- Үлэ кэлэктииптэрэ үс ый устата ыытыллыбыт спартакиада эстафетатыгар ох курдук оҥостон кэлэн сырсан битигирэстилэр. Покровскай 1 №-дээх орто оскуолатын уонна оҕо спортивнай оскуолатын холбоһуктаах хамаандаларын сүүрүүгэ Виктор Громов инники кэлэн хамаандатын кыайыылаах оҥордо.
- Спартакиада түмүгүн кытта сүрүн судьуйа П.Д.Ефимов бу курдук билиһиннэрдэ:
- - Эстафетаҕа иккис миэстэҕэ улуус киин балыыһатын уонна «Сахатранснефтегаз» холбоһуктаах хамаандата таҕыста. Үһүс бочуоттаах миэстэни Спорт дыбарыаһа, «Хотой» оҕо спортивнай оскуолата уонна прокуратура хамаандалара ыллылар.
- Дьэ онон, кулун тутар ыйтан саҕалаан биатлон, волейбол (эр дьон, дьахталлар), мини-футбол, дуобат, саахымат, остуол тенниһэ, буулдьанан ытыы, дартс, эстафета, хабылык, хаамыска көрүҥнэринэн ыытыллыбыт спартакиада уопсай түмүгүнэн 42 ыстарааптыыр очколаах улуус киин балыыһатын уонна «Сахатранснефтегаз» холбоһуктаах хамаандата (капитан Александра Васильева) бастакы миэстэни ылла. Иккис миэстэ 46 очколаах Спорт дыбарыаһа, «Хотой» оҕо спортивнай оскуолата уонна прокуратура хамаандалара (капитан Дмитрий Федоров) таҕыста. Кинилэртэн сыччах биир очконан хаалан Покровскай 1-кы №-дээх орто оскуолатын уонна оҕо спортивнай оскуолатын холбоһуктаах хамаандалара (капитан Людмила Христофорова) үһүс буолла.
- Кыайыылаах уонна миэстэлэспит тэрилтэлэр хамаандалара спорт миниистирэ Михаил Гуляев илиититтэн кубоктары, харчынан сертификаттары туттулар.
- Спорт миниистирэ Михаил Гуляев спартакиада туһунан санаатын маннык үллэһиннэ:
- - Үгэскэ кубулуйбут үлэһиттэр спартакиадалара үһүс төгүлүн ыытылынна, бу олус үчүгэй. Бастакытынан, дьон-сэргэ бу күрэс сыл аайы ыытыллар буоллаҕына утумнаахтык физкултууранан, спордунан анаан дьарыктанар-эрчиллэр буолар. Иккиһинэн, кэлэктииптэр түмсэллэр, онон бу спартакиада сыала-соруга сүрдээх киэҥ. Убайым Дмитрий Дмитриевич аатынан ыытыллара биһигини олус долгутар. Мин тэрийээччилэргэ - улуус салалтатыгар, спорт салаатын бары үлэһиттэригэр убайым аатын үйэтитиигэ киэҥ өрүттээх үлэни ыыталларын иһин улахан махталбын тиэрдэбин!
- Покровскай олохтоохторо кыайыыга дьулуурдарынан үгэс буолбут күрэхтэһии олус интэриэһинэйдик, хатыһыылаахтык ааста.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети