Ахсынньы 2 күнүгэр баһылыгы экономикаҕа уонна инновационнай политикаҕа солбуйааччы Максим Прокопьев салайааччылаах иккис бөлөх Уһун Күөл, Тойбохой, Аллыҥа нэһилиэктэринэн сырытта. Маҥнай Уһун Күөл нэһилиэгэр, олохтоох «Сарыал» КК тиийдибит. Мунньаҕы нэһилиэк баһылыга В.Г. Григорьев салайан ыытта. Үгэс курдук бастаан баһылыгы экономикаҕа солбуйааччы Максим Прокопьев олохтоохтор иннилэригэр бу сыл Сунтаар улууһугар туох-ханнык үлэ барбытын туһунан отчуоттаата.
Мунньахха 48 киһи сырытта. Отчуот кэнниттэн олохтоохтор ыйыттыыларыгар эппиэттээтилэр. Бэтэрээн учуутал Н.А. Иванов хотон туттубут фермердергэ улуус төлүүр, оттон нэһилиэк бюджетыттан харчы эбии көрүллэр дуо, нэһилиэк участковай балыыһатыгар куойка миэстэтэ эбиллиэ дуо, итиэннэ Табаҕа бурдугун ыһыыта кэҥиир кыахтаах дуо диэн ыйыталаста. Манна Максим Прокопьев бу курдук хоруйдаата: «Улахан нэһилиэктэр бюджеттарыттан көрөн көмөлөһөллөр. Эһиилгиттэн Тыа хаһаайыстыбатын туһунан сокуон олоххо киирдэҕинэ, нэһилиэктэр тыа хаһаайыстыбатын салайар, төһө баҕарар сууманы бэйэлэрин бюджетыттарыттан көрөр бырааптаналлар. Табаҕа туһунан этэр буоллахха, бу саас тыа хаһаайыстыбатын миниистирэ кэлэ сырыттаҕына сөргүтүөххэ диэн быһаарыммыппыт. Быйыл элбэх функциялаах комбайн ыллыбыт. Сыаната 5 мөл. солк. Эһиилги сылга сири оҥорууга улуус бюджетыттан элбэх харчы көрүллүөҕэ». Олохтоох балыыһаҕа куойка миэстэ тиийбэтин туһунан боппуруоска улуус кылаабынай бырааһын солбуйааччы Е.В. Николаев харчы көрүллүүтэ кыра, ол иһин улуус үрдүнэн куойка миэстэлэри аҕыйата тураллар диэн эппиэттээтэ. Максим Прокопьев «Куойка миэстэни нэһилиэнньэ ахсааныттан көрөллөр, ырааҕын-чугаһын көрбөттөр. Оннооҕор Сунтаарга куойка миэстэни аҕыйата тураллар. Итиннэ барытыгар биһиги бэйэбит буруйдаахпыт. Тоҕо диэтэххэ, дуогабара суох, «холтууралаан» үлэлиир эбэтэр кэмбиэринэн хамнас ылар дьон сыллата элбээн иһэллэр. Итинник түгэҥҥэ пенсионнайга, страховой уонна социальнай пуондаларга харчы киирбэт. Ол иһин, олохтоохтор контрактаһан, дуогабардаһан үлэлии сатыахтаахпыт,” -- диэн бэрт судургутук эбэн эттэ. Нэһилиэк ытык кырдьаҕаһа Н.А. Егоров саҥа федеральнай сокуонунан 5 га сир бэриллэринэн, хас биирдии оҕотугар 1 га сири атын оройуоҥҥа ыларга туруорсуохпун сөп дуо диэн туоһуласта. Итиннэ Максим Михайлович киэҥ хоруйу биэрэн, олохтоохторго сокуон барылын судургутук өйдөттө. Ити курдук олохтоохтор ыйыталаһар боппуруостара элбэх. Ордук доруобуйа харыстабылыгар, тыа хаһаайыстыбатыгар сыһыаннаах элбэх боппуруос киирдэ.
