Пресс-конференцияны «Нам улууһа» МТ баһылыгын солбуйааччы Инна Сивцева уонна спорка уонна физическэй культураҕа управление начальнига Павел Иванов иилээн-саҕалаан ыыттылар.
Анатолий Гладков ыйааһыныгар Вайс Ромаркы (АХШ), Лаша Коппалианины (Грузия), Султан Агаевы (Азербайджан) баһыйан эрэллээхтик бастаабыт. Оттон Наталья Ким ирландка кэнниттэн үрүҥ көмүс призер буолан, улуустарыгар кыайыы үктэллээх эргиллибиттэр. Ол туһунан спортсменнарбыт бу курдук кэпсээтилэр:
Анатолий Гладков: «Республикаҕа бастааммын Россияҕа кыттар путевканы ылбытым. Оттон Россияҕа кыайан, дойду сүүмэрдэммит хамаандатыгар киирбитим. Бу күрэхтэһиини үс түһүмэҕинэн ыыттылар. Ол курдук, бастакы түһүмэх Киргизияҕа буолбута, онно 3 миэстэ буолан 10 балламмытым. Иккис түһүмэх Ереваҥҥа ыытыллыбытыгар 1 миэстэ буолан 16 балы ылбытым. Бу күрэхтэһиигэ холбуу Европа чемпионата ыытыллыбыта. Күрэхтэһии саамай тыҥааһыннаах финала Москваҕа Иван Ярыгин аатынан Тустуу дыбарыаһыгар буолбута. Манна эмиэ бастааммын 16 балламмытым. Онон — уопсайа 42 балланан аан дойду Кубогын хаһаайына буолары ситистим».
Наталья Ким: «Чемпионакка 37 дойдуттан 671 спортсмен кытынна. Саха сириттэн Россия сүүмэрдэммит хамаандатыгар Уус-Алдантан Алексей Аммосов, Мэҥэ-Хаҥаластан Николай Соловьев уонна Намтан мин баран ситиһиилээхтик кыттан кэллибит. Бары миэстэлэстибит. Мин иккис миэстэ буолбуппуттан олуһун үөрэбин, былырыын эмиэ иккис миэстэ буолбутум. Бастаабыт кыттааччыга техникабынан баһыйтарар эбиппин. Инникитин элбэхтик, дьаныардаахтык эрчиллиэххэ наада», - диэн спортсменнарбыт санааларын үллэһиннилэр.
Пресс-конференция кыттааччылара спортсменнарга инникитин өссө үрдүк ситиһиилэри, доруобуйаны, кэхтибэт санааны баҕардылар.
Комментарии
Авторизация на сайте через социальные сети