Бастаан утаа туох диэн буолбутай?
Быһылаан буолаатын, РФ ИДьМ-тын СӨ ИДьМ-тын пресс-сулууспата маннык иһитиннэрбитэ: “Бу дьыл олунньу 7 күнүгэр, түүн 23.00 чаас саҕана, Горнайдааҕы полиция дьуһуурунай чааһыгар иһитиннэрии киирбит. Ааһыма уонна Бэрдьигэстээх сэлиэнньэлэрин икки ардыларынааҕы суолга киһи эмсэҕэлээһиннээх быһылаан тахсыбытын туһунан.
Быһылаан буолбут сиригэр тиийбит суһал-силиэстийэлиир бөлөх быһаарбытынан, «Тойота Ланд Крузер» массыына 44 саастаах суоппара Дьокуускай куоракка айаннаан иһэн, “УАЗ” массыынаны саайбыт. “УАЗ” кини ааһар сиринэн, суол кытыытыгар алдьанан турбут. Оттон “УАЗ” иннигэр 29 саастаах киһи буксировочнай торуоһу иилэ турбут. Онуоха джип “уазигы” саайбыт күүһүттэн, массыына ол киһи үрдүнэн барбыт. Ылбыт эчэйиилэриттэн эдэр киһи сырдык тыына аара суолга быстыбыт.
Барыллаан быһаарыынан, “УАЗ” аварийнай уоттара холбонон турбуттар, ол эрээри, суоппар аварийнай бэлиэни туруорбатах. Хойуу туман уонна массыына буруота мэһэйдээннэр, «Тойота Ланд Крузер» суоппара аварийнай уоттары хойутаан өйдөөн көрбүт. Массыынаҕа сааллымаары салайбыт да, уҥа өттүнэн “УАЗ” хаҥас, кэлин өттүн таарыйбыт. Медицинскэй туоһулааһын көрдөрбүтүнэн, джип суоппара арыгы испэтэҕэ биллибит. Билигин бу чахчынан бэрэбиэркэ бара турар” диэн.
Оттон суол быһылаанын кыттыылааҕа, “Вилюй” ФКУ начальнигын солбуйааччы Эрнст Березкин, "News.Ykt.Ru" сайтыгар биэрбит комментарийыгар: “Бастатан туран, өлбүт эдэр киһи чугас дьонугар кутурҕаммын тиэрдэбин. Олунньу 9 күнүгэр эрэ Дьокуускайга кэлбитим. Быраабы араҥаччылыыр уорганнар ирдэбиллэрин барытын толорон, сокуонунан көрүллэр силиэстийэлиир дьайыыларга барытыгар кытынным. Билигин бэрэбиэркэ бара турар кэмигэр бу суол быһылаанын ымпыгын-чымпыгын комментарийдыыры сөбө суоҕунан ааҕабын. Ымпыгар-чымпыгар диэри барытын сиһилии үөрэтэн-көрөн силиэстийэлиэхтэрэ диэн эрэнэбин. Мин көрүүбэр, силиэстийэлиир, техническэй уонна да атын экспертизалар уопсастыба өттүттэн баттыгаһа суох ыытыллыахтаахтар. Эдэр киһи, ыал аҕата суорума суолланна, онтон мин туора турар санаам суох”, -- диэн эппитэ.
Сыл аҥара ааста, ити быһылаан буолбут кэмиттэн. Ити тухары бу дьыала туһунан улахан “тыас-уус” суоҕа. Ол эмиэ да сөп – силиэстийэ бара турар кэмигэр орооспот ордук. Арай от ыйын бүтүүтүгэр ис дьыала миниистирэ, полиция полковнига Владимир Прокопенко пресс-конференцияҕа иһитиннэрбитинэн, бу чахчынан холуобунай дьыала ыам ыйын бүтүүтүгэр эрэ тэриллибит. Бастакы экспертизалар түмүктэрэ кулун тутар ый саҥатыгар биллибиттэр эрээри, ол туһунан иһитиннэрии суоҕа. Миниистир эппитинэн, ол түмүктэргэ сөпсөспөккө, силиэдэбэтэл Хабаровскайга хаттаан экспертизаҕа ыыппыт. Ол иккис экспертиза түмүгэ эмиэ биллибит этэ эрээри, ону киэҥ эйгэҕэ биллэрэртэн Прокопенко туттуммута.
