Дьаарбаҥкаҕа Бүлүүттэн биир, Ньурбаттан икки, Сунтаартан 10 тэрилтэ: үс агро-оскуола (Куокуну, Арыылаах, Бордоҥ), түөрт соҕотуопкалааччы (Табаҕа, Тускул, Хочо), үс хаһаайыстыба («Кириэстээх», «Силис», «Павлов» ИП) кытыннылар. Атыы-эргиэн хайдах барбытын туһунан улуустааҕы тыа хаһаайыстыбатын начальнигын солбуйааччы Надежда Корниловаттан ыйыталастым.
Икки күннээх дьаарбаҥкаҕа уопсайа бу 10 тэрилтэ 1 мөл. 45 тыһ. солк. суумалаах табаары атыылаабыт. Надежда Иосифовна дьаарбаҥка бэркэ тэриллибитин, ырыынакка атыылыыр миэстэ босхо бэриллибитин, үрдүгэр ветеринарнай лаборатория баара үчүгэйин, элбэх сүүйүүлээх лотерея тэриллибитин, кэнсиэр буолбутун, ньурбалар хайахтан түөрт араас аһы астаабыттарын, биһиги үүт аспыт бородууксуйата, ордук арыыбыт уонна сүөгэйбит, иэдьэгэйбит хаачыстыбата үчүгэйин уонна сыаната удамырын Мииринэй дьоно биһирээбиттэрин, агро-оскуолалар сүрдээхтик тэринэн тиийбиттэрин уонна “Хочо” МУТ үүт аһын мииринэйдэр билэрдии ордук атыылаһалларын астынан бэлиэтээтэ.
Дьаарбаҥканы үөрүүлээхтик сабыыга тэрийээччилэр номинациялары, дипломнары, сертификаттары туттартаабыттар. Бордоҥ агро-оскуолата 7 тыһыынчалаах бириэмийэнэн наҕараадаламмыт. Куокуну уонна Арыылаах агро-оскуолалара эмиэ номинацияларынан бэлиэтэммиттэр. Онон Мииринэйдээҕи ХI-с дьаарбаҥкаҕа сунтаардар ситиһиилээхтик кытынныбыт.
Салгыы кэпсэтиигэ Надежда Иосифовна Сунтаар ырыынагар атыылааччылары көҕүлүүр сыалтан босхо миэстэ биэрэр наадатын эттэ уонна ветеринарнай лаборатория тэрийэр сөптөөҕөр тохтоото.
Комментарии
Авторизация на сайте через социальные сети