Саха сиригэр арыгылааһын, хомойуох иһин, олус киэҥник тарҕанна. Аны кэнники сылларга наркомания эбиллибитэ балаһыанньаны уустугурдар.
Конференция ыалдьыта, Россия Доруобуйаҕа харыстабылын министиэристибэтин кылаабынай психиатр-нарколога Евгений Брюн арыгылааһыны сэрэтии 4 чахчыны (арыгы бородууксуйатын рыногын атыылыыр сирин, бириэмэтин, сыанатын уонна атыыланарга көҥүллэнэр сааһын аччатыыны) кытары сибээстээҕин тоһоҕолоон бэлиэтээтэ. Профессор арыгыны анал маҕаһыыннартан ураты сиргэ атыылааһыны бобор туһунан Саха сирэ ылыммыт сокуонун уонна бириэмэтин хааччахтыыр регламены олус үчүгэй уонна сөптөөх көҕүлээһининэн сыаналаата уонна атын регионнарга тарҕанарыгар баҕа санаатын эттэ:
– Сэрэтии үлэтин төрөппүттэртэн саҕалыахха наада. Оҕолор үксүгэр төрөппүттэрин итирик туруктаахтарын көрөллөр уонна ону бырааһынньыгы, көрү-нары кытары сибээстииллэр. Бэйэлэрин дьиэ кэргэттэригэр туох буоларын кэлин хатылыыллар, сүһэн ылаллар.
Уопсайынан, Россияҕа наркотиктан тутулуктаах дьон ахсаана элбии турар. Кэнники сылларга саҥа стимулятордары уонна спайстары туһанар буоланнар, наркомания атын ыарахан уонна өр эмтэниллэр көрүҥэр ылларбыт дьон балыыһаҕа киирэрэр элбээтэ. Ити туһунан Уһук Илиҥҥи федеральнай уокурук кылаабынай психиатр-нарколога Людмила Михалева: «Саҥа ыарыһахтар элбээһиннэрэ Уһук Илиҥҥи региоҥҥа бэлиэтэннэ. Саха сиригэр наркоманнар ахсааннара элбээтэ. Бу – кутталлаах көстүү. Онон мин, эһиги региоҥҥутун наркомания боппуруоһа турбат регионыгар киллэрэр кыаҕым суох», – диэн этиитэ толкуйдатар.
«Биһиги арыгылааһыны аҕыйатар суоллары тобулууга болҕомтобутун уҕарыппакка, научнай өттүнэн көрдүөхтээхпит. Урут наркомания Мирнэй, Ленскэй, Алдан, Дьокуускай курдук куораттарга эрэ баар диир буоллахпытына, билигин токсикомания уонна наркомания өрөспүүбүлүкэ 14 улууһугар бэлиэтэннэ. Өссө биһиги билбэппитинэн, төһөлөөх токсикоман, наркоман бэйэтигэр бүгэн сылдьара буолуой? Онон бу сыыппара өссө улаатыан сөп. Биир сокуонунан кыайан боппоккун. Арыгыга уруккуттан ылларбыт уонна наадыйдаҕына булан баран төннөр нэһилиэнньэ араҥата баар. Онон сокуон ыччаты харыстыырга ананар», – диэн наркология өрөспүүбүлүкэтээҕи диспансерын кылаабынай бырааһа Петр Тумусов долгуйарын биллэрдэ.
Манна даҕатан эттэххэ, билигин өрөспүүбүлүкэтээҕи диспансер алта тус-туспа дьиэнэн үлэлиир. Улахан эрэл – сменаҕа 50 киһи сылдьар, 150 куойкалаах саҥа диспансеры тутууга.
Комментарии
Авторизация на сайте через социальные сети