Духуобунас академиятын академига, норуот маастара Борис Неустроев – Мандар Уус 70 сааһын айар үлэ үөһүгэр көрсөр. Кини быһаччы көҕүлээһининэн, ыйыытынан-кэрдиитинэн Моҕол Ураһа ойуута-мандара оҥоһуллуоҕа.
«Хас биирдии норуот култуура, духуобунас, итэҕэл, материальнай өттүнэн булгуччу бигэ тирэхтээх буолуохтаах. Итинник бөҕө акылааттаах норуот инникитин диэки дьүккүөрдээхтик сайдар. Үлэбэр, сырабар-сылбабар оччоттон-баччаҕа диэри бу курдук санаанан салайтаран кэллим.
Маннык Моҕол Ураһаны тутар санаа түбэһиэхчэ кэлбэтэҕэ. Тумус туттар киһибит Суорун Омоллоон баҕа санаата, кэриэс-хомуруос тыла этэ», - диэтэ СИА-ҕа Борис Федорович.
Сахалар туостан оҥоһуллар сайыҥҥы дьиэлэрэ кээмэйиттэн көрөн үс көрүҥҥэ арахсаллара. Итилэртэн саамай улаханнара 8,5 м үрдүктээх Моҕол Ураһа баар буола сылдьыбыта историяттан биллэр. Мандар Уус этэринэн, саҥа тутуллар ураһа 9 м үрдүктээх, 12 м. уһуннаах буолуохтаах.
“Моҕол Ураһаны Дьокуускай куорат Сайсары күөлүн таһыгар туруорар баҕа санаалаахпын. Туос ураһа кэбирэҕэ биллэр. Онон тутуу үйэлээх буоларын туһугар кыахпытын ууран туран үлэлиир соруктаахпыт”, - диир кини.
Ураһа ойуутун-дьарҕаатын туоска тигэр маастардары биир сиргэ мунньан бастаан утаа үөрэтиэхтэрэ, сүбэлэһиэхтэрэ-амалаһыахтара. Ол кэнниттэн улууска олорор маастардар туоһу бэйэлэрэ хастаан, харайан, тигэн киирэн барыахтаахтар.
Норуот маастара Екатерина Колодезникова СИА-ҕа эппитинэн, араас улуустар маастардара ураһаны тигиигэ ылсаллар. Уус-Алдан улууһуттан элбэх маастар бу үлэҕэ кыттыһар. Сүбэлэһии, былааннааһын үлэтэ саҕаламмыта ырааппыт. Барыта баҕарбыт, санаабыт хоту бардаҕына, Моҕол Ураһа 2017 сылга тутуллан үлэҕэ киириэхтээх.
Норуоппут тумус, бас-көс туттар киһитигэр биһирэбил, билинии тылларын бырабыыталыстыба бэрэссэдээтэлин солбуйааччы Александр Соловьев, норуот депутата Дмитрий Саввин, Таатта улууһун баһылыга Михаил Соров тиэртилэр.
Комментарии
Авторизация на сайте через социальные сети