Салгыы Тойбохой нэһилиэгэр тиийдибит. Г.Е. Бессонов музейын аактабай саалатыгар олохтоохтор тоҕуоруһа мустубуттар. Мунньахха улуус кылаабынай бырааһа И.В. Попов бэйэтэ кэлэн, дьон-аймах кыһалҕатын билистэ, туһааннаах боппуруостарга хоруйдаата. Тойбохой орто оскуолатын дириэктэрэ Б.Н. Васильев оскуолаҕа капитальнай өрөмүөн ыытар наадатын туһунан эттэ. Максим Михайлович уонна тутуу управлениетын начальнигын солбуйааччы Анатолий Тимофеев бу боппуруоһу быһаарыахпыт, сиһилии кэпсэтиэхпит диэн хоруйдаатылар. Маны тэҥэ, нэһилиэк баһылыга С.В. Егоров кулууп хаһан тутулларын, былааҥҥа баарын-суоҕун туһунан туоһуласта. Манна Анатолий Тимофеев «Үтүө дьыала» былааныгар баарын туһунан иһитиннэрдэ, ол эрэн бу кэлэр сылга буолбакка, 2017 сылга былааннанар диэтэ.
Тойбохойдор сүрүн кыһалҕаларынан иһэр уу боппуруоһа буолар. Сайын үгүс дьон ардах уутун, итиэннэ сөтүөлүүр күөллэриттэн уу баһан иһэллэр эбит. Урут Ойбон күөлтэн иһэ сылдьыбыт эбит буоллахпытына, кэлин онтон чугас уоҕурдуу бөҕөтө ыһыллан, үөспүт тааһыран, ис уоргаммыт ыалдьан олоробут дииллэр олохтоохтор. Онон олохтоохтор сир анныттан уу ыларга эбэтэр ууну ыраастыыр аппараат ыларга туруорсаллар. Манна Максим Прокопьев сөптөөх хоруйу биэрэн, инникитин бу кыһалҕа быһаарыллыа диэн олохтоохторго эрэннэрдэ.
Маны сэрг, тойбохойдор уот төлөбүрүн туһунан туоһуластылар. Сунтаардааҕы РЭС кылаабынай инженерэ Ю.В. Возненко иһитиннэрбитинэн, ый аайы уот счетчигын сыыппаратын төлөпүөнүнэн бэриллиэхтээх диэн иһитиннэрдэ. Аны үксүлэрэ уот харчытын төлүү иликтэр эбит.
Олохтоохтор саҥа оҕо уһуйаанын уонна участковай балыыһа дьиэтин тутарга туруорсаллар. Улуус кылаабынай бырааһа И.В. Поповка элбэх боппуруос киирдэ.
Аллыҥаҕа мунньаҕы нэһилиэк баһылыга Н.В. Спиридонов салайан ыытта. Манна эбии ОДьКХ кылаабынай экономиһа А.П. Григорьев кытынна. Отчуот кэнниттэн, олохтоохтор боппуруостарын биир-биир биэрэн истилэр. Банковскай терминал киириэ дуо диэн ыйыталастылар. Манна Максим Ми-хайлович бу боппуруос сытыырхайбытын, Сбербанк нэһилиэнньэ кыратын иһин терминал туруоруллубат диэн этэрин туһунан иһитиннэрдэ. “Алмаасэргиэнбааны” кытары үлэлэһэбит, сыыйа-баайа нэһилиэктэргэ терминал туруоҕа диэн хоруйдаата. Итиэннэ оскуола дириэктэрэ Т.С. Иванова Аллыҥа орто оскуолата агро-оскуола хайысхатынан үлэлэтэр баҕалааҕын туһунан эттэ. Оҕону үлэҕэ үөрэтэргэ үлэлэһэрин туһунан иһитиннэрдэ. Маны сэргэ олохтоохтор биэлсэр наадатын туһунан эттилэр.
Нэһилиэк олохтоохторо кыһалҕалара, биллэн турар, элбэх. Улуус дьаһалтатын сыллааҕы отчуотун Уһун Күөл, Тойбохой, Аллыҥа олохтоохторо бары биһирээтилэр. Үлэ-хамнас сөптөөхтүк бара турарын туһунан санааларын эттилэр.
Комментарии
Авторизация на сайте через социальные сети