– Сэрэҕэ суох половай сылдьыһыы түмүгүнэн бэриллэр ыарыыларга (инфекцияларга) венерическэй уонна киэҥник тарҕаммыт «иккис көлүөнэ» ыарыылара киирсэллэр. Холобур, хламидиоз, микоплазмоз, уреаплазмоз, трихомониаз, цитомегаловирус, генитальнай герпес, гарднереллез уо.д.а.
Харыстанар малы туттубакка эрэ түбэһиэх, сэрэҕэ суох сылдьыһыы кэнниттэн бэриллэр сыстыганнаах ыарыылар тута биллибэттэринэн кутталлаахтар. Бу ыарыылар бобута-хайыта тутан ыарытыннарбаттар, ол оннугар киhини «көйөн сиир» кэриэтэ ыарыылар. Онуоха маннык сибикилэр хаһан эмэ биллэн ааһыахтарын сөп. Холобур, эр киһи ииктиир ханаалыттан ордук сарсыарда өттүгэр аҕыйах дьэҥкир эбэтэр сырдык өҥнөөх салыҥ тахсыан, ииктиир ханаалын аhытыан, кыhытыан сөп. Дьахтар ииктиир, төрүүр-ууһуур органнара аһыйар, кыһыйар, салына куһаҕан сыттаныан сөп, иhин түгэҕэ, сиhэ ыалдьар буолар.
Сорох ыарыы уһаан-тэнийэн, дириҥээн хроническай көрүҥҥэ кубулуйдаҕына, киһи сүрүн сүһүөхтэрин, сүрэҕин сүһүрдүөн, истэрин мөлтөтүөн сөп. Хат дьахтар оҕото куотарыгар, оҕото сайдыбакка хааларыгар, дьахтар эбэтэр эр киһи оҕото-уруута суох буолуутугар тириэрдиэн сөп.
Онон, түбэһиэх, алҕаска эбэтэр бэрээдэгэ суох партнерун уларытар киһи хайаан да бу ыарыыларга бэрэбиэркэлэнэрэ наадалаах.
Бэрэбиэркэлэниэн баҕалаахтар Дьокуускайдааҕы тирии уонна венерологическэй диспансер поликлиникатыгар эбэтэр «А.Б.Н.» диэн анонимнай кабинекка анал үөрэхтээх быраастарга кэлэн көрдөрүөххүтүн, сүбэ-ама ылыаххытын, доруобуйаҕытын чөлүгэр түһэриэххитин сөп.
Сэрэтии ньымалара:
– Венерическэй ыарыылар төрүөттэрэ, аргыстара буолар аhыы утахтан аккаастан!
– Түбэһиэхчэ эбэтэр кылгас кэмнэ билсибит киhигин кытта половой сылдьыhыыттан туттун!
- Хас биирдии киһи половой сылдьыһыы түмүгэр бэриллэр сыстыганнаах ыарыылар, олор киһиэхэ содулларын, дьайыыларын уонна харыстанар ньымалар тустарынан билэрэ наада.
- Чэгиэн доруобуйалаах буоларга дьулус, чөл олоҕу тутус!
Комментарии
Авторизация на сайте через социальные сети