«Социальнай, культура уонна информация киинэ» диэн нэһилиэк олоҕор сүрүн тутуу буолар аналламмыт дьиэ аһыллыытыгар киирии лиэнтэни киин директора Матрена Сыромятникова, культура министрэ Владимир Тихонов, «Мин Сахам сирэ XXI үйэҕэ» хамсааһын салайааччыта Иван Софронов, улуус урукку баһылыга, республика счетнай палаататын аудитора, Мэҥэ-Хаҥалас улууһуттан төрүттээхтэр академик В.П.Ларионов аатынан «Дойду ситимэ» общественнай түмсүүлэрин лидерэ Владимир Птицын, тутуу кылаабынай бэдэрээтчитэ ‒ «Стройкомплектсервис» ХЭТ гендиректора Руслан Трофимов, улуус баһылыгын бастакы солбуйааччы Павел Сазонов, нэһилиэк баһылыга Владимир Шарин быстылар. Үөрүүлээх быһыыга-майгыга Киин символическай күлүүһүн Руслан Трофимов Матрена Сыромятниковаҕа туттарда.
‒ Быйыл республикаҕа «Үтүө дьыала» хамсааһын сүнньүнэн барыта 109 объект үлэҕэ киллэриллиэхтээҕиттэн 18-һа Культура дьиэтэ буолар, ‒ диэтэ Иван Софронов. ‒ Бу нэһилиэккэ культураҕа сыһыаннаах иккис тутуу аһыллыыта. Бастакы ‒ музей этэ. Культура дьиэтэ, хайаан да, тас көстүүтэ уратылаах, сахалыы тыыны көрдөрөр буолуохтаах диэн өйдөбүллээхпин, ол иһин, «Үтүө дьыаланан» тутуллар Культура дьиэлэрин оннук моһуоннуу сатыыбыт: үрдүгэр ураһалаан, төрүт ытык инструмеммытын хомуһу олордон. Саха сиригэр төрдүс, улуускутугар бастакы итинник дьиэ буолла.
Үөрүүлээх тэрээһиҥҥэ нэһилиэк эдэр-эмэн олохтоохторо тоҕуоруһа муһуннулар. Тэрээһини бэйэлэрин баҕа өртүлэринэн аат ааттаан кэлбит «Саха циркэтин» артыыстара ‒ иилэринэн, булаваларынан оонньуур жонглер Пантелеймон Габышев уонна холууптарын кытта сценаҕа тахсыбыт Александра Николаева, республика культуратын биллэр үлэһиттэрэ ‒ Иннокентий Птицын уонна Екатерина Новикова, Эдьиий Марыына аатынан улуустааҕы музыка оскуолатын кырыымпаһыттара, кэскиллээх ырыаһыт Катя Ноговицына, «Кыталык» ансаамбыл үҥкүүһүттэрэ, нэһилиэк айар талааннаахтара, сцена ветераннара, ол иһигэр, Турция дьахталларын үҥкүүтүн толорбут ийэлэр бөлөхтөрө, улаханнык киэргэттилэр. Иннокентий Птицын аал уоту оттон, алгыс тылларын амалыйда.
Павел Сазонов өссө биир саҥа культура киинэ кэрэ-бэлиэ күннэргэ ‒ Культура уонна спорт эстафетата 60, Улуу Кыайыы 70 сыла туолбут сылыгар, оройоун төрүттэммитэ 85, Манчаары Баһылай төрөөбүтэ 205, Мэлдьэхси нэһилиэгэ тэриллибитэ 305 сылларыгар ‒ даҕааһыннара аһылларыгар дьон болҕомтотун туһаайан туран, бырайыагынан 29 мөлүйүөннээх буолуохтаах тутуу 20 мөлүйүөн солкуобай иһинэн тутуллубутугар «Стройкомплектсервис» тутуу тэрилтэтин салалтата улахан өҥөлөөҕүн бэлиэтээтэ. Киин салайааччытытыгар дьаһалта харчынан сертификатын, улуус баһылыгын грамотатын Руслан Трофимовка, предприниматель Николай Бугаевка, «Стройкомплектсервис» ХЭТ хааччыйыыга специалиһыгар Давид Слепцовка туттартаата уонна махтал тылларын кытта «Манчаары бэһэ» хартыынаны Иван Емельяновка бэлэхтээтэ.
