От ыйын 10 күнүгэр – дьиэ кэргэн, таптал, бэриниилээх буолуу күнүн чэрчитинэн – Муома национальнай нэһилиэгин дьаһалтатыгар оройуоннааҕы ЗАГС отделын, оройуон дьахталларын комитетын уонна ветераннар Сэбиэттэрин тэрийиилэринэн 50-тан тахса сыл олорбут ыаллары чиэстээһин буолла. Ытык дьиэ кэргэннэри чиэстээһин көрсүһүүтүгэр Прасковья Никитична, Иван Андреевич Петровтар, Евдокия Николаевна, Леонид Иванович Боковтар, Мария Михайловна, Афанасий Алексеевич Черовтар, Светлана Куприяновна, Иван Матвеевич Петровтар ыҥырыллыбыттар.
Хонуу бөһүөлэгэр бүгүҥҥү күн туругунан 50-тан тахса сыл олорбут биэс ыал баар. Кинилэр истэригэр быйыл 61 сыл эйэ-дэмнээхтик олорор Мария Гаврильевна уонна Николай Софронович Слепцовтар бааллар. Кинилэр 1954 с. Орто Халыма оройуонун Уолбут нэһилиэгэр сүрэхтэрин холбообуттара. Муома оройуонугар тыа хаһаайыстыбата сайдарыгар бүтүн олохторун анаабыттара. Мария Гаврильевна Суон Тииккэ үүт-табаарынай фермаҕа биригэдьииринэн таһаарыылаахтык үлэлээн Верховнай сэбиэт IX сессиятын депутатынан талылла сылдьыбыта. Кинилэр икки оҕолоохтор, элбэх сиэннээхтэр. Билигин даҕаны илиилэрин үлэттэн араарбакка, сүөһү иитэн олороллор.
Көрсүһүүгэ кэлбит ытык-мааны ыаллары Петр уонна Февронья сибэтиэйдэр күннэринэн Муома национальнай нэһилиэгин баһылыга Александр Васильевич Андреев, кини солбуйааччыта Наталья Борисова Добрянцева, ветераннар оройуоннааҕы Сэбиэттэрин председателин солбуйааччы Розалия Семеновна Варламова истиҥ-иһирэх тылларынан эҕэрдэлээтилэр. Р.С. Варламова ветераннар Сэбиэттэрин аатыттан бэлэх туттарда. Истиҥ көрсүһүүнү оройуоннааҕы ЗАГС отделын сэбиэдиссэйэ, дьахталлар комитеттарын председателэ Мария Гаврильевна Андреева салайан ыытта, ыҥырыллыбыт ыалдьыттары сиһилии билиһиннэрдэ.
Прасковья Никитична, Иван Андреевич Петровтары оройуоҥҥа билбэт киһи суоҕа буолуо. 93 саастаах аар кырдьаҕас Иван Андреевич Муомаҕа 1949 с. кэлбитэ. Кини сэрии, тыыл-үлэ ветерана, өр сылларга статистика оройуоннааҕы отделын салайбыта. Тыыл-үлэ ветерана Прасковья Никитична райсовекка, редакцияҕа үтүө суобастаахтык үлэлээбитэ. Кинилэр 4 оҕолоохтор, элбэх сиэннээхтэр, хос сиэннээхтэр. Билигин бочуоттаах сынньалаҥнарыгар олороллор.
Евдокия Николаевна уонна Леонид Иванович Боковтар 1961 с. Орто Халыма оройуонун Березовка сэлиэнньэтигэр олохторун холбообуттара. Евдокия Николаевна эвен норуотун чулуу киһитэ – суруйааччы, поэт, мелодист, ырыаһыт, норуот маастара, пропагандист. Кини Саха АССР үтүөлээх учуутала. Леонид Иванович доруобуйа харыстабылын туйгуна, дьон-оҕо доруобуйата тупсарыгар туруулаһан туран үлэлээбитэ. Боковтар Орто Халымаҕа, Аллайыахаҕа олорбуттара. 1988 сылтан Евдокия Николаевна дойдутугар Муомаҕа көһөн кэлэн олороллор. Леонид Иванович бу көрсүһүүгэ ыалдьар буолан кэлбэтэ. Билигин кинилэргэ кыыстара Надежда Леонидовна Аллайыахаттан кэлэ сылдьар.
Мария Михайловна, Афанасий Алексеевич Черовтар улахан уоллара быйыл 55 сааһын туолан пенсияҕа барбыт. Кинилэр ыарахантан чаҕыйбат туруу үлэһит дьон буолаллар. Тыа хаһаайыстыбатыгар, эргиэҥҥэ эҥкилэ суох үлэлээбит Мария Михайловна – "Бочуот Знага" уордьан кавалера, оройуон сэбиэтин депутата, оттон Афанасий Алексеевич сааһын тухары тыа хаһаайыстыбатыгар үтүө суобастаахтык үлэлээбитэ. Кинилэр билигин оҕолорун, сиэннэрин, хос сиэннэрин ортолоругар саха киһитин сиэринэн сүөһү иитэн, кэтэх хаһаайыстыба тэринэн олороллор.
