Ол чэрчитинэн, соторутааҕыта колледж директора Захар Никитин уонна СР Государственнай циркэтин директора Сергей Расторгуев Казахстаҥҥа Астана куоракка искусство национальнай университетыгар, Алма-Атаҕа эстрада-циркэ коллеһыгар уонна Национальнай искусство академиятыгар сылдьан үлэни-хамнаһы билсэн кэллилэр.
«Сүрүн сыалбыт-сорукпут - маннааҕы колледжка циркэ отделениетын арыйыыга туһаайылынна. Онуоха Кытай циркэтин оскуолатыгар үөрэнэн буспут-хаппыт оҕолор, бастакы хараҥаччылар, манна бэйэбит циркэбитигэр кэлэн салгыы үлэлээн-хамсаан улахан үөрүйэхтэннилэр. Аны билигин кинилэр билиилэрин-көрүүлэрин дойдубут ыччаттарыгар, үүнэр көлүөнэҕэ биэрэр кыахтаннылар диэн Сергей Васильевичтыын кэпсэппиппит, сүбэлэспиппит син балачча буолла.
Онон толкуйдаан, сирийэн көрөн-истэн, үөрэтэн бараммыт, сөптөөх кэм кэллэ диэн циркэ эйгэтигэр биир эмиэ олус күүстээх үлэлээҕинэн биллэр-көстөр Казахстаны талбыппыт. Онно тиийэн эрдэттэн үлэхтээх буоларбыт быһыытынан устудьуоннар үөрэхтэрин, дьарыктарын уу харахпытынан көрөн улаханнык сэргээтибит. Хас сылдьыбыт кыһабытыгар ректордары, преподавателлэри көрсөн атах тэпсэн олорон ирэ-хоро сэһэргэстибит, санааларбытын үллэһиннибит, ыйытыыларбытыгар толору хоруйдары ыллыбыт. Барытын ымпыктаан-чымпыктаан көрдүбүт-иһиттибит диэн үөрэбит.
Маныаха мин устудьуоннар 2-с, 3-с куурустан үлэлии-үлэлии үөрэнэллэрин сэргээтим. Итиэннэ, ыччаты ылар идэтигэр хара бастакыттан сыһыарар, практикаҕа ыытар үчүгэй түмүктэрдээҕэр итэҕэйдим. Сергей Васильевичтыын сыаллаах-соруктаах айаммыт табылынна. Ыкса сибээһи хардарыта тутуһан тиһиктээхтик үлэлииргэ, үөрүйэҕи атастаһарга олук уурулунна», -- диэн кэпсээтэ Захар Николаевич итиэннэ бу идэҕэ үөрэтэргэ көҥүл ыларга (лицензия) үлэ бара турарын иһитиннэрдэ.
Комментарии
Авторизация на сайте через социальные сети