Ааспыт субуотаҕа Дьокуускай куоракка 79 саастаах эмээхсини дьиэтин подъеһыгар лицей устудьуона халаата – саба түһэн суумкатын былдьаабыт. Кырдьаҕас киһи туох улахан баайа-мала кэлээхтиэй – суумкатын иһигэр суотабай төлөпүөнэ уонна 150 солк. харчыта баара үһү. Эмээхсин эрэйдээх соһуччута бэрдиттэн халабырдьыт дьүһүнүн-бодотун, таҥаһын-сабын өйдөөн-дьүүллээн көрбөккө хаалбыт да буоллар, патруллуур-постовой сулууспа полицейскайдара халабырдьыты ир суолун ирдээн, тоҥ суолун тордоон сол киэһэ туппуттар.
Таһырдьа халааһын, талааһын сиэртибэтинэн үксүгэр кыра, кыаммат араҥа – оҕолор, кырдьаҕастар,кыыс-дьахтар, эбэтэр итирик киһи буоларын. Бүгүн итинник түбэлтэлэртэн хайдах көмүскэниэххэ сөбүн эмиэ санатан ааһыахпын баҕардым.
Бастатан туран, дьону анаан-минээн халыы-талыы тахсыбыт бөрөстүүпүнньүктэр киһини таҥаһыттан-сабыттан көрөллөр. Онон, таһырдьа тахсаргытыгар көмүс киэргэллэргитин устан, сыаналаах малларгытын (суотабай төлөпүөн, планшет да буоллун) харахха быраҕыллыбат гына уктан тахсаргыт ордук.
Иккиһинэн, тулаҕытын болҕомтолоохтук сирийэн көрүнэргэ үөрэниҥ. Халабырдьыттар анаан тоһуйан олорботтор, үксүгэр сиэртибэлэрин киһи элбэх сиригэр бэлиэтээн көрөн, кини уота-күөһэ мөлтөх, киһитэ аҕыйах сиргэ биитэр подъезка тиийэрин кэтииллэр, батыһаллар. Онон, кими эмит уорбалыы көрдөххүтүнэ, дьоҥҥутугар эрийэн, утары тахсан көрсөллөрүгэр этиҥ. Түүн хойут дьиэлиир буоллаххына такси ыҥырбыт ордук.
Ол эбэтэр, элбэх дьонноох, уоттаах сирдэринэн сырыт, хараҥа оройуон буоллаҕына, уулусса ортотун тутуһа сатаа.
Үсүһүнэн, билбэт киһиҥ (дьонуҥ) массыынанан илдьэн биэрэргэ этии киллэрдэҕинэ, сөбүлэһимэ, олорсума. Эйигин батыһалларын сэрэйдэххинэ, хаамаргын түргэтэт уонна уулусса нөҥүө өттүгэр туораа. Утары элбэх уол иһэр буоллаҕына – эмиэ. Куотар түгэҥҥэр дьиэ кэннигэр, хараҥа сиргэ буолбакка, дьон диэки, сырдык сиргэ сүүр.
Төрдүһүнэн, быһалыыбын диэн, хойуу оттоох-мастаах, быраҕыллыбыт сирдэринэн, гараастар быыстарынан сылдьыма.
Бэсиһинэн, тас сиэпкэ бэйэни көмүскэнэр тэриллэри (гаас боллуонун, электрошокер) илдьэ сылдьыахха сөп.
Алтыһынан, харчыгын, төлөпүөҥҥүн, күлүүстэргин ис сиэптэргэр укта сырыт. Итинник быһылааҥҥа түбэстэххэ, саба түһээччилэр таҥастарын-саптарын, дьүһүннэрин, тугу кэпсэтэллэрин, ким диэн ыҥырсалларын, хайа диэки барбыттарын төһө кыалларынан өйдөөн көрө сатаа. Кыаллар буоллаҕына, таҥастарыттан тугу эмит быһа тардан ыла сатаа. Холобур, тимэҕин.
Сэттиһинэн, ыһыытаан-хаһыытаан көмөҕө ыҥыр, маҕаһыыҥҥа, киоскаҕа куотан киир. Билигин полицияны быһа ыҥырар кунуопкалар киоск аайы бааллар.
Биири өйдүөх тустааххын: полицияны тутатына ыҥыр! Төһөнөн түргэнник биллэрэҕин да, сонон буруйдаахтары “сылааһына” тутар кыах баар!
Комментарии
Авторизация на сайте через социальные сети