Светлана Куприяновна уонна Иван Матвеевич Петровтар эһиил олорбуттара 55 сыллара буолуо. Светлана Куприяновна Суон Тииккэ "Кэскил", Хонууга "Кэнчээри" д/с оскуолаҕа киириэхтэрин иннинээҕи саастаах оҕолору иитиигэ пенсияҕа тахсыар диэри үлэлээбитэ. Иван Матвеевич эдэр эрдэҕиттэн тутууга сылдьыбыт сатабыллаах тутааччы, кэнники өҥө эйгэтигэр үлэлээбитэ. Кинилэр 1979 с. Хонууга аан бастакы икки этээстээх чааһынай дьиэни туттубуттара. Билигин оҕолоро Дьокуускайынан, Хонуунан олороллор.
Ити курдук 50-тан тахса сыл олорбут ыаллары билиһиннэрэн баран Мария Гаврильевна: "Эһиги олоххут тухары истиҥник санаһан бииргэ олороҕут, эдэр ыалларга холобур буолаҕыт. Биһиги эһигинэн киэн туттабыт, эһиги тускутунан эдэр ыччаттарга кэпсии сылдьыахпыт", – диэтэ.
Салгыы кини ытык ыалларга үс туомунан тахсыбыт "Золотые семьи Якутии" диэн кинигэни бэлэхтээтэ. Бу кинигэ бастакы туомугар Муоматтан Наталья Петровна, Николай Михайлович Черемкиннар, иккискэ – Петр Иванович, Тамара Иннокентьевна Павловтар тахсыбыттара. Оттон быйыл тахсыбыт үһүс туомҥа Евдокия Николаевна, Леонид Иванович Боковтар уонна Прасковья Никитична, Иван Андреевич Петровтар киирбиттэр. Бу кинигэни кытта М.Г. Андреева ытык ыалларга олохторун кэрэһэлиир хаартыскаларын ууруналларыгар "Дьоллоох дьиэ кэргэн" диэн фотоальбому туттарда.
– 50-тан тахса сыл олоробут дьиэ кэргэннэр Муома оройуонун ЗАГС-ын Бочуот кинигэтигэр киирбиттэрэ. Бу кинигэҕэ барыта 81 ыал ааттара кыһыл көмүс буукубанан сурулла сылдьаллар, – диэтэ кини.
Үөрүүлээх чаас кэнниттэн С.К., И.М. Петровтар сиэннэрэ, улахан кыыстарын Татьяна Ивановна Черемкина оҕото Дьокуускай куорат 26 нүөмэрдээх оскуолатын 4 кылааһын үөрэнээччитэ Яна Черемкина "Красное лето" диэн ырыаны ыллаата. Элбэх оҕолоох ийэ, дьахталлар комитеттарын актыбыыһа Тамара Михайловна Слепцова үйэлээх тапталы, кэрэни, үтүө санааны уонна быһыыны хоһуйар Амма Соморсонуттан төрүттээх биллиилээх поэт, элбэх ырыа автора Семен Капитонов "Көрсүһэллэр дьоннор дьоллоох буолаары" хоһоонун доргуччу аахта, ол кэнниттэн Дмитрий Лебедев "Осикат (Сулус)" диэн ырыатын ыллаан иһитиннэрдэ.
Үйэ аҥарыттан ордук сарын сарынтан өйөнсөн олорбут ытык-мааны ыаллар минньигэс астаах остуол тула олорон бэйэлэрин олохторун, дьиэ кэргэннэрин тустарынан кэпсэттилэр. Евдокия Николаевна кырдьастарга эдэр саастарын санатан "Эйигин мин кууһуум диэбитим" диэн былыргы ырыаны уонна эвен тылынан суруйбут бэйэтин ырыатын ыллаата. Сэрии, тыыл-үлэ ветерана Иван Андреевич:"Уһуннук, эйэ-дэмнээхтик олорор диэн бу – дьол буолар", – диэбитин дьон биһирии иһиттилэр.
Ити курдук Хонуу сэлиэнньэтин ытыктанар дьиэ кэргэннэрэ Прасковья Никитична, Иван Андреевич Петровтар, Евдокия Николаевна, Леонид Иванович Боковтар, Мария Михайловна, Афанасий Алексеевич Черовтар, Светлана Куприяновна, Иван Матвеевич Петровтар бу тэрээһини ыыппыт кэргэннии Муома национальнай нэһилиэгин баһылыгар Александр Васильевич уонна ЗАГС отделын сэбиэдиссэйигэр Мария Гаврильевна Андреевтарга ис сүрэхтэриттэн махтаннылар, кинилэргэ бары үчүгэйи баҕардылар. Мария Михайловна Черова: "Дьон туһугар элбэҕи үлэлиигит. Уһун үйэлэниҥ", – диэн кэс тылын эттэ.
...Дьылҕа хаан ыйааҕынан, Одун хаан оҥоһуутунан киһи барахсан олоҕо түстэнэр буоллаҕа. Дьэ онон иллээх-эйэлээх дьиэ кэргэттэри Петр уонна Февронья сибэтиэйдэр күннэринэн итиитик-истиҥник эҕэрдэлиибин, эһиэхэ уһун-дьоллоох олоҕу баҕарабын!
Комментарии
Авторизация на сайте через социальные сети