Прораб Геннадий Степанов этэринэн, былырыын үлэ 60 % оҥорбуттар. Быйыл истиэнэ тас өттүн 15 см халыҥнаах ититэр матырыйаалынан бүрүйбүттэр, ол кэннэ профлиһинэн саппыттар, стеклопакет түннүктэри олордубуттар. Ис нарылыыр үлэлэр, буруустан оҥоһуллар быыстар, балконнары уонна кирилиэстэрин оҥоруу хаалбыттар. Ититэр тиһигин уонна сантехникатын таҥыыга 4 киһилээх биригээдэ үлэлиир, уотун-күөһүн тардыыга өссө биир биригээдэ үлэлиэҕэ.
Биһиги тиийиибитигэр муостаны тэлгии сылдьаллара. Бастаан хаптаһыҥҥа кутуйах, атын да харамай киирбэтин диэн тимир лиистэри уураллар, онтон 25 см халыҥнаах полистерол, 5 см халыҥнаах ититэр матырыйаал уураллар, ол үрдүгэр хаптаһын, фанера тэлгииллэр, ол кэнниттэн линолеум уураллар.
СИА корреспондена тутааччыллары кытта кэпсэттэ.
Михаил Кривошапкин: - Мин сүүрбэччэ сыл 1970 с. тутуллубут дьиэҕэ олоробун, билигин саахалланар туруктаах, муостата тымныы. Бэйэм ОДьКХ-ха водозаборга үлэлиибин. Былырыыҥҥыттан ыла бу дьиэлэр тутууларыгар кыттабын, маҥнайгы этээскэ квартира ылыахтаахпын. Үлэ хаачыстыбылаах буоларыгар кыһанабын, бэйэм олоруом буоллаҕа дии.
Валерий Варфоломеев: - Мин эмиэ былырыҥҥыттан үлэлиибин. Кэргэннээхпин, икки оҕолоохпун. Эргэ, көтүллэр дьиэҕэ олоробун. Испииһэк быһыытынан быйыл тутуута саҕаланар дьиэттэн квартира ылыахтаахпын.
Мэҥэ Алдаҥҥа бу дьиэлэри күһүөрү үлэҕэ киллэрэр былааннаахтар. Нэһилиэккэ быйыл өссө икки 12-лии квартиралаах дьиэ тутуутун саҕалыахтаахтар. Ол дьиэлэри 2016 с. ахсынньытыгар үлэҕэ киллэриэхтээхтэр.
Комментарии
Авторизация на сайте через социальные сети