ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
16 июня 2015, 11:29

Мэҥэ-Хаҥалас улууһугар Кытай Народнай Республикатын Хэйлуньцзяннааҕы провинциятын делегацията ыалдьыттаата


Ааспыт нэдиэлэҕэ Дьокуускайга Кытай Народнай Республикатын Хэйлуньцзяннааҕы провинциятын делегацията инвестицияҕа, атыыга-эргиэҥҥэ, экономиканы, агропромышленнай комплексы, туризмы сайыннарыыга туһуламмыт форумҥа кэлэн кытынна.

Хэйлуньцзян провинциятын вице-губернатора Сунь Яо салалталаах делегацияны СР Федеративнай сыһыаннаһыыларга уонна тас сибээскэ министрэ Владимир Васильев көрүстэ. Биһиги республикабыт 80 араас бөдөҥ хампаанньалар бэрэстэбиитэллэрин кытта атыыга-эргиэҥҥэ уонна экономикаҕа бииргэ үлэлэһэргэ кэпсэтиһиилэри ыытта.

Үс күн устата делегация чилиэннэрэ СР Атыы-эргиэн, промышленнай палаататыгар, ХИФУ Арктикатааҕы инновационнай киинигэр, «Якутия» технопааркаҕа, «Сахабулт», «Таба» о.д.а. тэрилтэлэргэ сырыттылар. 

photoByWidth&id=36793&width=1000

Бэс ыйын 12 күнүгэр ‒ Россия күнүгэр сөп түбэһиннэрэн, оройуон дьаһалтатын дьиэтигэр хас да сыл устата доҕордуу сыһыаны олохтообут Кытай Народнай Республикатын Хэйлуньцзян провинциятын Муданьцзян куоратын народнай правительствотын делегацията оройуон салалтатын, нэһилиэк баһылыктарын, тэрилтэ салайааччыларын кытта көрүстэ.

Көрсүһүү Россия Федерациятын уонна Кытай Народнай Республикатын гимнэрин толорууттан саҕаланна. Оройуон баһылыгын бастакы солбуйааччы Павел Сазонов уонна улуус предпринимательствоҕа сайдыытын боппуруостарыгар уонна регионнар икки ардыларынааҕы сибээскэ уонна информационнай технологияларга управлениетын начальнига Егор Белолюбскай ыалдьыттарга болҕомтону ууран үлэни-хамнаһы кэпсэтиһэ, дойдуларын билиһиннэрэ кэлбиттэригэр махтаннылар, улуус туһунан иһитиннэриилэри оҥордулар. Тылбаасчыттар Марат Адамов уонна кытай кыыһа Лиза күүс-көмө буоллулар.

Кытайга бастыҥ сайдыылаах экономикалаах куорат быһыытынан биллэр Муданьцзян мэрин солбуйааччы Ли Дэси куорат экономикаҕа уонна инвестицияҕа кыахтарын сырдатта.

Кини: «Биһиги улууска бастакы кэлиибит, ол эрээри бэйэбитигэр маарынныыр олохтоохтору көрөммүт уруургуу санаатыбыт, дойдубутугар сылдьар курдукпут. Муданьцзян куорат Хэйлуньцзян провинция соҕуруу илин өртүгэр сытар. 46 тыһыынча кв. км иэннээх, сүүстэн тахса сыллааҕыта тимир суол станциятыттан сайдан барбыт куорат 5 уезтаах, 4 оройуоннаах. Нэһилиэнньэтэ - 2 мөлүйүөн 800 тыһыынча киһи. Хотугулуу илиҥҥи Азия сүрүннүүр транспортнай киинин быһыытынан биллэр. Россияҕа, Японияҕа, Соҕуруу, Хотугу Кореяларга самолетунан икки эрэ чаас көтөҕүн. Кытайга биһиги куораппыт Россияны кытта атыыга-эргиэҥҥэ инники күөҥҥэ сылдьар. Ааспыт сылга атыы-эргиэн суумата 7 миллиарда долларга тэҥнэспит. Онон Муданьцзян куорат Россияны кытта бииргэ алтыһыыта итиэннэ провинцияҕа «Солколоох суол» экономическай сайдыы эргимтэтин киинин быһыытынан тэтимнээхтик сайдар», ‒ диэн эттэ.

Хас да куоракка маһы таҥастааһын уонна климат табыгастааҕынан тыа хаһаайыстыбатын салаатыгар Кытайга биллэр рис бастыҥ көрүҥүн, оҕуруот астарын, фруктаны, мас тэллэйин үүннэрии күүскэ сайдыбыт. Делегация бүгүҥҥү сырыытыгар улуус салалтатын кытта бииргэ үлэлэһэргэ хайысханы чопчу сүбэлэһэргэ анаан-минээн кэлбит соругун эттэ. Чуолаан атыы-эргиэн, экономика, транспорт, суол-иис, ититии, энергетика инфраструктуратын сайыннарыы, Дальнай Востокка түргэн сырыылаах поезтарга тимир суолу тутуу, маһы таҥастыыр промышленность, тыа хаһаайыстыбата курдук эйгэлэргэ үлэлэһэргэ этиилэри киллэрдэ. Онуоха бастаан Интернет ситиминэн электроннай коммерциянан саҕалыырга табыгастааҕын эттэ. Билигин Кытайга Россияттан кэлэр табаардар, бородуукталар, ювелирнай оҥоһуктар атыыга болҕомто киинигэр тураллар эбит. Россияны кытта үөрэхтээһин уонна культура эйгэтигэр тэрээһиннэри ситиһиилээхтик ыыппыттарын, улууспут предпринимателлэрэ уонна үөрэҕин үлэһиттэрэ хаста даҕаны тиийэ сылдьыбыттарын аҕынна. Ли Дэси Мэҥэ-Хаҥалас улууһа уонна Муданьцзян куорат доҕордуу сибээстэрэ тэтимнээхтик сайдарын бэлиэтээтэ уонна олохтоохтор истиҥник көрсүбүттэригэр махтанна.

