быраабын декларациятын ылыммыта. Оттон 1989 сыллаахха эмиэ бу күн Оҕо быраабын туһунан конвенция баар буолбута. Онон, сэтинньи 20 күнэ аан дойду оҕолорун күнүнэн ааҕыллар.
Сэтинньи 20 күнүгэр Россияҕа оҕо быраабыгар көмө күнэ быйыл үһүс сылын ыытыллар. Дьаһаллар, бастатан туран, инбэлиит, тулаайах, төрөппүт көрүүтэ-истиитэ суох оҕолорго уонна кинилэр сокуонунан көрүллэр бэрэстэбиитэллэригэр ананыахтара.
СӨ Ыччат дьыалаларыгар уонна дьиэ кэргэн политикатыгар министиэристибэтэ оҕолор бырааптарын уонна сокуонунан көрүллэр интэриэстэрин көмүскэлигэр аналлаах дьаһаллар былааннарын оҥордо. Бу дьаһаллар бары Оҕо быраабын аан дойдутааҕы күнүгэр ананаллар уонна өрөспүүбүлүкэ бары улуустарыгар уонна куораттарыгар ыытыллаллар.
Ханна, хаһан?
Өрөспүүбүлүкэ юстициятын судаарыстыбаннай кэмитиэтин үлэһиттэрэ «Саха» НКИК «Правовой канал» быһа биэриитигэр кытыннылар.
х х х
Сэтинньи 19 күнүгэр СӨ Ыччат дьыалаларыгар уонна дьиэ кэргэн политикатыгар министиэристибэ дьиэ кэргэҥҥэ уонна ыччакка социальнай-психологическай көмө киинигэр аһаҕас аан күннэрин ыытар. Ким баҕалаах Каландаришвили уул., 21 нүөмэрдээх дьиэтигэр 10-15.00 ч. диэри кэлэн, интиэриэһиргиир боппуруоһун ыйыталаһыан сөп.
х х х
Сэтинньи 20 күнүгэр Саха Өрөспүүбүлүкэтигэр суут приставтарын федеральнай сулууспатын управлениета «Быһа линияны» үлэлэтэр.
Быраап, докумуоннарынан хааччыйыы уонна гражданнар суруктарынан үлэлиир отдел исписэлиистэрэ 09-12.30 ч. диэри 8(4112) 223194 төлөпүөнүнэн ыйытыыларга эппиэттиэхтэрэ. Эрийэн тиийбит дьон оҕо быраабын чөлүгэр түһэрии, алимены төлөөһүн, тулаайах уонна төрөппүт көрүүтэ-истиитэ суох хаалбыт оҕолорго олорор дьиэни биэрии, оҕо биир төрөппүтүн кытары олорор сирин быһаарыы уо.д.а. боппуруостарга сөптөөх эппиэттэри ылыахтара.
х х х
Сэтинньи 21 күнүгэр өрөспүүбүлүкэ киин куоратыгар «Мин үтүө санааны аҕалабын» аһымал акция буолуоҕа. Акция Дьокуускай куорат элбэх оҕолоох ыалларыгар көмөнү оҥорорго аналлаах.
х х х
Ону тэҥэ уопсай үөрэх оскуолаларыгар, оскуолаҕа киириэн иннинээҕи саастаах оҕолорго, коррекционнай оскуолаларга кылаас чаастарыгар, лекцияларга оҕо быраабын билиһиннэриэхтэрэ.
х х х
Нерюнгрига, Аммаҕа, Чурапчыга, Аллараа Бэстээххэ элбэх функциялаах кииннэр базаларыгар оҕо көмүскэлин боппуруостарыгар гражданнары кытары көрсүһүүлэр ыытыллыахтара. Атын улуустарга босхо юридическай көмө оҥоһуллуоҕа.
х х х
Дьокуускайга «Мин докумуоннарым» офиска тэриллэр биэдэмэстибэлэр икки ардыларынааҕы пууҥҥа судаарыстыбаннай былаас бэрэстэбиитэллэрэ уонна адвокаттар кыттыахтара. Маннык пууннар Дьокуускайга Национальнай библиотекаҕа, Абый, Үөһээ Бүлүү, Бүлүү, Горнай, Ленскэй, Мэҥэ-Хаҥалас, Нам, Нерюнгри, Өймөкөөн, Өлөөн, Уус-Алдан, Хаҥалас, Чурапчы оройуоннарыгар аһыллыахтара.
Улуустарга биэнсийэ фондатын управлениеларыгар инбэлиит оҕолору биэнсийэнэн хааччыйыы боппуруостарын сырдатыахтара.
Комментарии
Авторизация на сайте через социальные сети