Бу күн «Үтүө дьыала» хамсааһын төрүттэниитигэр уонна онтон сиэттэрэн, онуоха хабааннаах атын хамсааһыннар, холобур, «Спорду ‒ тыа сиригэр!» хамсааһын үөскээһинигэр, мэҥэ-хаҥаластар, чуолаан, мэлдьэхсилэр уонна улуус ол кэмнэрдээҕи баһылыга Георгий Артемьев оруоллара улахана бэлиэтэннэ.
‒ Быйыл бу бастакы кулууппут, ‒ диэтэ эҕэрдэ тылыгар министр Владимир Тихонов. ‒ Үбүлээһин араас көрүҥүнэн барыта 25 Культура дьиэтэ үлэҕэ киллэриллиэхтээх. Биһиги, сүрүннээн, дьиэ ис бараана ситиитигэр үбүлэһэ сатыыбыт: киэргэтиитэ, аппаратурата, уота-күөһэ … Ол гынан, быйылгы үппүт кырыымчык соҕус. Бюджеты күһүҥҥү чопчулааһыҥҥа 35 мөлүйүөнү эбии көрдөрүөхпүтүн баҕарабыт. Бастакы кулууппут буоларынан, бу ыскамыайкалары бэлэхтээтибит, күн бэҕэһээ аҕалыллыбыттара.
Министр аппаратура сертификатын нэһилиэк баһылыгар Владимир Шариҥҥа уонна министерство Бочуотунай грамотатын Матрена Сыромятниковаҕа туттарда.
Иван Емельянов тэрээһин өрөгөйдөөх чааһыгар тыл этэригэр, «Үтүө дьыала» хамсааһыҥҥа саха тутааччылара үлэлииллэрин төрөөбүт норуот туһугар дьиҥнээх героизм быһыытынан сыаналаата: «Саха эрэ дьоно маннык үлэлииллэр, ‒ диэн тоһоҕолоон эттэ. ‒ Кинилэр бу үлэттэн туох да оннук айылаах барыс ылбаттар. Холобур, миэхэ армяннар сүүһүнэн тутууну ыытаҕыт диэн, тутуу объегын көрдүү кэлээччилэр уонна симиэтэтин истэн бараннар, саҥата суох тахсан бараллар уонна төннүбэттэр». «Үтүө дьыала» хамсааһыны үбүлээччи, онон, саҥа кулууп иһэ-таһа ситэригэр баҕа өртүнэн көхтөөхтүк салгыы үлэлэһэргэ олохтоохтору ыҥырда уонна хамсааһын кыһыл көмүс значогун, хамсааһыны сырдатар кинигэни Руслан Трофимовка, баһылык Владимир Шариҥҥа, өссө икки кинигэтин олохтоох библиотекаҕа бэлэх уунна.
Архитектура уонна тутуу комплексын министрин солбуйааччы Геннадий Гермогенов мэлдьэхсилэри эҕэрдэлииригэр, быйыл «Үтүө дьыала» хамсааһыҥҥа 400 мөлүйүөн солкуобай көрүллүбүтүн иһитиннэрдэ уонна министерство Бочуотунай грамоталарын улуус дьаһалтатын капитальнай тутууга управлениетын кылаабынай специалиһыгар Илья Григорьевка, «Стройкомплектсервис» ХЭТ хааччыйыыга специалиһыгар Вячеслав Копыриҥҥа туттартаата.
Улуустааҕы культура управлениетын начальнига Сергей Холмогоров улууска «Үтүө дьыала» хамсааһын хаамыытын санатан туран, управление Махтал суругун Киин бухгалтерыгар Мария Птицынаҕа, специалиһыгар Анна Сосинаҕа, библиотекарь Мария Григорьеваҕа анаата.
Саҥа дьиэ хаһаайката Матрена Сыромятникова бары салайааччыларга, тутааччыларга махтанан туран, Махтал тыллардаах туос суруктары туттартаата. Ол кэнниттэн, мэлдьэхсилэри нэһилиэктэр баһылыктара тахсан эҕэрдэлээтилэр. Тэрээһин баай-талым астаах-үөллээх остуолунан түмүктэннэ.
Культура управлениетын начальнига Сергей Холмогоров эппитин ситэрэн, өскөтө, нэһилиэк дьаһалтатын нэһилиэк төбөтүн курдук көрөр буоллахха, культура киинэ диэн нэһилиэк тэбэр сүрэҕэ буолар. Суола Мэлдьэхси бу «сүрэҕин» тэбиитэ эрчимнээх буола туруоҕа диэн эрэниллэр.
Комментарии
Авторизация на сайте через социальные сети