ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
30 декабря 2015, 15:37

Мэҥэ Алдаҥҥа аҕыс муннуктаах Арчы дьиэтэ аһылынна


Быйыл Томпо улууһун нэһилиэктэригэр элбэх олорор дьиэ-уот тутулунна, Дьабарыкы Хайаҕа улахан кыамталаах хочуолунай үлэҕэ киирдэ. Аны 2015 сыл бүтүүтүн тилэх баттаһа Мэҥэ Алдаҥҥа аҕыс муннуктаах Арчы дьиэтэ олохтоохторго аанын тэлэччи аста.
photoByWidth&id=53389&width=1000
Томпо улууһун Мэҥэ Алдана кэрэ айылҕатынан, кэрэмэс дьонунан биллэр. Ол курдук, хатыҥ чараҥ тулалаах сардааналаах сыһыыларга сырылас күн уотугар сыламнаан, Алдан, Амма ыраас күөх ууларыгар умсаахтаан сириэдийэн тахсыбыттара саха народнай суруйааччыта Егор Неймохов, дуулаҕа күүстээх мадьынылар Петр Колодезников, ини-бии Афанасий уонна Петр Саввиннар, Александр Захаров, көҥүл тустууга ССРС сүүмэрдэммит хамаандатын чилиэнэ, норуоттар икки ардыларынааҕы кылаастаах спорт маастара Михаил Протопопов, кик-боксиҥҥа аан дойду чемпиона Иннокентий Макаров, үлэ-үөрэх бастыҥнара. Манна үлэлээбитэ саха дьахталларыттан соҕотох өрөспүүбүлүкэ вице-президенэ, билигин ХИФУ ректора Евгения Исаевна Михайлова.
photoByWidth&id=53387&width=1000
Мэҥэ Алдаҥҥа аҕыс муннуктаах Арчы дьиэтин аһар үөрүүлээх тэрээһиҥҥэ бу туутуга элбэх көмөнү оҥорбут улуус баһылыга Георгий Герасимов, райсовет председателэ Илья Шадрин, Томпо-Таатта уокуругуттан Ил Түмэн дьокутаата Дмитрий Саввин, Егор Неймохов кэргэнэ Мария Петровна кыттыыны ыллылар. Улахан көмөнү ХИФУ ректора Евгения Михайлова, Таатта-Томпо уокуругуттан Ил Түмэн дьокутаата, «Саха» НКИК салайааччыта Иван Андросов оҥордулар. Үөрүүнү үллэстэ Мария Петровна эдьиийэ СР народнай артыыската Зоя Багынанова кэлбит.
Тутааччылар Софрон Захаров, Станислав Алексеев уонна Артем Третьяков үлэни тиһэҕэр диэри тиэрдибиттэр. Ол курдук, Софрон сваркалыыр уонна уот тардар үлэни барытын оҥорбут. Киниэхэ олохтоохтортон Иван Сыромятников сваркалыырга көмөлөспүт. Дьиэҕэ ититиини киллэрэргэ ОДьКХ Томпотооҕу филиалын директора Мухитдин Якупов уонна Мэҥэ Алданнааҕы учаастак салайааччыта Валерий Колодезников улахан көмөнү оҥорбуттар. Бу дьиэни үлэҕэ киллэрэргэ Николай Колодезников аатынан Культура киинин салайааччыта Елена Степанова улус киининэн, Дьокуускайынан элбэхтик сүүрдэ-көттө, сыратын-сылбатын биэрдэ диэн тыл этээччилэр бары бэлиэтээтилэр.
Бу дьиэҕэ инникитин саха народнай суруйааччыта Егор Неймохов аатынан түмэл үлэлиэҕэ. Мэҥэ Алдан дьоно-сэргэтэ эрэ буолбакка улуус дьоно сылдьан төрүт үгэстэрбитин үөрэтиэхпит, билиэхпит.
При частичном или полном использовании материалов гиперссылка на сайт ysia.ru обязательна.
Категория: Территория Просмотров: 1027 Источник: ЯСИА Автор: Евдокия Неустроева Изображение: Евдокия Неустроева Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