Саха литературатын биһигэ буолбут Тааттаттан тардыылаах, саха омукка Былатыан Ойуунускайы, Суорун Омоллоону бэлэхтээбит Чөркөөхтөн төрүттээх, эдэр сааһын өрөспүүбүлүкэҕэ эстраднай ырыа искусствота сайдыытыгар, сонун уонна ураты рок хайысханы сахатытан киллэриигэ анаабыт, төрөөбүт улууһугар культура управлениетын салайбыт, Дьокуускайга саҥа тэриллэр Олоҥхо театрын дириэктэринэн таһаарыылаахтык үлэлиир Виталий Власов күн бүгүн саха культуратын эйгэтигэр биир далааһыннаахтык ылсан айа-тута сылдьар деятель быһыытынан биллэр. Ол курдук, рок хайысхаттан, эстраднай ырыаттан саҕалаан, поэзияҕа, этническэй музыкаҕа, олоҥхону аныгы кэмҥэ тарҕатыыга, инновацияҕа тиийэ бу барыта кини интэриэһэ.
“Дойдум барахсан” айар киэһэтигэр Виталий Власов музыкант уонна поэт быһыытынан киэҥ өрүттээхтик арыллан көһүннэ. Саха классик суруйааччыларын айымньыларынан “ырыа-кэпсээн” диэн саҥа сүүрээнин, гитарист быһыытынан музыкальнай дьүһүйүүлэри Кыыл Уолун аатынан Үҥкүү театрын национальнай инструменнарын оркестра доҕуһуоллаах толордо.
Кини норуот кутун туппут ырыа матыыбын уонна тылын айааччы буоларын Ил Түмэн депутата Иван Андросов, эстрада сулустара Анастасия Готовцева, Василий Еремеев, рокердар Сиэн Тиитэп, Григорий Попов ыллаан иһитиннэрдилэр. Оттон поэт Битээлийи Таатта улууһун Амма Аччыгыйа аатынан Харбалаах оскуолатын үөрэнээччилэрэ, ХИФУ устудьуоннара, Саха уонна Олоҥхо театрдарын артыыстара билиһиннэрдилэр.
Виталий Власов олох араас эйгэтигэр ситиһиилээхтик үлэлии-хамсыы, айа-тута сылдьар доҕоттордооҕун СӨ судаарыстыбаннай сүбэһитэ, режиссер Андрей Борисов, СӨ Бырабыыталыстыбатын бэрэссэдээтэлин солбуйааччы Алексей Дьячковскай, Ил Түмэн депутата, “Саха” НКИК генеральнай дириэктэрэ Иван Андросов, СӨ Конституционнай суутун бэрэссэдээтэлэ Александр Ким-Кимэн, Сэбиэскэй Сойуус биллиилээх тустууга Михаил Ноговицын, милиция астаапкаҕа сылдьар полковнига Николай Петров, народнай суруйааччы Сэмэн Тумат, П.А. Ойуунускай аатынан судаарыстыбаннай бириэмийэ лауреата, суруйааччы Урсун, духуобунас академиктара – драматург Баһылай Харысхал уонна норуот маастара Мандар Уус, “Киин куорат” хаһыат сүрүн редактора Иван Ущницкай, СӨ национальнай инструменнарын оркестрын салайааччы Николай Петров кэлэн эҕэрдэлээбиттэрэ туоһулаата. Ону тэҥэ үөрүүлээх тэрээһиҥҥэ кини биир идэлээхтэрэ – өрөспүүбүлүкэ культураҕа уонна искусствоҕа сыһыаннаах тэрилтэлэрин салайааччылара, биир дойдулаахтара кытыннылар.
55-с хаарын санныгар уулларбыт поэт, музыкант, бөлүһүөк Виталий Власов кырдьыга да дьоллоох киһи буоларын, кини ийэлээх аҕата бу үбүлүөй ытык ыалдьыттарынан буолбуттара кэрэһилээтэ.
Комментарии
Авторизация на сайте через социальные сети