Эбэҥки норуотун төрүт бырааһынньыгын сиэрин-туомун тутуһан «Ыраастаныы» туома ыытыллыбытын кэнниттэн, оройуон биир аҕа саастаах олохтооҕо, эбэҥки норуотун культуратын тарҕатааччы, үөрэтээччи, Саха Өрөспүүбүлүкэтин культуратын үтүөлээх үлэһитэ Мария Афанасьевна Анисимова алгыс аанын аһан Бакалдын бырааһынньыгы арыйда.
Харыйалаах сэлиэнньэтин үөрэнээччилэрин национальнай таҥастаах үҥкүүһүттэрин бөлөҕө эбэҥки норуотун хоһуун дьонун көрдөрөр үҥкүүтүнэн мустубут ыалдьыттары эҕэрдэлээтэ. Бакалдын бырааһынньыгы үөрүүлээхтик арыйыыга оройуон дьаһалтатын баһылыга Александр Иванов, оройуон Сэбиэтин «Суглан» бэрэссэдээтэлэ Зоя Григорьева, культура уонна духуобунай сайдыы оройуоннааҕы салаатын салайааччыта Надежда Николаева, Кирбэй национальнай нэһилиэгин дьаһалтатын баһылыгын солбуйааччы Оксана Алексеева, нэһилиэк кырдьаҕастарын сэбиэтин бэрэссэдээтэлэ Наталья Типянова бар дьону эҕэрдэлээтилэр.
Эбэҥки норуотун төрүт үтүө үгэстэрин тилиннэрэн, Кирбэй нэһилиэгин булчуттара Байанай бэлэх ууммут табатын этин Бакалдын аҕа саастаах кыттааччыларыгар бэлэх уунаннар үөрүүлэрин үрдэттилэр, олох сайдарыгар, доруобуйалара тупсарыгар эрэллэрин күүһүртүлэр. Кырдьаҕастар, үтүө үтүөнэн төлөнөр диэн, Кирбэй түбэтин булчуттарыгар инникитин даҕаны Баай Байанайдара күлүм аллайдын, үтүө хараҕынан көрдүн, аал уоттара куруутун сандаара турдун диэн кэс тылларын тиэртилэр.
Салгыы «Алакуо», «Дьүөгэ», «Олоҥдо» түмсүүлэр, Харыйалаах кийииттэрин түмсүүтэ, «Эдэр ийэлэр» түмсүү, «Кэрэчээнэ» уһуйаан иитиллээччилэрэ уонна да атын талааннаах ыччаттар ыллаан, үҥкүүлээн үөрүүнү-көтүүнү үксэттилэр.
Спорт национальнай көрүҥнэригэр – хапсаҕайга, чэпчэки атлетикаҕа, наартаны ойууга күрэхтэһиилэр тэриллэннэр эдэр ыччат күрэс былдьаста, аҕам саастаахтар спорт араас көрүҥнэринэн дьарыктаммыт үтүө күннэрин ахтан-санаан, күрэстэһээччилэргэ көх-нэм буоллулар.
Маны тэҥэ национальнай таҥаска куонкурустар тэриллэн ыытылыннылар. Түһүлэгэлэринэн ас-үөл толору тардыллан, бырааһынньык кыттыылаахтара эбэҥки куукунатын дьиҥнээх сибиэһэй аһынан күндүлэннилэр.
Харыйалаах түбэтигэр өргө диэри ырыа-тойук эйээрдэ.
Комментарии
Авторизация на сайте через социальные сети