- Оҕунан ытыыга бастакы хардыыларын Бүлүү улууһун 3 №-дээх спортивнай оскуолатын Бөтүҥнээҕи филиалыгар оҥорбут оҕунан ытыы спордун маастарыгар кандидаттар Валя Евдокимова, Борис Кириллин, спорт маастара Филипп Соловьев соторутааҕыта ыытыллыбыт Россия эдэрдэргэ чемпионатыгар ситиһиилээхтик кыттан кэллилэр.
- Валя Евдокимова тыҥааһыннаах киирсиигэ тулуурдааҕын, кытаанаҕын көрдөрөн Россия чемпионатын иккис призера буолла уонна Россия сүүмэрдэммит хамаандатыгар киллэрилиннэ. Уолаттар Филипп Соловьев уонна Борис Кириллин бэрт эрийсиилээх киирсиигэ Россия эдэрдэргэ чемпионатыгар төрдүс миэстэҕэ тахсыбыттарын эмиэ ситиһии быһыытынан сыаналыахха сөп.
- Бүлүү улууһуттан Саха сирин, Россия таһымыгар элбэх эдэр охчут ситиһиилээхтик кыттарыгар олук уурсар тренер, энтузиаст, спорт уустук көрүҥэр бэриниилээхтик ылсан оҕолору эрчийэр Егор Егорович Соловьевка, оҕунан ытыыны өйөөн бары усулуобуйаны тэрийэр Бөкчөҥөө нэһилиэгин баһылыгар, оҕунан ытыы спордун улуустааҕы федерациятын салайааччыта И.И.Евсеевкэ бу көрсүһүүгэ элбэх махтал тыллара этилиннилэр.
- Эдэр спортсменнар бары Бөтүҥтэн төрүттээхтэрэ 3 №-дээх спортивнай оскуола Бөтүҥнээҕи оҕунан ытыыга филиала бэрт ситиһиилээхтик үлэлиирин туоһута буолар. Кыһынын Бөтүҥҥэ республика эдэр күүстэх охчуттара мустан эрчиллэр, күрэхтэһэр үгэстэрэ олохтонно, оҕолор Бөтүҥтэн сылдьан элбэх күрэхтэһиилэргэ кытталлар.
- Көрсүһүүгэ улуус дьаһалтатын баһылыга С.Н.Винокуров, спорткомитет салайааччыта Г.С.Евсеев, Бөкчөҥөө нэһилиэгин дьаһалтатын баһылыга И.И.Евсеев, спорт ветерана Ф.Ф.Павлов, үөрэх управлениетын салайааччы М.Н.Куличкина, 3 №-дээх спортивнай оскуола директорын солбуйааччы М.Н.Лебедева, Бөтүҥ оскуолатын учуутала С.И.Иванова эдэр спортсменнарга туһаайан элбэх үтүө тыллары, баҕа санааны, өйөбүл оҥоһуллуоҕун эттилэр, алгыс тылларын анатылар, сэмэй бэлэхтэрин туттардылар.
- Борис Кириллин бу күрэхтэһиигэ саҥа ытыллыбатах оҕунан кыттан, уопута тиийбэккэ, үс бастакы миэстэ иһигэр киирбэккэ хаалла эрээри, спорт маастарыгар кандидатынан буолла.
- Россия чемпионатын призера Валя Евдокимова күрэхтэһиигэ кыттыытын бу курдук кэпсээтэ:
- - Бастатан туран, тренербэр Егор Егоровичка уонна барыгытыгар махтанабын. УОР-га үөрэнэбин, 2014 сылтан күрэхтэһиилэргэ миэстэлэһэн барбытым, үөрэхтэригэр кыһаллар оҕолор күрэхтэһиилэргэ ситиһиилэнэллэр эбит диэн түмүккэ кэллим.
- Күрэхтэһиигэ 50-60-70 м ыраахтан ыппыппыт, бастакы күн түмүгүнэн 19 миэстэҕэ сылдьыбытым. Иккис күҥҥэ туох баар санаабын түмэн, иккилии буолан ытыыга ардах, тыал түһэр кэмигэр утарсааччыларбын бэрт кыранан - 6:4, 6:5 хотуталаабытым, бүтэһик оноҕос быһаарыылаах буолбута. Финалга долгуйан хаалан Бурятия спортсменкатыгар хоттордум, тыала да күүһэ бэрт этэ.
- Эдэр спортсменнарга өссө үрдүк ситиһиилэри, уустук спорт чыпчаалларын дабайалларын, улуустарын үрдүк таһымнаах күрэхтэһиилэргэ ааттата туралларыгар баҕарыаҕыҥ!
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети