Дьокуускай куоракка «Суһал көмө» станциятыгар биир сууккаҕа ортотунан 350-400 ыҥырыы киирэр. Манна «Суһал көмө» 23 биригээдэтэ баар буоллаҕына, биир биригээдэ сменаҕа 18-та ыҥырыыга барыан сөп. Дьыл кэмиттэн тутулуктаах өрө турар ыарыылар кэмнэригэр 600-чэҕэ тиийэ ыҥырыы бэлиэтэнэр.
Биригээдэлэр ахсааннара нэһилиэнньэ ахсааныгар эппиэттээбэт. Дьиҥэр, 31 биригээдэ Дьокуускай уонна куорат таһынааҕы сэлиэнньэлэр нэһилиэнньэлэрин медицинскэй өҥөнөн хааччыйыахтаах.
Россия нуорматынан, «Суһал көмө» массыыната ыарыһахха 20 мүнүүтэнэн тиийиэхтээх. Дьокуускайга бу көрдөрүү арыый да улахана күн аайы ыҥырыы элбэҕиттэн уонна биригээдэлэр тиийбэттэриттэн. Дьокуускайга «суһал көмөнү» кэтэһии бириэмэтэ ортотунан 29,8 мүнүүтэҕэ тэҥнэһэр.
Россияҕа суһал медицинскэй көмөнү оҥорууга саҥа быраабыла олохтонно. Быраабыла сүрүн соругунан, биллэн турар, ыарыһах эмчити кэтэһэр бириэмэтин лаппа кылгатыы буолар. Холобур, Саха сирин «суһал көмөтүн» подразделениелара Глонас тиһигинэн үлэлээбиттэрэ хас да сыл буолла. Ол түмүгэр биригээдэлэр ханна тиийбиттэрэ он-лайн режиминэн хонтуруолланар. Ону таһынан Дьокуускай куорат станциятыгар массыыналары салайар автоматизированнай систиэмэ туруоруллубут. Онон ыарыһах хас чааска кинилэри ыҥырбыта, суолга төһө бириэмэ барбыта, билигин «суһал көмө» массыыната ханна турара уо.д.а. чахчылар электроннай сурукка тиһиллэллэр. Дьокуускай куораттааҕы Медицина киинин иһинэн Жатайга суһал көмө отделениета, Тулагыга суһал көмө суукканы быһа үлэлиир пууна аһыллыбыттара станция ноҕуруускатын биллэрдик аҕыйатта. Куорат 3 №-дээх поликлиниката үлэҕэ киирдэҕинэ, Сайсары оройуонугар «суһал көмө» хос станцията баар буолуоҕа.
Сыыппаралар:
– 2014 с. – 320 222 киһи, ол иһигэр 244 463 улахан киһи, 75 759 оҕо суһал көмөнөн хааччылынна. 2013 сылы кытта тэҥнээтэххэ, 7 626 киһинэн элбээтэ (2,4%).
– 2015 сыл 9 ыйыгар «суһал көмөнү» ыҥырар дьон биллэ элбээбитэ бэлиэтэннэ (2013 с. – 109 529, 2015 с. – 114 480)
93 646 киһиэхэ көмө оҥоһулунна, 2013 сылы кытта тэҥнээтэххэ, 2,3% кыра.
Комментарии
Авторизация на сайте через социальные сети