ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
16 июня 2015, 18:21

Өлөөҥҥө Станислав Семенов сырдык кэриэһигэр анаммыт гитаранан ырыа күрэһэ буолла

«Мин эйигин көрө иликпин, ол эрэн эмиэ көрбүт курдукпун…» диэн саха поэтессата хомоҕой хоһоонугар хоһуйбутунуу, бу чуумпу киэһэлэргэ эйигинниин, миэхэ биллибэт ырыаһыттыын, истиҥ иэйиилээх ырыа нөҥүө билсибиппин баалаама дуу… Билистим… тапталтан мунчаарыы, долгуйуу, кэрэҕэ тардыһыы, олох дьикти түгэннэрин тустарынан ырыа гынан көччөх көтүппүт матыыптаргыттан, хос иһин толорбут аудиодискэттэн ыраас куоласкын истэммин, ыра санаа ырыалардаах кинигэҕиттэн дьылҕаҥ анаабыт олоҕун ааҕаммын, сырдык кэриэскэр анаммыт гитарнай ырыа күөн күрэһиттэн.

 

photoByWidth&id=36889&width=1000

Дьэлиҥдэттэн төрүттээх Өлөөн оройуонунааҕы сахалыы ырыа күрэҕин авторскай ырыаҕа номинациятын кыайыылааҕа, республикатааҕы «Этигэн хомус» күрэс номинана, истиҥ иэйиилээх ырыаһыт-автор Станислав Семенов сырдык кэриэһигэр анаммыт II-с оройуоннааҕы «Сүрэхпин долгутан гитара тыаһыыр» күрэс «Мин таптыыр Өлөөнүм» диэн нарын-намчы үҥкүүнэн саҕаланна.

Илкит культурнай киин саалатын толору мустубут көрөөччүлэр, ыалдьыттар күрэс 12 кыттааччытын дохсун ытыс тыаһынан эҕэрдэлии көрүстүлэр. Ол курдук, Өлөөнтөн Леонид Суздалов, Дария Васильева, Чингиз Сергеев, Семен Федоров, Айталина Винокурова, Светлана Николаева, Паша Егорова, Күндээрэ Тарабукина, Владимир Николаев, Кирбэй нэһилиэгиттэн Тимур Корякин, Оксана Алексеева, Афанасий Зорькин бастаан мелодист Стас Семенов ырыаларын ыллаан сүрэҕи долгуттулар. «Мин таптыыр Өлөөнүм», «Саҥа дьыл», «Саргылаана», «Уһугунна ньургуһун», «Бырастыы», «Хара харах» о.д.а. ырыалары көрөөччүлэр иһийэн олорон иһиттилэр. Бу дьикти түгэннэргэ бары да санаатыбыт, гитара алыптаах матыыбын Сэргэлээх уопсайдарыгар абылатан олорон истэрбитин, ыраас тапталтан кынаттанан көтөрбүтүн, мунчааран үөһээ тыынан да ыларбытын, кэрэ кыысчаан хара харахтарын, эдэр саас хатыламмат кэрэ кэмнэрин. Оттон Станиславтыын биир кылааска үөрэммит оҕолор атастарынаан таас хайа биэрэгэр күүлэйдээбитэрин, уйан дууһалаах, талааннаах доҕотторунаан алтыспыттарын бу олорон истэригэр санаан-ахтан ыллылар.

«Стас оскуолаҕа үөрэнэр сылларыгар оскуола культурнай олоҕор актыыбынайдык кыттара. 1986 сыллаахха республикаҕа культура уонна спорт эстафетата ыытыллыбыта. Өлөөҥҥө Булуҥ оройуонун делегацията кэлэн эстафетаны туттарбыта, онтон Өлөөн оройуона Горнай оройуонугар эстафетаны туттарбыппыт. Делегация састаабыгар киирсэн Станислав спорка уонна концерка ситиһиилээхтик кыттыбыта. Онтон саас, кулун тутар ыйга, Дьокуускай куоракка буолбут «Славим партию родную» диэн республикатааҕы фестивальтан «Орончикан» ансаамбылы кытта кыайыы-хотуу аргыстаах, дойдуларыгар лауреат үрдүк аатын сүгэн кэлбиттэрэ 1989 сыллаахха Стас 1-кы оройуоннааҕы сахалыы ырыа фестивалын аһыллыыта буолара биир күн хаалтын кэннэ «Сүрэхтэр кэпсэтэр кэмнэрэ» II-с туругар анаан мелодия айбыта, ону ийэтигэр хоһоон тыла наада диэбитигэр Мария Николаевна биир түүн иһигэр суруйан «Мин таптыыр Өлөөнүм» диэн ырыа хоһооно буолан тахсыбыта», -- диэн тапталлаах эдьиийэ, улуустааҕы культура управлениетын начальнига Надежда Николаева кинигэҕэ ахтар.

Салгыы иккис түһүмэххэ гитарнай ырыаны толорооччулар саха мелодистарын ырыаларынан кытыннылар. Кыттааччылар сценаҕа уобарастарын толору арыйдылар, ырыаны көрөөччүгэ тиэрдэр сатабылларын астына көрдүбүт. Ордук Семен Федоров, Владимир Николаев, Айталина Винокурова, Тимур Корякин, Паша Егорова, Күндээрэ Тарабукина толоруулара үөртэ.

