Бу сырыыга ыам ыйыгар Катарга ыытыллыбыт Азия, Египеккэ буолбут Африка чемпионаттара, Грециятааҕы, Македониятааҕы норуоттар икки ардыларынааҕы турнирдар түмүктэрэ киллэрилиннилэр. Бу түһүлгэлэргэ кыайыыны ситиспит бөҕөстөр балаһыанньаларын лаппа тупсарылыннылар, сорохтор ааттара рейтиҥҥэ саҥа сурулунна.
Ыйааһыннарыгар сүүрбэ бастыҥ ортотугар киирбиттэр ортолоругар 29 Россия тустууга баар. Онтон 15 бөҕөс - Дагестан тустууга оскуолатын иитиллээччитэ. Саҥа классификацияттан Егор Пономарев (61 кг) уонна Алан Хугаев (125 кг) туоратылыннылар, ол оннугар Грецияҕа буолбут норуоттар икки ардыларынааҕы турнир кыайыылааҕа Заур Сидаков (65 кг) киллэрилиннэ.
UWW рейтинигэр Россия кэнниттэн иккис миэстэҕэ Иран турар (15 бөҕөс). АХШ уонна Азербайджан үһүс миэстэни үллэстэллэр (9-туу бөҕөс).
Омук бөҕөстөрүттэн Ян Къонг-Ил (КНДР, 57 кг), Саид Ахмад Мохаммади (Иран, 65 кг) уонна Таха Акгюль (Tурция, 125 кг) ыйааһыннарыгар бастыҥнарынан ааттаммыттар. Атыттарга Россия бөҕөстөрө чулууларынан билиниллибиттэр: Александр Богомоев (61 кг), Хетаг Цаболов (70 кг), Денис Царгуш (74 кг), Абдурашид Садулаев (86 кг), Абдусалам Гадисов (97 кг).
Саха тустууктарыттан 57 киилэлээхтэргэ Виктор Лебедевпит аата бэсиһинэн суруллубут. Кини кэнниттэн алтыһынан Россия өссө биир бөҕөһө Исмаил Мусукаев турар. Иван Ярыгин турнирын боруонса призера Ньургун Скрябин биир кэрдиис түспүт - 15-с буолбут. Кини кэнниттэн Артем Гебеков аата суруллубут. Киргизия аатыттан тустар Айаал Лазаревпыт Азия чемпионатыгар кыайыытынан 17-тэн 11 миэстэҕэ өрө тахсыбыт.
Комментарии
Авторизация на сайте через социальные сети