Миниистир сарсыарда эрдэ Күүкэйгэ тиийдэ. Бу күн манна 100 уонна 50 ынах турар икки хотонун арыйдылар. Бастаан Д.П. Федоров салайааччылаах «Күүкэй» тыа хаһаайыстыбатын кооперативын хотонугар сырыттылар. Хаһаайыстыба бэйэтин күүһүнэн сайын устата арочнай типтээх хотону туттубут. Инникитин ынах сүөһүтүн элбэтэр былааннаах. Итинник дьаһанан үлэлииллэрин Александр Еремеевич хайҕаата.
Салгыы А.А. Федоров 50 ынах турар, буруустан тутуллубут хотонун кыһыл лиэнтэтин быстылар. Бу иннинээҕи хотоннор сииктээх соҕус буоллахтарына, бу хотон кураанах. Арай турар сирэ нэһилиэктэн добуочча тэйиччи эбит. Үлэһиттэр уунан сылдьан үлэлииллэр. Миэстэтигэр дьиэ туттан, онно олорон үлэлииллэрэ кинилэргэ бэйэлэригэр табыгастаах буолуо эбит. Бу боппуруоһу үөрэтэллэригэр эттилэр. Уопсайынан, Күүкэй нэһилиэгэ норуот хаһаайыстыбатын бары салааларыгар үчүгэй үлэлээҕинэн биллэр. Хотон хаһаайыннара миниистиргэ өйөбүлүн иһин махталларын эттилэр.
Салгыы Элгээйи III Бордоҥор саха сүөһүлэрэ турар саҥа хотонноругар сырыттылар. Билиҥҥитэ манна 50-ча сүөһү турар. Хас да сыллааҕыта Дьааҥыттан аҕалбыт сүөһүлэрэ төрөөн-ууһаан, атын сүөһүлэртэн туспа иитиллэн тураллар. В.М.Львов салайар «Түбэ» бааһынай хаһаайыстыбатын төһүү үлэһиттэрэ сахабыт сүөһүлэрин сыа-сым курдук көрөн-истэн олороллор. Маны сэргэ Василий Михайлович өрүс уҥуор сүүстэн тахса сылгылаах. Тупсаҕай оҥоһуулаах объегы элгээйилэр биир дойдулаахтара, билигин куоракка олорор, тутуунан уутуйан дьарыктанар урбаанньыт И.Ю.Осипов бэйэтин үбүнэн туттарбыт. Ити курдук дойдутун социальнай-экономическай сайдыытыгар улахан кылааты киллэрбит.
Салгыы Күндэйэҕэ «Сырдык аартык» кооператив саҥа хотонун арыйыы үөрүүлээх сиэрэ-туома ыытылынна. Бигэ туруктаах хаһаайыстыба сыллата кэриэтэ араас объектары тутан, үлэҕэ киллэрэр. Манна үлэһиттэр Александр Еремеевиһы кытта ирэ-хоро сэһэргэстилэр. Мунаарар боппуруостарыгар толору хоруйу ылан астыннылар. Инникитин да хаһаайыстыбаҕа министиэристибэ өттүттэн сөптөөх өйөбүл баар буолуоҕар эрэннэрдэ.
Бээтинсэҕэ Сунтаар нэһилиэгин Хорохой диэн сиригэр «Николаев Д.И.» ИП дьиэ кэргэн бааһынай хаһаайыстыбатын саҥа хотонун аһыллыыта буолла. Ааспыт сайын устата дьаныардаахтык үлэлээн киэҥ-куоҥ хотону туппуттар. Тутуу сүнньүнэн Дмитрий Иннокентьевич дьиэ кэргэнин күүһүнэн ыытыллыбыт. Үлэһиттэр миэстэтигэр сабыс-саҥа тупсаҕай оҥоһуулаах, толору хааччыллыылаах дьиэни туттубуттарын миниистир хайҕаата. Хаһаайыстыба быйыл саҥа саҕалаан эрэр фермердэргэ анаммыт анал граны ылбыта. Ол үбүнэн хотон туттан, үлэлии-хамсыы сылдьаллар.
Күнүс 2 чаастан А.Е.Артемьев «Добун» Култуура киинигэр «Сунтаар улууһугар тыа хаһаайыстыбатын күнэ» диэн үөрүүлээх тэрээһиҥҥэ кыттыыны ылла. Бэйэтин этиитигэр Александр Еремеевич Сунтаар тыа хаһаайыстыбатын бары салааларыгар (бурдук үүннэриититтэн ураты) үчүгэй көрдөрүүлээҕин бэлиэтээтэ. Улуус уруккуттан бэйэтэ үтүө үгэстэрдээх буолан, үлэни-хамнаһы кыайа тутар. Быйыл улууспутугар 19 хотон тутуута саҕаламмыта. Онтон 10 хотон үлэлии турар. Эһигиттэн ураты бачча үгүс хотону биир кэмҥэ ким да саҕалаабата диэн астынарын биллэрдэ. Сэттэ хотон аһыллыытыгар бэйэтинэн сырытта. Бу буолбатах үһү дуо, сунтаардар инникини көрөн үлэлииллэрин арылхай туоһута. Салгыы миниистир чулуу үлэһиттэргэ СӨ үрдүкү государственнай наҕараадаларын туттарда.
Официальнай сырыыта түмүктэнэр күнүгэр, ол эбэтэр сэтинньи 21 күнүгэр, сарсыарда 10 чаастан улуус дьаһалтатыгар мунньаҕы ыытта. Онно нэһилиэк баһылыктара, тыа хаһаайыстыбатын специалистара, хаһаайыстыбалар салайааччылара кыттыыны сырыттылар. Санатар буоллахха, А.Е. Артемьев биһиги улууспутугар бэс ыйын саҕаланыытыгар кэлэ сылдьыбыта. Онно кини үгүс нэһилиэктэргэ сылдьан, үлэни-хамнаһы кытары билсибитэ.
Хас да нэһилиэк баһылыга бэйэлэрин санааларын, кыһалҕаларын этиннилэр. Ол курдук, Бүлүүчээн баһылыга Г.Р.Васильев, Аллыҥа баһылыга Н.В.Спиридонов, Сунтаар баһылыга Э.Е.Филиппов уо.д.а. билигин биир сүрүн кыһалҕанан күрүөлээһин боппуруоһа буоларын эттилэр. Манна ааспыт сылтан үлэ күүскэ саҕаламмыта. Бу боппуруоһу улуус уонна нэһилиэк дьаһалталара бииргэ быһаарыахтаахтар. Үбүлээһинин бэйэлэригэр ылыныахтаахтар. Бүлүүчээн баһылыга итини сэргэ ходуһалара үксэ ууга сытарын этэн туран, мелиорация үлэтин күүһүрдүөхпүт диэтэ, онно министиэристибэ көмө оҥороругар көрдөстө.
Баар проблемалары быһаарыыга бары түмсэн үлэлииргит ордук хотуулаах буолуо диэн Александр Еремеевич сүбэ мунньаҕы түмүктээтэ.
Комментарии
Авторизация на сайте через социальные сети