1992 сыллаахха Дьокуускай куоракка көһөн, Алексей Павлов салайааччылаах «Наара суохтар» саха эстрадатын филармониятын иһинэн үлэлиир көр-күлүү театрыгар звукооператорынан үлэлээбитэ. Бу кэмҥэ Стас уонча ырыаламмытын истэн, магнитнай альбом оҥорор санаа киирэн, кэргэммин кытта сүбэлэһэн баран, Москва куоракка таһаартарбыппыт. Мин билигин олоҕум аргыһыгар Алексей Афанасьевичка махтанабын, бэйэбит дьиэ кэргэммит бюджетынан таһаартарарга күүс-көмө буолбутугар. Ол саҕана итинник толкуй киирбэтэҕэ буоллар, баҕар быраатым ырыалара суох да буолуохтар эбит. Наһаа нарын-намчы, истиҥ ырыалара билигин баалларыттан махталым муҥура суох. Инньэ гынан «Барыны киэргэтэр сырдыктаа» диэн альбом күн сирин көрбүтэ. 2001-2003 сылларга Культура уонна искусство колледжыгар, эстраднай вокал салаатыгар Егор Ильич уонна Светлана Александровна Неустроевтар курстарын ситиһиилээхтик үөрэнэн бүтэрбитэ. (Кинигэттэн ылылынна).

Ырыа күрэһин түмүгүнэн Гран-при хаһаайынынан Өлөөнтөн Владимир Николаев буолла. Киниэхэ Өлөөн орто оскуолатын 1986 сыллааҕы выпускниктарын бирииһэ - акустическай гитара туттарылынна. Бастакы степеннээх лауреат Семен Федоровка Станислав Семенов бииргэ төрөөбүт эдьиийин дьиэ кэргэнэ Валентина, Сулустаан, Айал Семеновтар гитара бэлэхтээтилэр. Иккис степеннээх лауреакка Айталина Винокуроваҕа «Строитель» МУП директора Иван Солдатов эмиэ гитара бирииһин туттарда. Маннык акустическай гитараны үһүс степеннээх лауреат Паша Егорова тутан үөрүү-көтүү өрөгөйүн биллэ. Бу бирииһи Стас эдэр сааһын доҕоро Игорь Сергеев дьиэ кэргэттэрэ олохтоотулар.

Бастакы степеннээх дипломанынан Тимур Корякин, иккис степеннээх дипломанынан Оксана Алексеева, үһүс степеннээх дипломанынан Чингиз Сергеев, «Стас Семенов ырыатын бастыҥ толорооччу» номинация кыайыылааҕынан Күндээрэ Тарабукина, «Кэскиллээх ырыаһыт» кыайыылааҕынан Дария Васильева, «Истиҥ иэйиилээх ырыа иһин» номинацияны Леонид Суздалов, «Бастыҥ музыкальнай киэргэтии» номинация кыайыылааҕынан Светлана Николаева, «Киһиэхэ – төрөөбүт дойдута» номинация кыайыылааҕынан Афанасий Зорькин буоллулар. Дипломаннарга, номинаннарга сыаналаах бэлэхтэр, харчынан бириистэр туттарылыннылар. Оттон мелодист Стас Семенов бииргэ үөрэммит оҕолоро тутуспутунан сценаҕа тахсан үөрэн-көтөн, дьоро киэһэни тэрийээччилэргэ махтанан ырыа ыллаан көрөөччүлэр сүргэлэрин өссө көтөхтүлэр.

Надежда Прокопьевна быраатын төрөөбүт күнүгэр, бэс ыйын 11-гэр, ыытыллыбыт кини сырдык кэриэһигэр анаммыт ырыа күрэһин туһунан бэйэтин санаатын үллэһиннэ.

- Бу 12 ырыаһыт кыттыбыта символичнай үтүө чинчилээх бэлиэ дии саныыбын. Гитара доҕуһуолунан ырыа Өлөөҥҥө 70-сыллартан сайдан барбыта үтүө түмүктэрдээх. Ол курдук, урукку оҕолор гитараны доҕор оҥостубуттара, кэнники даҕаны сүрэхтэригэр-быардарыгар иҥэрэн ыллыы-туойа, бэйэлэрин эйгэлэрин ырыанан үөрдэ сылдьаллар. Спонсордарбытыгар махтанабын. Дьокуускайга баар табаарыстара уонна маннааҕы үөлээннээхтэрэ өйөөтүлэр. Күрэс ыытыллыытыгар көмөлөспүт дьонтон наһаа үөрдүм. Өлөөн олохтоохторо амарах санаалаахтар, уйан дууһалаахтарын бу күрэс итэҕэттэ. Ол курдук, аудиодиискэни предприниматель Мария Караваева спонсордаата. Диискэни устар аппаратуратынан аан бастаан Стас ырыаларын таһаарбытыгар махтанабын. Бииргэ үөрэммит үөлээннэхтэрэ Гран-при бирииһин бэйэлэрэ туруордулар. Уонна «Ол күн ньургуһун үүммүтэ» диэн быраатым Станислав Семенов ырыаларын ноталаммыт хомуурунньугун таһаарыыга дизайн-макетын таҥан оҥорбут бырааппытыгар Семен Семеновка, уһуйбут учууталларыгар Светлана, Егор Неустроевтарга, кэргэнигэр Евдокия Семеноваҕа уонна талааннаах музыкаҥҥа Афанасий Томскайга дириҥ махталбын тиэрдэбин.

Махтал эйиэхэ, чаҕылхай Өлөөн талааныгар, өй-сүрэх долгуйар күүрүүтүн, дууһа кылларын таарыйар таба туппут матыыптаргар, сырдык ахтылҕан буолан бу күннэргэ дьоҥҥун-сэргэҕин оргууй кууһан ааспыккар

При частичном или полном использовании материалов гиперссылка на сайт ysia.ru обязательна.
Категория: Культура Просмотров: 1047 Источник: ЯСИА Автор: Гуннара Ороһуунускайа Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