Улахан Мархатааҕы 5 №-дээх уонна Ленскэйдээҕи 8 №-дээх холуонньалартан ураты бары уонна 1 №-дээх Силиэстийэлиир изолятор хамаандалара (барыта 150-тан тахса хаайыылаах) кытыннылар. Быйыл тоҕус көрүҥҥэ күрэхтэстилэр: 100 м сүүрүүгэ, эстафетаҕа, мас тардыһыытыгар, хары баттаһыытыгар, киирэ анньыытыгар, хапсаҕайга, волейболга, футболга уонна ханаат тардыһыытыгар. Халлаан да туран биэрэн, күрэхтэһээччилэр өрө көтөҕүллэн туран кииристилэр.
УФСИН салалтата быйыл судьуйаларынан үрдүк таһымнаах, ааттаах-суоллаах спортсменнары ыҥыртаабыт: киирэҕэ – Василий Дьячковскайы, хапсаҕайга – Валерий Табытыковы, мас тардыһыытыгар – Петр Баттаховы, хары баттаһыытыгар – Александр Боровиковы, волейболга – Светлана Муратованы уо.д.а. Бу бөлөх СӨ физкультураҕа уонна маассабай спорка управлениетын начальнигын солбуйааччы Александр Неустроев салалтатынан үлэлээтэ. Ыалдьыттар эрдэ-хойут дьиэлээбэккэ, спартакиада бүтүөр, ол эбэтэр, күн саҕахха түһүөр диэри сылдьыбыттара кэрэхсэбиллээх.
Уһун-унньуктаах киирсии түмүгэр кыайыылааҕынан Табаҕатааҕы 7 №-дээх кытаанах режимнээх холуонньа хамаандата таҕыста. Сылын аайы илин-кэлин түсүһэр 6-с холуонньа (хаһаайыттар) быйыл иккис миэстэ буолла. Оттон үһүс миэстэҕэ Силиэстийэлиир изолятор тигистэ. Кыайыылаахтар бэртээхэй бириистэринэн наҕараадаланнылар.
Александр Неустроев, СӨ физкультураҕа уонна маассабай спорка управлениетын начальнигын солбуйааччы:
--Маннык күрэхтэһиигэ бу аан бастакы сылдьыым. Көҥүлгэ ыытыллар күрэхтэһиилэртэн улахан уратыта суох эбит. Сүрдээх көхтөөхтүк барда диэн бэлиэтиибин. Холуонньаларга эрдэттэн спортсменнарын сүүмэрдээн бэлэмнэммиттэрэ көстөр. Сабыылаах тэрилтэлэргэ олорооччулар спорка тардыһыылара, күрэхтэһиигэ баҕалаахтара харахха быраҕыллар. Бу алтыс холуонньа олохтоохторо уопсай дьиэлэриттэн тахсан, көннөрү көрөөччү да быһыытынан олороллоро спорка интэриэс баарын туоһулуур. Холуонньа спортивнай базата арыый үчүгэйэ эбитэ буоллар, атын күрэхтэһиилэртэн уратыта суох буолуо эбит.
Накаастабылы толорор управление бу спартакиаданы сылын аайы үгэс курдук ыытара үчүгэй. Хаайыыга биир күдьүс олохтон маннык тэрээһиннэр сэргэхситэллэр, аралдьыталлар. Хаайыылаахтар бэйэ-бэйэлэригэр да сыһыаннарыгар үтүө өттүнэн дьайар буолуохтаах.
Комментарии
Авторизация на сайте через социальные сети