Ол курдук үгүс ыарыыга, чуолаан, артериальнай гипертонияҕа, сүрэх ишемическэй ыарыытыгар, сахарнай диабекка, остеохондрозка, остеопорозка, остеоартрозка туһалааҕа биллэр. Скандинавскай хаамыы эт-сиин былчыҥнарын 90%-ын эрчийэр. Уҥуох-сүһүөх ыарыытын мүлүрүтэр. Киһи таһаата, моонньо, санна көнөрүгэр, имигэс буоларыгар үчүгэй түмүгү биэрэр. Хаалыктаах хаамыы киһи доруобуйатыгар туһалааҕа итинэн эрэ бүппэт. Киһи күнү быһа эрчимнээхтик сылдьар, сэргэхсийэр, настарыанньата көнөр.
Скандинавскай хаамыы киһи хас километры хаампытынан буолбакка, төһө бириэмэҕэ сылдьыбытынан ааҕыллар. Ол курдук аан бастаан дьарыктанар дьон 5 мүнүүтэ хаамыахтаахтаахтар. Итини таһынан хаамыы быыһыгар туспа анал эрчиллиилэри оҥоруохтаахтар.
Скандинавскай хаамыыны Саха сиригэр бастакы сертифицированнай инструктор, маассабай спорду тарҕатыы управлениетын тутаах специалиһа Айталина Третьякова ылсан, республика улуустарын кэрийэ сылдьан тарҕатар, пропагандалыыр, эрчийэр. Оттон спорт бу көрүҥэр Россияҕа Санкт-Петербурдааҕы П.Ф. Лесгафт аатынан физкультура, спорт уонна доруобуйа государственнай университетын доцена, медицинскэй наука кандидата Андрей Волков үлэлиир, дьону көҕүтэр уонна уһуйар. Кини Россияҕа скандинавскай хаамыыны үөрэтии программатын бастакы автора буолар. А. Волков суруйбут «Скандинавская северная ходьба» диэн кинигэтин үгүс киһи туһанар.
Биһиги Муомабытыгар аҕыйах сылтан бэттэх скандинавскай хаамыынан Арчы дьиэҕэ олохсуйбут «Алгыс» кулууп ветераннара дьарыктаналлар. Кинилэри спорт бу көрүҥүнэн оҕо айар дьиэтин үлэһитэ Веронина Тарабукина дьарыктыыр. Кини бу курдук кэпсиир: «Хаалыктаах хаамыынан 2014 сыл ыам ыйыттан дьарыктанан барбыппыт. Бу түмсүүбүтүгэр баҕалаах дьон сылдьаллар. Нэдиэлэҕэ биирдэ-иккитэ көрсөбүт. Бу хаамыы үс түһүмэхтэн турар. Бастакынан, хаамыах иннинэ, итийии, эти-сиини уһугуннарыы эрчиллиилэрин оҥоробут. Иккиһинэн, хаамабыт. Үсүһүнэн, хааман бүттэхпитинэ, былчыҥнарбытын сынньатан анал эрчиллиилэри толоробут. Сааһырбыт дьону скандинавскай хаамыыга үөрэтэрбэр Арчы дьиэтин директора, СР культуратын туйгуна Ирина Николаевна Слепцова төһүү күүс буоларыттан киниэхэ дириҥник махтанабын».
Итини таһынан Хонуу бөһүөлэгин ветераннара күннэтэ сарсыарда аайы ыһыахтыыр пааркаҕа хаалыктаах баран хаамаллар уонна күнү быһа чэбдиктик тутта сылдьаллар. Кинилэр бу дьарык доруобуйаларыгар туһалааҕын эттэринэн-хааннарынан, өйдөрүнэн-санааларынан билэллэр. Муома оройуонун нэһилиэктэриттэн Буор Сыһыыга, Чуумпу Кытылга эмиэ саастаах дьон, үксэ дьахталлар скандинавскайдыы хааман доруобуйаларын тупсарыналлар, ыччат дьоҥҥо холобур буолаллар. Арыый бытааннык да буоллар, скандинавскай хаамыы Муомаҕа киирэр, нэһилиэнньэ бары араҥатын болҕомтотун ылар.
Комментарии
Авторизация на сайте через социальные сети