Быйакыга саҥа хотон аһыллыытын үөрүүлээх түгэнэ
Соторутааҕыта ол хотон официальнай аһыллыыта буолбута. Онно тыа хаһаайыстыбатын миниистирэ Александр Артемьев сылдьыбыта. Тутууну бэйэлэрин күүстэринэн ыыппыттар. Прораб – Эдуард Осипов, күтүөттэрэ Григорий Осипов көмөлөспүттэр.Быйакылар Сунтаар нэһилиэгин баһылыгар Эдуард Филипповка, нэһилиэк тыатын хаһаайыстыбатын специалиһыгар Антонина Кириллинаҕа махталлара улахан.
"Мачыыстар" сүүстэн тахса сүөһүлээхтэр, 38 ынахтаахтар. Ыанньыктар уолбуттар, онон үүттэрэ аҕыйах. Ынахтарын оҕустарынан буоһаталлар. Сотору маассабай төрүөх саҕаланыа.
Улуустааҕы тыа хаһаайыстыбатын управлениетын көҕүлээһининэн Бордоҥтон аҕыс туҥуйу ыллылар. Онтуларын үс сылынан төннөрөргө дьулуһаллар. Сылгы туруга билиҥҥитэ этэҥҥэ. Убаһаларын араартыы сылдьаллар.
Быйыл Ананьевтар сүүсчэкэ тонна оту оттоотулар. Сороҕун кэбистилэр, сороҕун рулоннаатылар. Онон сүөһүлэрин кыстатар оттоохтор.
Мин Ананьевтар ийэлэрэ Марфа Данилованы көрүстүм. Кини: «Оҕолорум – урут биһиги холобурбутугар, такайыыбытынан улааппыт дьон. Билигин бэйэлэрэ сатабылларынан, уопуттарынан ньиргиччи үлэлииллэр. Ойоҕостон көмөтө суох оттоон-мастаан олороллор», – диир. Бу уруккута чулуу ыанньыксыт, Октябрьскай Революция, Бочуот Знага уордьаннар кавалердара этиитэ оруннаах. Оҕолорунан астынарын бэлиэтэ.
Улуус, өрөспүүбүлүкэ чулуу ыанньыксыта М.Н.Данилова
Марфа Николаевна санныгар 86-с хаарын түһэрдэр, иллэҥсийбэт. Оҕолоругар, сиэннэригэр күрүчүөгүнэн наскы баайар, чэйдэрин бэлэмниир. Таһыттан кыыһа Надежда Ананьева сибиэһэй хаһыаттары киллэрбитигэр, тута улууһун «Сунтаар сонуннара» хаһыатын ылла.
Дьэ, ити курдук, Ананьевтар дьиэ кэргэттэрэ күннээҕи түбүккэ, бүппэт дьарыкка сылдьаллар.
Комментарии
Авторизация на сайте через социальные сети