ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
7 октября 2015, 16:13

Мэҥэ-Хаҥалас киинигэр Майаҕа Федор Попов аатынан сквер аһылынна


1943 сыл алтынньы 3 күнүгэр 22 саастаах биһиги биир дойдулаахпыт Федор Попов Днепр өрүһү туораан, 70-ча фашиһы сууһаран геройдуу быһыыны оҥорбута. 72 сыл буолан баран бу күн Майаҕа сахалартан бастакы Советскай Союз Геройа Ф.К.Попов аатынан уулусса саҕаланыытыгар Кыайыы 70 сылынан саҥа сквер аһыллыытын үөрүүлээх түгэнэ бэлиэтэннэ.

Тэрээһиҥҥэ Майа сэлинньэтин общественнай түмсүүлэрин чилиэннэрэ, оскуолалар байыаннай-патриотическай  кулууптарын иитиллээччилэрэ, үөрэнээччилэр, Майа сэлиэнньэтин олохтоохторо кэлэн кытыннылар.

Федор Попов  граната быраҕан эрэр пааматынньыга саҥа сквер киин өртүгэр турар, дьон олорон сынньанар ыскамыайкалардаах. Сквери «Майа сэлиэнньэтэ» МТ дьаһалтата, Саха Республикатын суолга-иискэ департаменын салалтата, «Мэҥэ-Хаҥалас суоллара» ААО, «Мегинострой» тутуу тэрилтэтэ уо.д.а. үбүлээн туппуттар. Инникитин сквери уоттаан-күөстээн өссө тупсарар былааннаахтар.

Сквери үөрүүлээхтик аһыыга улуус баһылыгын социальнай боппуруостарга солбуйааччы Иван Птицын, «Майа сэлиэнньэтэ» МТ баһылыга Тимофей Нестеров, кини солбуйааччыта Ким Нестеров, Саха Республикатын суолга-иискэ департаменын директорын солбуйааччы Алексей Федоров, «Баатара нэһилиэгэ» МТ баһылыга Федор Захаров, герой аймахтарын ааттарыттан Октябрина Дмитриева-Лебедева, Майа сэлиэнньэтин ветераннарын сэбиэтин бэрэссэдээтэлэ Павел Жирков кытыннылар.

photoByWidth&id=46492&width=1000

Тимофей Нестеров Федор Поповка анаан элбэх толкуйунан эдэр көлүөнэ оҕолорбутугар анаан оҥорбут сквербитин көрө-истэ, харыстыы сылдьыҥ диэн баҕа санаатын тиэртэ. Улуус баһылыгын солбуйааччы Иван Птицын Кыайыы 70 сылыгар Федор Поповка Аллараа Бэстээххэ уонна Майаҕа икки пааматынньык туруоруллан, кэнэҕэски ыччакка кини аатын үйэтитэр элбэх үлэлэр ыытыллаллар диэтэ. Баатара нэһилиэгин баһылыга Федор Захаров, герой аймаҕа Октябрина Дмитриева-Лебедева баатаралар уонна кини аймахтарын ааттарыттан истиҥ махталларын тиэртилэр.  

Сквери тутууга актыыбынайдык үлэлэспит СР суолга-иискэ департаменын генеральнай директора Николай Сивцев, «Мегинострой» тутуу производственнай кооперативын бэрэссэдээтэлэ Александр Тарасов, ОДьКХ тэрилтэтин сварщига Александр Баишев уо.д.а. Махтал суруктарынан бэлиэтэннилэр.

Тэрээһини В.П.Ларионов аатынан  орто оскуола 2 «а» кылааһын үөрэнээччилэрэ байыаннай үҥкүүнэн, 4 «б» кылааһын үөрэнээччилэрэ «Геройга-уруй» диэн ырыанан, Ф.К.Попов аатынан Баатара орто оскуолатын кадетскай кылааһын үөрэнээччилэрэ параднай нүөмэрдэри толоруунан киэргэттилэр. Салют буолла, Герой пааматынньыгар сибэкки дьөрбөлөрө уурулунна.

Саха чулуу уолугар, биир баар-суох геройбутугар улууска үһүс пааматынньык турда. Федор Попов төрөөбүт дойдутугар урут Баатараҕа турбут пааматынньык саҥардыллыа диэн эрэнэбит.  

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 973 Источник: ЯСИА Автор: Виктория Белолюбская Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