Дьаарбаҥкаҕа хас биирдии түөлбэ остуол тардан, ас арааһын тардыбыт. Атыылаһааччы да элбэх. Атыыһыттар анал таҥастаах-саптаах тураллара, бэлэмнэммиттэрэ харахха тута быраҕыллар. Сүөһү иһэ, хаана, үүт ас, балык, ньээкитик, бурдук ас арааһа атыыга хамаҕатык бардылар.
Куонкурус түмүгүнэн ас эгэлгэтин атыылаабыт I түөлбэ (салайааччы Дария Томская) бастакы миэстэҕэ тахсан, үөрүү үктэллэннилэр.
Киэһэ өттүгэр үгэскэ кубулуйбут “Строганина-2015” тоҥ балык бырааһынньыга буолла. Манна оскуола, оҕо саада уонна ДЭС, балыыһа уонна ОДьКХ, дьаһалта, социальнай харалта салаата, бэтэрээннэр хамаандалара кытыннылар. Уопсай түмүгүнэн оскуола хамаандата бастаата. Балыктан ас арааһын астааһын күрэҕэр балыыһа кэлэктиибэ иннин кимиэхэ да биэрбэтэ. Бүлүүдэлэрин көрүҥэ да элбэх, көстүүтэ да кэрэ, амтана да минньигэс буолла.
“Царь Рыба” күрэскэ саамай бөдөҥ балыктаахтарынан чыырга, сыаҥааҥҥа - Екатерина Стручкова, сордоҥҥо, алыһарга - Маргарита Левина, собоҕо - Иван Слепцов, мараҕаттаҕа - Федор Павлов буоллулар. Уопсай түмүккэ Екатерина Стручкова эбии икки балык атын көрүҥүн аҕалан, барыларыттан чорбойдо.
Тыа хаһаайыстыбатын күнүнэн мустубут дьону нэһилиэк баһылыга Олег Корякин уонна тыа хаһаайыстыбатын исписэлииһэ Светлана Жиркова эҕэрдэлээтилэр.
Баһылык сыл түмүгүнэн үүт туттарыытыгар бастаабыт Тамара Ильинаҕа, от бэлэмнээһинигэр бастаабыт Сергей Старостиҥҥа 100 л. дизельнэй оттук сертификатын туттарда. Оттон “Муҥурдаах” кооператив аатыттан махтал суруктарынан Полушкина Евдокия Васильевна, Никулин Валерий Васильевич уонна үрдүкү кылаас үөрэнээччилэрэ бэлиэтэннилэр. Оҕолор өссө кинилэргэ анаан оҥоһуллубут 2 минньигэс торду тутан үөрүүлэрэ үрдээтэ.
Оскуола оҕолоругар анаан кулууптар “Үлэ киһини киэргэтэр” уруһуй күрэһин ыыппыттара. 13 уруһуй дьон болҕомтотугар ыйаннылар. I миэстэ Ефимов Тима (IV кылаас), II - Соломов Рома (III кыл.), III - Старостина Арина (III кылаас) буолан, бириистэргэ тигистилэр.
Тэрийээччилэр нэһилиэнньэ көхтөөхтүк кыттыбытын бэлиэтээтилэр. Көрөөччү да, кыттааччы элбэх, саала иһэ толору дьон мустан бырааһынньык өрө көтөҕүллүүлээхтик ааста.
Комментарии
Авторизация на сайте через социальные сети