– Биһиги өрөспүүбүлүкэбититтэн үгүс киһи Россия тас өттүгэр медицинскэй көмөнү ылар кыахтаах. Саха сирин дьоно Соҕуруу Корея, Израиль, Германия уо.д.а. дойдулар медицинскэй клиникаларыгар баран эмтэнэр. Россияҕа эмтэнээччилэргэ быстах кэмҥэ үлэлээбэт туһунан больничнай лииһи ылар туһунан боппуруостар турбаттар. Оттон омук клиникаларыгар эмтэммити хайдах бигэргэтиэххэ сөбүй?
Больничнай лиистэр Россия Доруобуйа харыстабылын уонна социальнай сайдыы министиэристибэтин 2011 с. бэс ыйын 29 күнүнээҕи бирикээһинэн бэриллэллэр. Бу бирикээс 7-с пууна этэринэн, «гражданнар кыраныысса таһыгар сылдьар кэмнэригэр быстах кэмҥэ үлэлиир кыахтан тахсыбыттарын бигэргэтэр докумуоннар (эмтиир тэрилтэ быраастарын хамыыһыйатын быһаарыытынан) РФ больничнай лииһигэр уларатыллыахтарын сөп». Ол эбэтэр омук медицинскэй докумуоннарын больничнайга уларытыахха сөп. Онуоха маннык усулуобуйалар толоруллуохтаахтар:
1. Омук клиникаларыгар бэриллибит медицинскэй докумуоннар туһааннаах бэрээдэгинэн легализацияны (докумуон дьиҥнээҕин уонна юридическай күүһүн бигэргэтии) ааспыт буолуохтаахтар .
2. Докумуон суруктара ыарыһах быстах кэмҥэ үлэлиир кыаҕа суоҕун бигэргэтиэхтээхтэр.
Ыарыһахтарга уонна эмп үлэһиттэригэр «Докумуоннары легализированнай уларытыы диэн тугуй?» диэн боппуруос куруук үөскүүр.
Омук докумуонун киэҥник тарҕаммыт икки ньыманан – консульскай легализациянан эбэтэр апостиль туруоруунан бигэргэтиэххэ сөп.
Консульскай легализация – докумуоҥҥа илии баттааһын, бэчээт эбэтэр штамп кырдьыктаахтарын бэрэбиэркэлиир процедура. Консульскай легализация бэрээдэгин Омуктар дьыалаларыгар министиэристибэ олохтуур.
Омук докумуоннара больничнай лиис бэриллибит судаарыстыба сиригэр-уотугар эбэтэр Россияҕа бэйэтигэр легализацияланыахтарын сөп.
Бастакы түбэлтэҕэ докумуону бастаан Омуктар дьыалаларыгар министиэристибэҕэ эбэтэр атын боломуочуйалаах уоргаҥҥа туоһулатыллар, онтон бу судаарыстыбаҕа РФ консульскай тэрилтэтигэр легализацияланар. Иккис түбэлтэҕэ омук докумуона бастаан эмтэммит судаарыстыбатын дипломатическай бэрэстэбиитэлистибэтигэр эбэтэр консульскай тэрилтэтигэр бигэргэтиллэр, онтон Россия Омуктар дьыыалаларыгар министириэстибэтин консульскай сулууспатын департаменыгар легализацияланар.
Бу барыта 3 күн иһигэр оҥоһуллуохтаах. Консульскай департамен оҥорор процедуратын иһин нолуок ылар.
1961 сыллааҕы Гаагскай конвенция кыттыылаах дойдулар клиникалара биэрбит докумуоннарын РФ докумуонугар уларытарга консульскай легализациялааһын ирдэниллибэт. Холобур, Израильга, Турцияҕа, Германияҕа, Францияҕа, Кытайга, Соҕуруу Кореяҕа уо.д.а. дойдуларга. Ол эбэтэр апостиль туруорулуннаҕына да сөп буолар. Бу – докумуоннары легализациялааһын иккис ньымата.
Апостиль – омук судаарыстыбатын боломуочуйалаах уоргана (магистрат, Омуктар дьыалаларыгар министиэристибэ, Юстиция министиэристибэтэ) туруорар анал бэлиэтэ.
Штамп квадрат быһыылаах уонна французтуу APOSTILLE диэн суруктаах.
Апостилы туруорарга судаарыстыбаннай уорганнар эбэтэр боломуочуйалаахтар хас биирдии судаарыстыба сиригэр-уотугар олохтоммут судаарыстыбаннай нолуогу ылаллар.
Больничнай лиис СНГ дойдуларыгар (Армения, Беларусь, Казахстан, Кыргыз, Молдова, Таджикистан, Туркменистан, Узбекистан, Украина өрөспүүбүлүкэлэрэ, Россия Федерацията) бэриллибит буоллаҕына, легализация да, апостилы туруоруу да наадалара суохтар. Арай омук судаарыстыбатын тылынан суруллубут докумуону нуучча тылыгар тылбаастааһын нотариуһунан бигэргэтиллибитэ ирдэниллиэн сөп.
Россия больничнай лииһин биэрэр туһунан бүтэһиктээх быһаарыыны ыарыһах олорор сиринэн эмтиир тэрилтэтин быраастарын хамыыһыйата ылынар.
Комментарии
Авторизация на сайте через социальные сети