Салгыы Муданьцзяннааҕы государственнай уопсай үөрэхтээһин университетын ректора Линь Жэньчжу үөрэх кыһатын туһунан кэпсээтэ. 1983 с. тэриллибит университекка биһиги улууспутуттан алта ыччат үөрэнэр. 10 тыһыынча кэриҥэ студеннаах университекка 149 доктор, аспиран, 207 профессор, доцент үлэлиир. «Идэни төрдүттэн баһылыырга, үлэҕэ сатабыллаах буола сайдалларыгар улахан болҕомтону уурабыт. Онон билигин үөрэх ситимигэр тосту уларытыылар киллэриллэллэр. Тэрилтэ анал этиитинэн специалистары бэлэмнииргэ дьулуһабыт, бастаантэрилтэни кытта дуогабар түһэрсэбит. Тэрилтэ туох идэлээх үлэһиккэ наадыйарынан идэтийиини арыйабыт. Онон студеннар ханнык тэрилтэҕэ үлэҕэ киирэллэрэ эрдэттэн биллэр. Практика теорияны баһыйар диэн өйдөбүлү тутуһан үлэлиибит», ‒ диэн ректор кэпсээтэ.

Студеннар омук тылын, машиностроительнай, инженернэй-архитектурнай, биофармация уонна ас-үөл технологиятын, информационнай-электрическэй промышленность о.д.а. факультеттарга 43 идэтийиигэ үөрэнэллэрин, үөрэх кыһатын усулуобуйата үрдүк сайдыылааҕын итиэннэ Россияны, Японияны, Соҕуруу Кореяны о.д.а. тас дойдулары кытта бииргэ үлэлэһэллэрин бэлиэтээтэ.

Делегация кыттыылаахтарыттан «Юньлюй» хампаанньалар бөлөхтөрүн президенэ Сюй Хунфэй үлэтин-хамнаһын сырдатта. Хампаанньаҕа 12 тэрилтэ баар: суолу-ииһи оҥорууга, олорор дьиэлэри, коммерческай тутууларга, хамсаабат баай, атыы-эргиэн, сылааһынан хааччыйыы, чоҕу, нефть, тимир рудатын хостооһун салаатыгар, инвестицияҕа, массыынанан, тимир суолунан таһаҕаһы эмиэ таһыыга үлэни ыыталлар. Салайааччы тутууга, суолу оҥорууга саҥа тэриллэринэн хааччыллыбыттарын, баай уопуттаах хампаанньа быһыытынан биллэрин кэпсиир. Сылга 100 тыһыынчаттан тахса кв. м иэннээх тутууну олоххо киллэрэллэр. 80 мөлүйүөн юань үбү-харчыны ититии ситимин хааччыйыыга укпуттар.

Делегацияҕа Муданьцзян куорат тас дойдулар дьыалаларыгар кэнсэлээрийэтин начальнига Лю Чаншэн, кэнсэлээрийэ норуоттар икки ардыларынааҕы сибээскэ отделын начальнига Ли Сяомань, Муданьцзян куорат үөрэҕин управлениетын начальнига Ван Сяокунь, куорат коммерцияҕа управлениетын начальнига Хань Цзялян бааллар.

Кэпсэтиһии түмүгүнэн, улуус өртүттэн оҥорон таһаарыыга уонна экономикаҕа бииргэ үлэлэһэргэ санаалар этилиннилэр. Улуус салалтата ыалдьыттары тыа хаһаайыстыбатыгар туорахтаах культураны, оҕуруот астарын үүннэритини сайыннарарга, IT-технологияларга, үөрэх салаатыгар робототехникаҕа, электроннай коммерцияҕа, тутууга болҕомтону ууралларыгар, үөрэххэ, спорка салгыы алтыһарга, Аллараа Бэстээххэ индустриальнай паарканы тутуу бырайыагын олоххо киллэрэргэ көмөлөһөллөрүгэр баҕа санааларын эттилэр.

Павел Данилович көрсүһүүлэр түмүктэринэн Мэҥэ-Хаҥалас улууһа уонна Муданьцзян куорат салалталара балаҕан ыйыгар бииргэ үлэлэһэргэ илии баттаһар былааннаахтарын эттэ.

Ыалдьыттар Кытайга эр санааланыы уонна күүс-уох бэлиэтэ ‒ тигр хартыынатын бэлэхтээтилэр уонна предпринимателлэри дойдуларыгар ыҥырдылар. Делегация кыттыылаахтара Аллараа Бэстээхтээҕи Транспортнай техникумҥа, Нөөрүктээйи уонна Ороссолуода нэһилиэктэригэр сырыттылар. 

При частичном или полном использовании материалов гиперссылка на сайт ysia.ru обязательна.
Категория: Политика Просмотров: 965 Источник: ЯСИА Автор: Марфа Птицына Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