“Сайсары” ырыа народнай ансаамбылга араас идэлээх далбар хотуттар ыллыы-туойа сылдьаллар. Ол курдук, “Сайсары” ансаамбыл - араас күрэс кыттыылааҕа, кыайыылааҕа. Төрүттэммит күнүттэн элбэх сиргэ ыллаан Сахабыт сиригэр эрэ буолбакка тас дойдуга кытары биһирэбили ылбыта. 2008 сылтан ансаамбылы Саха Өрөспүүбүлүкэтин культуратын туйгуна Светлана Степанова салайар.
Кэлбит дьону Бүтүн Арассыыйатааҕы Ийэ күнүнэн эҕэрдэлээн туран, "сайсарылар" кэнсиэртэрин С.Дадаскинов тылларыгар Н.Алексеева матыыбыгар “Ийэбэр” диэн ырыанан саҕалаатылар. Бу киэһэ 35 сыл устата ылламмыт, дьон сүрэҕэр хатаммыт уруккуну-хойуккуну санатар кэрэ ырыалар ылланнылар.
“Сайсарылары» “Сир симэхтэрэ” оҕо үҥкүү ансаамбыла, “Далбар” ансаамбыл, “Сарыал” үҥкүү ансаабыла, “Талба” ансаамбыл эҕэрдэлээтилэр. Культура министерствотын аатыттан махтал суругунан Мария Макарова, “За вклад в развитие народного художественного творчества РС(Я)” бочуоттаах бэлиэнэн Лидия Уарова, Наталья Другина уонна Татьяна Михайлова наҕараадаланнылар. Ансаамбыл саастаах бэтэрээннэригэр министр аатыттан махтал суруктары, бэлэхтэри туттардылар.
Дьокуускай куорат Дууматын аатыттан Руслан Неустроев коллективка 35 сыллаах үбүлүөйүнэн истиҥ тыллардаах эҕэрдэ суругу уонна ансаамбыл салайааччытыгар Светлана Степановаҕа махтал суругу уонна бочуот бэлиэтин туттарда. Кыайыы 70 сылын бэлиэтээһиҥҥэ ансаамбыл көхтөөх кыттыыны ылбыта. Ол иһин Дьокуускай куорат салалтата “70 лет Победы” бэлиэнэн ансаамбыл далбар хотуттарын наҕараадалаата.
Өксөкүлээх Өлөксөй аатынан Норуоттар доҕордоһууларын дьиэтин генеральнай директора Яна Игнатьева истиҥ тылларынан эҕэрдэлээтэ уонна ансаамбылга сахалыы сиэдэрэй көстүүм тиктэрэллэригэр грант туттарда. Ансаамбыл далбар хотуттарын коллегалара, чугас дьонноро, доҕотторо кэлэн эҕэрдэлээн үөрдэн бардылар.
“Сайсары” ырыа народнай ансаамбылын 35 сыллааҕы үбүлүөйдээх дьоро киэһэтэ үрдүк таһымнаахтык ааста.
Өксөкүлээх Өлөксөй аатынан Норуоттар доҕордоһууларын дьиэтэ
Комментарии
Авторизация на сайте через социальные сети