Дьыала сабылынна. Тоҕо?
Миниистир тоҕо туттуммута билигин өйдөннө – дьыала сабыллыыга барбыт эбит. “Тоҕо?” диэн ыйытыыга СӨ ИДьМ-тын миниистирин солбуйааччы -- Силиэстийэлиир управление начальнига, юстиция полковнига Николай Мамчур биһиги хаһыаппытыгар бу курдук хоруйдаата:
-- Березкин Эрнст Борисовичка РФ Холуобунай кодексатын 264-с ыст. 3-с чааһынан, ол эбэтэр, суол быраабылатын кэһэн, сэрэҕэ суохтан киһини өлүүгэ тиэрдии бэлиэтэ баарынан тэриллибит 75255 №-дээх холуобунай дьыала (ол аата быһылаан чахчытынан буолбакка, чопчу Березкиҥҥа тэриллибит – В.М.) бу дьыл от ыйын 15 күнүгэр сабылынна (миниистир пресс-конференцията от ыйын бүтүүтүгэр буолбута – В.М.).
РФ Холуобунай-процессуальнай кодексатын 27-с ыст. 1 чааһын 3-с пуунугар (амнистия аактатын түмүгэр) олоҕуран. РФ Госдуматын 2015 сыл муус устар 24 күнүнээҕи 6576-6ГД №-дээх “Улуу Кыайыы 70 сылынан амнистияны биллэрии” уурааҕар сөп түбэһиннэрэн. Бу уураахха олоҕуран, 5 сылга диэри болдьоххо көҥүлү быһыы накаастабыллаах, сэрэҕэ суохтан оҥоһуллубут буруйдар уорбаланааччыларын уонна буруйданааччыларын барыллааһын силиэстийэҕэ сылдьар холуобунай дьыалалара сабыллаллар.
“Олунньу 7 күнэ – биһиги ыалга хара күн”
Ити олус хомолтолоох суол быһылаанын содулугар ыал тапталлаах аҕата, 30.05.1985 с. төрүөх Иванов Петр Петрович суорума суолламмыта. Кини 6 саастаах уолчаана, 5 саастаах кыысчаана аҕата суох хааллылар. Биһиги өлүөхсүт огдообото Вера Иванованы кытта сибээстэһэ сырыттыбыт. Кини санаатын бу курдук үллэһиннэ:
- Холуобунай дьыаланы тэрийэри аккаастыыр туһунан бастакы уурааҕы Горнайдааҕы полиция силиэдэбэтэлэ Сергей Рожин кулун тутар 10 күнүгэр таһаарбыта. Олунньу 9 күнүгэр, түүн 01.05 мүн. быһылаан буолбут сирин көрүү-үөрэтии иккис боротокуолун толорбуттар. Ол кэмҥэ биһиги дьоммут (туоһулар) Дьокуускай куоракка барбыттара. Ол иккис боротокуолу толорууга Рожины кытта Березкин адвокатынаан сылдьыбыттар.
Онно “экспериментальное действие по определению видимости конкретного препятствия” диэн ,ол эбэтэр, массыынаны төһө ыраахтан көрбүтүн бэрэбиэркэлиир дьайыы оҥороллоругар, биһиэхэ эппэтэхтэрэ. Эксперимент буолбутун кэнниттэн биирдэ билбиппит. Силиэдэбэтэл Рожин “эһигини ыҥырар эбээһинэспит суох -- сылдьыаххытын да сөп, сылдьымыаххытын да сөп” диэн быһаарбыта. Ыҥырбыта буоллар, онно кыттыахтаах этибит буоллаҕа.
