ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
15 июня 2015, 15:50

Олоҥхо Ыһыаҕын тойон түһүлгэтэ төрүттэниэҕэ


«Туругур, тохсус Олоҥхо Ыһыаҕын тойон түһүлэгэтэ!» өрөспүүбүлүкэтээҕи Олоҥхо Ыһыаҕа бэс ыйын 18 күнүттэн 21-гэр диэри Чурапчы сэлиэнньэтигэр ыытыллаары турарын туһунан бары истэ, билэ сылдьабыт. Ыһыах саҕаланыаҕыттан бүтүөр диэри худуоһунньуктар, скульптордар, талба талааннаах маастардар быыстапкалара, тэриллиэҕэ, бэлиэ күҥҥэ сыһыаннаах кинигэлэри сүрэхтиэхтэрэ. Тойуксуттар, олоҥхоһуттар, кэрэ кыргыттар, уран тарбахтаах уустар, оһуохайдьыттар, хомусчуттар, чабырҕахсыттар, сахалыы мааны таҥастаахтар күрэстэһиэхтэрэ.

Быйылгы Олоҥхо ыһыаҕар «Тоҕус томтор тойуга» тэрээһиҥҥэ Олоҥхо дьоро киэһэтигэр өрөспүүбүлүкэ араас муннуктарыттан чөллөркөй, чуор куоластаах олоҥхоһуттар Василий Иванов – Чиллэ Баһыйлай (Ньурба), Кирилл Никифоров (Үөһээ Бүлүү), Валентин Исаков (Дьокуускай), Петр Тихонов (Мэҥэ-Хаҥалас), Аркадий Захаров (Мэҥэ-Хаҥалас), Николай Баишев (Дьокуускай), Николай Тарасов (Чурапчы), Семен Иванов (Бүлүү), Николай Григорьев (Чурапчы) кытталлара күүтүллэр.

photoByWidth&id=36681&width=1000

Киин түһүлгэҕэ Аар Баҕахха Олоҥхо Ыһыаҕын үөрүүлээхтик аһыы сиэрин-туомун бэс ыйын 20 күнүгэр 11:00 чаастан толоруохтара, кымыс үрдүн охторуу сиэрин-туомун оҥоруохтара.  

«Тоҕус томтор оонньуулара» быйыл С.С.Алексеев аатыгар күөн көрсүһүү, күрэс былдьаһыы буолуоҕа. Ол курдук, оҕунан ытыыга, атах оонньуутугар, хапсаҕайга,  мас тардыһыытыгар сүрүн күрэстэһиилэр буолуохтара, оҕолор олоҥхоҕо, хабылыкка, хаамыскаҕа күрэхтэһиэхтэрэ.

«Үс үүт күрүөнү үрдүнэн көтөр Үрүлү Бэргэн» Мария Обутова-Эверстова этно-модерн олоҥхото (туруорааччы-режиссер В.А.Якимец), Платон Ойуунускай «Ньургун Боотур» олоҥхо-операта, И.Г.Теплоухов-Тимофеев «Куруубай хааннаах Кулун Кулустуур» олоҥхо-испиктээкил (туруорааччы режиссер Андрей Борисов) мустубут дьон болҕомтотун үөһүгэр буолуохтара.

«Олоҥхо дойдутун кэхтибэт киэргэлэ» ат тэрилигэр уонна симэҕэр Бүтүн Росситятааҕы фестиваль соҕурууттан-хотуттан, ыраахтан-чугастан дьону-сэргэни мунньуоҕа. Улахан дьон, оҕолор олоҥхону толорууга күрэстэһиэхтэрэ.

Тыынаах муусуканан кэнсиэр, байаанынан ырыа-үҥкүү хойукка диэри дуораһыйыаҕа. Быйылгы Олоҥхо Ыһыаҕа ат сүүрдүүтүнэн, эстрада артыыстарын улахан кэнсиэринэн түмүктэниэҕэ. 

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 752 Источник: ЯСИА Автор: Елена Обутова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