Күннэр чэрчилэринэн араас тэрээһиннэр буоллулар. Биһиги маастар кылаастар тустарынан сырдатыахпытын баҕарабыт. Сайылыктааҕы Оҕо айымньытын дьиэтигэр (салайааччы Левчикова М. В.) төрүт иискэ, түүлээхтэн тигиигэ, кылынан-сиэлинэн өрүүгэ, кумааҕынан кырыйыыга, ону тэҥэ үҥкүүгэ маастар кылаастар тиһигин быспакка буоллулар. Ол курдук, аан дойдуга саха омук төрүт ииһин тарҕатар, Бүтүн Россиятааҕы “Душа России” РФ Президенин төрүт иискэ лауреата, киэн туттар киһибит Ольга Гуляева үөрэттэ, уһуйда.
Иис абылаҥар ылларбыттар, иистэниэн баҕалаахтар элбэҕи истэн, үөрэнэн махталлара үгүс. Бу төрүт иискэ маастар кылаас түмүгүнэн нэһилиэккэ «Сайылык кустуга» диэн түмсүү тэрилиннэ.
«Кыптыый тойуга» диэн альбом-кинигэ автора, кумааҕынан кырыйыы кистэлэҥнэрин, ону тэҥэ ол кырыллыбыт кумааҕынан дьүһүйүүнү биирдиилээн баҕалаах дьоҥҥо Татьяна Никифорова -Тайаана кэпсээтэ. Баҕадьаҕа сылдьан айымньылаахтык үлэлээтэ, “1-кы Лүүчүн нэһилиэгэ” МТ дьаһалтатын дьиэтигэр аналлаах дьүһүйүүтүн бэлэхтээтэ. Сырыыта туһалаах, соргулаах буолла, ол курдук II Лүүчүн нэһилиэгэр аймах -билэ дьонун булан, атах тэпсэн олорон сэһэргэһэн, ирэ-хоро кэпсэтэн дуоһуйда, астынна.
Дьокуускай куоракка баар түүлээх ииһинэн дьарыктанар «Дайаана» ателье хаһаайката Прасковья Обутова маастар кылаас ыытта. Бэйэтэ тикпит таҥастарын көрдөрдө, үтүлүк тигиитигэр үөрэттэ. Дьон ким тугу тиктиэн баҕарарын илдьэ кэлэн тэҥҥэ быһан, сүбэлэтэн олус астынна, санаатын ситистэ.
Кылынан-сиэлинэн өрүү ньымаларыгар дьон-сэргэ тиһигин быспакка сырытта. Кылтан утаҕынан өрүүнү, сиэлинэн таҥастаан хатыыга бэйэтин кистэлэҥин Ирина Каратаева үллэһиннэ.
Үҥкүүнү олоҕун аргыһа оҥостубут, РФ, СӨ култууратын үтүөлээх үлэһитэ Афанасий Афанасьев тэрийбит маастар кылааһыгар үҥкүүнү сэҥээрээччилэр үөрэ-көтө сырыттылар.
Ити курдук, үс нэһилиэк сомоҕолоһон ыыппыт Биир дойдулаахтарбыт күннэрэ үрдүк таһымнаахтык ааста.
Комментарии
Авторизация на сайте через социальные сети