Ол эксперимент кэмигэр УАЗ массыынаны туруоран, уруулга Березкины бэйэтин олордон, Бүлүү өттүттэн чааска 10 км түргэннээх кэлэр гына оҥорон көрбүттэр. Дьиҥэр, уруулга атын киһи олоруохтаах. Онно киниэхэ кумахтаах мөһөөччүгү туттарбыттар, УАЗ массыынаны көрдөҕүнэ, ол мөһөөччүгүн ыһыктыахтаах. Онтукайа 17 миэтэрэттэн көрбүт курдук тахсан кэлбит. ИДьМ Силиэстийэлиир управлениетын уурааҕар ити барыта киирэ сылдьар. Ити эксперимент түмүгүнэн дьыаланы тэрийэри аккаастаабыттара.
Адвокаппыт ити эксперимент түмүгэр сөпсөспөккө, Хабаровскайга иккистээн ситуационнай экспертиза ыыттарарга хадатаайыстыба түһэрбитэ. Ону ылынан, экспертиза иккистээн ыытыллан, Березкин УАЗ массыынаны 49 миэтэрэттэн көрбүт диэн быһаарыы тахсыбыт. Түгэнинэн туһанан, СӨ ИДьМ-тын Силиэстийэлиир управлениетыгар махталбытын биллэрэбит, -- хадатаайыстыбаны ылынан, экспертизаны иккистээн ыыттарбытыгар.
...Кэргэним өлбүтүн кэнниттэн Эрнст Березкин биһиэхэ кэлэ сылдьыбыта. Бырастыы гыннарар тыллары эппэтэҕэ. Тута “миэхэ харчым суох, миигин баай курдук санаамаҥ” диэн саҥалаах киирбитэ. Үлэтинэн уустуктар баалларын, баайа-мала суоҕун этиммитэ. Биһиги кинииттэн харчы түүрэйдиирбит курдук. Аҕыйах мүнүүтэ киирэн тахсыбыта.
Адвокаппыт этэринэн, дьыала сабыллыбытын хайдах даҕаны ааһынар кыахпыт суох үһү. Гражданскай иискэ эрэ быһыытынан ирдэһэр кыахтаахпыт. Хайдах оннугуй?! Кэргэним өлүүтүгэр буруйдаах киһи оччотугар накаастаммакка хаалар дуо?! Биһиги санаабытыгар, дьыала хара маҥнайгыттан итинник тосхолломмута. Манна даҕатан эттэххэ, силиэстийэ Березкин суол быһылааныгар буруйдааҕын быһаарбыта.
Олунньу 7 күнэ – биһиги дьиэ кэргэҥҥэ хара күн – тапталлаах кэргэн, кыһамньылаах аҕа Петр Иванов суох буолбута... Билигин да итэҕэйбэппит... Кини Бүлүү улууһун Халбаакы нэһилиэгэр элбэх оҕолоох ыалга үһүс оҕонон төрөөбүтэ. 5 сааһыттан Петяны түөтэтэ ииппитэ. Ыарахан үлэттэн чаҕыйбат этэ, иллэҥ кэмигэр бултуурун сөбүлүүрэ, элбэх доҕоттордооҕо. 2003 с-ха оскуоланы бүтэрэн, Бүлүүтээҕи педколледжка үөрэнэ киирбитэ. Амур уобалаһыгар армияҕа сулууспалаабыта.
Биһиги 2005 сыллаахха устудьуоннуу сылдьан билсибиппит. Армияттан кэлбитин кэнниттэн холбоспуппут. Икки оҕолоох дьоллоох ыал этибит. Саҥа дьыл саҕана Петяҕа тулаайаҕын быһыытынан Бүлүү куоракка квартира биэрбиттэригэр, дьиэ күлүүһүн туппутунан, хайдахкурдук дьоллонон кэлбитэ харахпар бу баар... Үөрүү бөҕөтө буолбуппут... Оҕолоругар “саамай сүрүнэ – сомоҕолоһуулаах буолуу” диэн этэрэ.
Петям биэс сыллааҕыта ДьТХА зоотехник идэтигэр үөрэнэ киирбитэ, төрөөбүт улууһугар тыа хаһаайыстыбатын өрө көтөҕөр күүстээх баҕалааҕа. Ол күн кини эдэр фермердэр куурустарыгар айаннаабыта... Олоҕор элбэх былааннааҕа...
Комментарии
Авторизация на сайте через социальные сети