ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
10 июня 2015, 16:52

Улуустар Томпоҕо буолар республикатааҕы Ыччат ыһыаҕар бэлэмнэнэллэр


Томпо улууһун хаһыатыгар уонна сайтыгар Мэҥэ-Алдан сэлиэнньэтигэр ыытыллар Ыччат ыһыаҕар олохтоохтор бэйэбит уонна Саха сирин ыччата хайдах бэлэмнэнэ сылдьалларын туһунан кэпсиир рубрика аспытым. Онно ыкса ыалларбыт өймөкөөннөр уонна 2008 сыллаахха бэһис ыһыаҕы ыыппыт уус-алданнар сонуннарын ыыттылар.
Өймөкөөннөр ох курдук оҥосто сылдьаллар
2015 с. ыытыллар Ыччат ыһыаҕар Өймөкөөн оройуонун бэрэстэбиитэллэрэ хайдах бэлэмнэнэллэрин туһунан улуус дьаһалтатын ыччакка уонна дьиэ кэргэн политикатыгар отделын сүрүн специалиһа Станислав Григорьев кэпсээтэ:
- Ыччат ыһыаҕар Өймөкөөн улууһуттан барыахтаах хамаанда бүгүҥҥү күннээххэ сүнньүнэн сүүмэрдэннэ. Хамаандаҕа оройуон бары нэһилиэктэриттэн эдэр специалистар, устудьуоннар уонна үлэлиир ыччат киирдилэр. Бүтэһиктээх састаап бэс ыйын ортотугар быһаарыллыаҕа. Официальнай бэрэстэбиитэллэри уонна муниципалитет салалтатын киллэрэн туран, хамаандаҕа отучча киһи баар буолуоҕа.
Ыһыах куонкурустарын программатын чэрчитинэн 12 зачеттаах куонкурус ыытыллар. Биһиги делегациябыт барытыгар кыттыыны ылыаҕа. Ааспыт тэрээһиннэргэ бэйэлэрин үлэлэринэн итэҕэли ылбыт ыччат холбоһуктарыгар ыһыахха бэлэмнэниигэ эппиэттээх дьон сыһыарылыннылар. Ол курдук, "Ыллык" (Сордоҥноох) уонна "Тэтим" (Өймөкөөн) ыччаттарын түмсүүлэрэ балаакка городуогун киэргэтиини бэйэлэригэр ыллылар. "Чыпчаал" (Томтор) КВН-ҥа уонна аныгы үҥкүүлэргэ кыттарга нүөмэрдэри бэлэмниэҕэ. "Чысхааннар" устудьуоннар түмсүүлэрэ кыттааччылары Дьокуускай куораттан Ыһыахха тэрийэн ыытарга эппиэттиир. Томтордооҕу норуодунай театр дириэктэрэ Татьяна Заболоцкая нэһилиэктэри аттаран туруорууга эппиэттиир. Ыччат отдела республикатааҕы Ыччат ыһыаҕар бэлэмнэниигэ уопсай салалтаны хааччыйар.
Ыччат бырааһынньыгар "Боотурдар оонньууларыгар" сүүмэрдиир тэрээһин ыытыллыаҕа. Томтор сэлиэнньэтигэр бэс ыйын 20 күнүгэр буолар күрэхтэһиигэ кыайбыт боотур спорт национальнай көрүҥнэригэр оройуоммут чиэһин көмүскүөҕэ.
Өймөкөөн улууһун хамаандата от ыйын 2 күнүгэр үс массыынанан Мэҥэ-Алдаҥҥа айанныаҕа. Биһиги онно Ыччат ыһыаҕа бүтүөр диэри сылдьыахпыт. Хас биирдии кыттар хамаандаҕа шефтээх нэһилиэктэр сыһыарыллыбыттар, биһиэхэ Теплай Ключ нэһилиэгэ сыһыарыллыбыт. Өймөкөөн оройуонун кыттыыта официальнай бэрэстэбиитэллэр эрэ кэлиилэринэн муҥурдаммат. Ыаллыы улууска ким барыта бэйэтэ тиийиэн сөп. Ыччат бырааһынньыгар ыалдьыттары күүтэбит!
Виталий Васильев, Өймөкөөн хаһыатын корреспондена.

Саха сирин ыччатын сомоҕолуур тэрээһин

Томпо оройуонун Мэҥэ-Алдан сэлиэнньэтигэр ыытыллар Ыччат ыһыаҕар Уус-Алдан улууһуттан уопсайа 30 киһи кыттыыны ылаары бэлэмнэнэ сылдьар. Делегацияны баһылыгы солбуйааччы Васильев Геннадий Анатольевич салайыаҕа. Быйылгы ыһыах олус сэргэх күрэстэринэн интэриэһиргэттэ. Холобура, спортинг күрэҕин биһиги, уус- алданнар, олус сэргээтибит.

Биһигиттэн ытыы күрэҕэр киэн туттар бэргэннэрбит кыттыыны ылаары бэлэмнэнэ сылдьаллар. Ыһыахха төһө кыахтаахпытынан, бэлэмнээхпитинэн харса суох киирсиэхпит уонна кыайыы чыпчаалыгар тахсыахпыт диэн баҕа санаалаахпыт.

Уопсайынан эттэххэ, бу тэрээһин Томпо оройуонугар ыытыллара саамай сөптөөх. Мэҥэ-Алдан курдук кэрэ айылҕалаах дойду аҕыйаҕа буолуо. Биһиги санаабытыгар Ыччат ыһыаҕа Саха сирин ыччата биир сомоҕо буоларыгар төһүү буолар уонна үүнэр көлүөнэ омукпут итэҕэлин, көрүүтүн салгыырыгар сүҥкэн улахан оруолу оонньуур.

Марианна Ордахова, Уус-Алдан улууһун ыччаты кытта үлэҕэ специалиһа.

 

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 786 Источник: ЯСИА Автор: Евдокия Неустроева Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