- Маҥнайгы миэстэни уонна 15 тыһ. солк. суумалаах харчынан бириэмийэни Татьяна уонна Валерий Федоровтар дьиэ кэргэттэригэр биэрдилэр. В.А. уонна Н.В. Захаровтар дьиэ кэргэттэрэ (10 тыһ. солк. бириэмийэ) иккис буолла. Үһүс миэстэҕэ Екатерина уонна Александр Шмаковтар (5 тыһ. солк. бириэмийэ) тигистилэр. Биһирэм бириис Наталия уонна Егор Егоровтар дьиэ кэргэҥҥэ бэрилиннэ.
- Федоровтар дьиэ кэргэн Мэҥэ Алдаҥҥа олороллор. Валерий Васильевич бэйэтин кэмигэр Өлүөхүмэтээҕи тыа хаһаайыстыбатын механизациялааһын уонна электрофикациялааһын техникумун бүтэрбитэ. Кини совхозка үлэлээбитэ, Мэҥэ Алдан орто оскуолатыгар производственнай үөрэхтээһин чааһыгар маастардаабыта. 2011 с. оскуола базатыгар тэриллибит "Аргыс" ТХПК салайааччытынан үлэлиир. Коллектив оҕуруот аһын уонна туорахтаах культураны үүннэриинэн дьарыктанар. Татьяна Иннокентьевна билигин бочуоттаах сынньалаҥҥа олорор.
- Валерий Васильевич туохха барытыгар дьоҕурдаах. Тэлгэһэлэригэр верандалаах икки дьиэлээхтэр, хаһаайыстыбаннай тутуулартан баанньык, душ, хотон, курятник, комбикорма уурар лаабыс-сарай, гараас, уот бардаҕына күөстэнэргэ «нуучча оһоҕо» бааллар. Кинилэр подвалларынан бэйэлэрэ эрэ буолбакка, ыаллара, аймахтара, доҕотторо туһаналлар. Кэтэх хаһаайыстыбаларыгар ынах сүөһүнү, сылгыны, кууруссаны туталлар уонна ыттаахтар.
- Теплицалара, оҕуруоттара төгүрүк сылы быһа аһатар. Техникаттан прицептээх МТЗ-82 трактор, таһаҕас массыыната баар.
- Мэҥэ Алдан үгүс олохтоохторун курдук, Федоровтар тэлгэһэлэригэр кырата суох саадтаахтар. Татьяна Иннокентьевна сибэкки олордорун сөбүлүүр.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети