Кини үлэтэ сарсыарда 8 ч. уу сылытыытыттан саҕаланар. Онтон 9 чааска тиэстэтин охсор, 10 ч. хас биирдии буулкатын ыйыы-ыйыы килиэп буҺарар иҺиттэригэр тарҕатар. 1 ч. оҺоххо угар. Ол быыҺыгар форма оҕунуохтанар. Ити курдук 4 ч. килиэбэ буҺан, дьиэ-уот сууйуллан, улахан үлэтэ бүтэр. Онтон аны 5 ч. килиэбин атыылыыр. КиэҺэ 7 ч. дьиэтин дьэ булар. Манан да кини үлэтин күнэ түмүктэммэт. Аны олох киэҺэ 11 ч. опара охсоро хаалар. Биллэн турар, ханнык баҕарар үлэ араас ыарахаттардаах, туспа уратылаах. Ол эрээри 28 сыл устата хас күн аайы биир үлэни толорор бука сылаалаах буолуо ээ.
Ити курдук, 28 сыл устата Тимофеева Екатерина Семеновна харыс да халбарыйбакка биэкэрдиир. Үлэтин Никулина Елена Николаевнаттан туппута. Бу сыллар усталарыгар кинини кытта Никулина М. Г., Сорокоумова М. В., Захарченко диэн нуучча дьахтара, Стручкова Г. Н., Андросова Л. П., Сорокоумова Н. К., Ефимова К. Г., Соломова Т. Н., Соломова А. Н., Данилова М. А., Томская Д. П., Полушкина В. Ф., Ильина Т. А. үлэлээбиттэрэ.
2011 сылтан МУБ “Абыйторг” эстэн, урбаанньыт буолан, “Тимофеева” МП тэриммитэ. Күҥҥэ ортотутан 80 килиэби буҺарар. Ол аата ыйга 1700 устуука, отто сылга – 22-23 тонна буолар. Маны таҺынан булочка, бэрэски араастарын, самса, пицца, тиэстэҕэ эриллибит сосиска, батон, рогалик, бэчиэнньэ буҺарар. Маннык эбии ас буҺарар эрэ буоллаҕына дохуоттаныан сөп, оттон аҥаардас килиэпкэ бурдугун, доруоҺатын эрэ уйунар. Билигин килиэбин сыаната 45 солк, оттон бурдук сыаната сылтан-сыл ыараан иҺэр.
Бу буҺарар астарыгар туттаары былырыыҥҥыттан саҕалаан оҕуруотун кэҥэттэр. 2 тэпэлииссэ туттарда. Онно уктарынан аахтахха 40 оҕурсу, 60 помидор, 40 перец үүннэрэр. Оҕуруотугар хортуоска, моркуоп, хаппыыста таҺынан земляника, клубника үүннэрэн боруобалыыр. Киниэхэ ордук табыллан хаппыыста үүнэр. Үүнүүтүттэн 80 бааҥканы кэнсиэрбэлээтэ, ону таҺынан кырбаан тоҥорунна. Маны барытын пиццатыгар, бэрэскитигэр туттар.
Сайыҥҥы кэмҥэ ынахтаах буолан, сарсыарда 4 чааска туран үлэтин-сырыытын бүтэрэн баран, оттуу барар. СүөҺүлэрин-астарын балта Наташа көрөр. “Арай бу үлэҕиттэн тохтууруҥ буоллар тугунан дьарыктаныаҥ этэй?” диэн ыйыппыппар толкуйдаабакка да сонно “СүөҺү ииттиэм этэ” диир. Оттон күҺүҥҥү кэмҥэ отонноон, оҕуруотугар эбэригэр буор, саах хааланан, эбии үлэлээх буолар.
Кэргэнэ Гурий Тимофеевич Тулагыттан төрүттээх. Кини сатаабата диэн суох. Ордук уҺанарын сөбүлүүр. Элбэх киҺи дьиэ туттарыгар көмөлөстө. ЭҺиил бэйэтигэр дьиэ туттаары маҺын кэрдэн, киллэрэн сытыарар. Иллэҥ кэмигэр тыаҕа сылдьарын сөбүлүүр, кыралаан илимнэнэр. Соҕотох кыыстара Алена билигин Дьокуускай куоракка технологическай колледжка үөрэнэр.
“БиҺиги 49 сыл устата 1 күрүө иҺигэр кэриэтэ олоробут. Ол тухары эбиэппит аҺын быҺаҕастаҺан, сонун аҺы бэрсиҺэн, бэйэ-бэйэбитигэр көмөлөсүҺэн олоробут. Катя сүрдээх үлэҺит, наҺаа эппиэтинэстээх. НэҺилиэгин дьонун барытын сымнаҕас, туспа сыттаах килиэбинэн аҺатарынан киэн туттабын, үөрэбин. Тулаайах хаалан баран, 9 бииргэ төрөөбүттэрин барыларын көрөн-истэн киҺи гынна. Кинилэри төрөппүт оҕолорбуттан итэҕэс санаабаппын”, – диир ыкса ыала Реброва Александра Семеновна.
Комментарии
Авторизация на сайте через социальные сети