Бу 200 ыанньык уонна 200 субан сүөһү киирэр комплекса уруккута сүөһү бөҕөтө тоҕуоруспут, колхуос, сопхуос ыанньык, субан сүөһү көрөр хотонноро турбут, үгүс киһи үлэлээн ааспыт Кыстык Кугда түөлбэтигэр тутулунна. Толору механизациялаах, аныгы технологиянан хааччыллыбыт таас комплекс аһыллыытыгар Болугур нэһилиэгин салалтата, общественность бэрэстэбиитэллэрэ, нэһилиэктэр баһылыктара, бааһынай хаһаайыстыбалар салайааччылара, ыҥырыылаах ыалдьыттар сырыттылар.
Киэҥ-куоҥ, үс салаалаах (боксалаах) аарыма тутуу биир салаатыгар быйыл 130 төбө красно-пестрай уонна герефорд боруода сүөһүлэр кыстаан тураллар. Хотон сылаас, ыраас, сырдык. Сүөһүлэр баайыыта суох көҥүл-босхо сылдьаллар. Олохтоох миэстэбитин буллубут диэбитттии, нус-хас тураллар, сорохтор сыталлар. От бэриллибитигэр, былдьаһыыта-тараһыыта суох аһаабытынан бардылар. Уулатыыта, ноһуом ыраастааһына - механизированнай. Кэлбит тиҥэһэлэр саас төрөөн-ууһаан бардахтарына, ньирэйдэр турар анал миэстэлээхтэр, ыаһын туспа боксаҕа дойканан ыытыллыахтаах.
Үөрүүлээх тэрээһиҥҥэ В.П. Герасимов сүөһү этэҥҥэ турарыгар, төрүөҕэ төрөлкөй буоларыгар, үрүҥ илгэ үрүлүччү ыанарыгар алгыс тылын анаата. Киирэр аан кыһыл лиэнтэтин кырыйар чиэс улуус баһылыгар А.Т. Ноговицыҥҥа, тыа хаһаайыстыбатын миниистиригэр А.Е. Артемьевка, Бологур нэһилиэгин баһылыга И.И. Николаевка, „Мындаҕаайы“ кооператив салайааччытыгар В.М. Константиновка тигистэ.
Саҥа комплекс аһыллыбытынан миниистир А. Е. Артемьев эҕэрдэлээтэ. Кини республика Президенэ Е. А. Борисов, правительство председателэ Г.И. Данчикова эҕэрдэлэрин тиэртэ. „Быйыл маннык түөрт комплекс үлэҕэ киллэриллиэҕэ. Бу тутуу бытааннык, уустуктук ыытылынна эрээри, бүгүн сиэрэ ситэриллэн олоххо киирдэ. Аны саас эбии сүөһү аҕалан толору үлэлэтэр соруктаахпыт. Олоҕун-дьаһаҕын булан, сотору кэминэн биирдии ынахтан 4000-лыы киилэ үүтү ыларга суоттаныахтааххыт. Харыстабыллаахтык сыһыаннаһан, механизация, аныгы технология күүһүн толору туһанан таһаарыылаахтык үлэлээҥ“,-- диэн алгыһын эттэ.
Улуус баһылыга А.Т. Ноговицын, улууспут историятыгар бастакынан толору механизациялаах комплекс киирбитинэн эҕэрдэлээтэ. Үс сыллааҕыта, оччотооҕу улуус баһылыга С.И. Яковлев, „Мындаҕаайы“ ТХПК салайааччыта А.И. Сивцев туруорсууларынан саҕаламмыт тутуу үлэҕэ киллэриллиитэ нэһилиэк, улуус дьонун-сэргэтин бүттүүнүн үөрүүтэ буоларын бэлиэтээтэ. Нэһилиэк салалтатыгар, тутааччыларга махтанна. Комплекс аныгы технологиятын таба туһанан таһаарыылаахтык үлэлииргэ, нэһилиэктэрин, улуус социальнай-экономическай сайдыытыгар биллэр-көстөр кылааты киллэрсиэхтэрэ диэн эрэнэрин эттэ.
Саҥа комплекс символическай күлүүһүн „Туймаада-лизинг“ ААО генеральнай дириэктэрин солбуйааччы А.Н. Иванов „Мындаҕаайы“ кооператив салайааччытыгар В.М. Константиновка дохсун ытыс тыаһын ортотугар туттарда. Василий Молотович нэһилиэк олохтоохторун ааттарыттан республика, улуус салалтатыгар, тутааччыларга махталын тиэртэ.
Бу дьоро күн Болугур нэһилиэгин дьоно-сэргэтэ Тыа хаһаайыстыбатын күнүн бэлиэтээтэ. Олохтоохтор ас-үөл быыстапкатыгар тэрээһиннээхтик кытыннылар. Производство бастыҥнара наҕараадалары туттулар. Саҥа комплекс аһыллыбытынан, үүтү, эти дэлэтээччилэр бырааһынньыктарынан эҕэрдэлэр этилиннилэр, бэлэхтэр туттарылыннылар. Үөрүүнү үрдэтэн,бырааһынньыктааҕы эҕэрдэ кэнсиэр буолла, ырыа-хоһоон, үҥкүү-битии тардылынна.
Комментарии
Авторизация на сайте через социальные сети