Тэрээһини олохтоох оскуола уонна нэһилиэк библиотекатын коллективтара тэрийбиттэр. Айталина Семеновна бэлиэтииринэн, дьон-сэргэ биэчэргэ өрө көтөҕүллэн кыттыбыт. «Есенин – душа народа» диэн хоһоону ааҕааччылар куонкурустарыгар 1-11 кылаас оҕолоруттан саҕалаан, тэрилтэ салайааччыларыгар тиийэ күрэстэспиттэр. Барыта 25 кыттааччы улуу поэт хоһооннорун долгутуулаахтык ааҕаннар, көрөөччүлэргэ да, дьүүллүүр сүбэҕэ да биһирэппиттэр.
Маны сэргэ библиотека саалатыгар ыытыллыбыт “Певец бревенчатой золотой избы» быыстапка-куонкурус улахан болҕомтону тардыбыт. Манна оскуола үөрэнээччилэрэ 19-с үйэҕэ туттуллубут оҕо биһигин, оргуһуоҕу, илиинэн сап хатар тэрили (прялка), хоппону оҥорон аҕалбыттарын көрбүт эрэ барыта хайҕаабыт, сэргээбит. «Ну а я крестьянский сын» диэн оҕолор илиилэринэн тиһэн, уруһуйунан, аппликациянан киэргэппит кинигэлэрин биэчэр кыттыылаахтара бары биһирээбиттэр.
Бу быыстапканы сэргэстэһэ тардыллыбыт «Страна березового отца» уруһуй куонкуруһа оскуола үөрэнээччилэрэ поэт олоҕун, айар үлэтин улаханнык сэҥээрэллэрин ырылхай туоһутунан буолбут. Маныаха медиа уонна видео слайдалары ыалдьыттар улаханнык сэҥээрбиттэр, хойукка диэри олорон ирэ-хоро сэһэргэспиттэр, санааларын үллэстибиттэр. Маннык тэрээһинтэн оҕо билиитэ-көрүүтэ хаҥыырын, кэрэҕэ тардыһара күүһүрэрин бэлиэтээбиттэр.
Комментарии
Авторизация на сайте через социальные сети