«Сибиир күүһэ» гаас ситимин турбаларын тиэйии былааннаахтык ыытыллан, Осетрово пордуттан 250 устуука турбаны тиэммит МП-2602 суудуна айаҥҥа турунна. Оттон билигин МП-2582 баржа турбалары тиэнэ турар. Пароходство ууһуттара күн бүгүн Өлүөнэ, Алдан, Амма, Бүлүү өрүстэринэн флот 120 араас көрүҥүн үлэлэтэллэр.
Аммаҕа быйыл 41 тыһ. т таас чох тиэллиэхтээх. Бу күннэргэ Кыһыл Сыыртан гаас конденсатын суудуналарга хачайдааһын саҕаланан, туһааннаах уматык салгыы навигация иккис түһүмэҕэр ыраах хоту улуустарга тиэрдиллиэ.
Оттон “Сахаэнерго” ААУо пресс-сулууспата иһитиннэрбитинэн, энерго-хампаанньа хоту улуустары уматыгынан хааччыйыыга бэйэтин бюджетыттан быйыл 4 млрд 533 мөл. солк. аттарбыт. Уматык сыаната үрдээн, үбүлээһин кээмэйэ былырыыҥҥытааҕар төһө эмит улааппыт. Хампаанньа уу суолунан 110 тыһ. 840 т таһаҕаһы, ол иһигэр 84 тыһ. 40 т дизельнэй уматыгы, 4 тыһ. т ньиэби, 24 тыһ.т таас чоҕу тиэйиэхтээх. Бүгүҥҥү туругунан 8130 т дизельнэй уматык Өлүөхүмэ, Алдан, Кэбээйи улуустарыгар тириэрдиллибит.
“Сахаэнерго” ААУо оттугунан хааччыйыыга отделын салайааччы Сергей Куртуйаахап иһитиннэрбитинэн, хампаанньа «ВОСТЭК”, “Сургутнефтегаз” ААУо, “Ирэлээх-ньиэп» САУо, «Якутуголь” ААУо таас чоҕу, уматыгы, ньиэби атыыласпыт.
Комментарии
Авторизация на сайте через социальные сети