Улуус муниципалитетын дьаһалтатын пресс-сулууспатын салайааччыта Саргылаана Федорова иһитиннэрбитинэн, үп кырыымчыгынан сибээстээн, билигин суолу оҥоруу үлэтэ тохтоон турар. Ол эрээри, бу күннэргэ асфальт суолу оҥорорго биир сонун хайысха тобулунна. Улууска соҕотох суол оҥорор тэрилтэ - "Вилюйавтодор" элбэх харчылаах бырайыакка үлэлэһэр кыаҕа суоҕунан сибээстээн, салгыы тэрилтэ сайдар суолун кэтээн көрөн, суоттаан-учуоттаан баран, өрөспүүбүлүкэтээҕи Инвестиционнай хампаанньа (ӨИХ) иһинэн бөдөҥ холдинг тэрилиннэ. Холдиҥҥа «Вилюйавтодор» тэрилтэни кытта «Хаҥалас суоллара» уонна «Аммаавтодор» тэрилтэлэр холбостулар. Тэрилтэ салайааччытынан ньурбалар биир дойдулаахтара, Өҥөлдьөттөн төрүттээх Ариан Сидоров ананна.
Холдинг быйыл бастакы 180 мөл. солк. суумалаах бөдөҥ бырайыагы олоххо киллэрии куонкуруһугар кыайан, Нам улууһугар асфальт оҥоһуутугар үлэлиир буолла. Оттон ньурбалар суолларын асфаллатар сыалтан саҥа тэриллибит холдиҥҥа асфальт мобильнай собуотун биир сыл болдьохтоон арендаҕа биэрэргэ быһаардылар. Ол курдук, улуус дьаһалтатын баһылыга Борис Попов бэлиэтииринэн, холдины кытта сөбүлэһии сүрүн ис хоһооно -- кэлэр сылтан саҕалаан Ньурба куоракка 10-15 км усталаах кытаанах бүрүөһүннээх суол оҥоһуллуохтаах. 1 км асфальт суолу оҥоруу сыаната ортотунан -- 30 мөл.солк. Маннык үбү оройуон бюджета тута уйумматын өйдөөн, холдинг салайааччыта Ариан Сидоров асфальт суолу оҥоруу төлөбүрүн 5 сыл устата төлүүргэ сөбүлэстэ.
Бу күннэргэ холдинг салалтата мобильнай собуоту Нам улууһугар илдьэн таҥыаҕа. Онно үлэни бүтэрээт, собуоту төттөрү Ньурбаҕа аҕалан, куорат уулуссаларын асфаллааһыҥҥа туттуохтара.
Комментарии
Авторизация на сайте через социальные сети