Ыччаты тыа хаһаайыстыбатыгар сыһыарыыга агрокластер диэн федеральнай программа материальнай-техническэй өртүнэн улахан төһүү буолуоҕун өйдөөн, Хараҕа олохтоох салалта ылсарга быһаарыммыт. Грант куонкуруһугар кыайан 1,5 мөлүйүөн суумалаах субсидияны ылан, эдэр фермердэр Михаил Егоров уонна Павел Иванов 50 сүөһү турар дьоҕус саҥа хотоннорун тутуннулар.
Саҥа тутуулары үөрүүлээхтик аһыы сиэригэр-туомугар оройуон баһылыгын бастакы солбуйааччы Павел Сазонов, тыа хаһаайыстыбатын управлениетын начальнига Иван Аргунов уонна нэһилиэк баһылыга Дария Назарова кытыннылар. Дария Ивановна олохтоох салалта аатыттан Эҕэрдэ суруктары туттартаата.
Павел Данилович инникитин сүөһүнү-аһы дэлэтэн, эт уонна үүт бородууксуйатын оҥорон таһаарыыны сайыннарарга үлэлэһэллэригэр баҕа санаатын эттэ.
Агрокластерга холбоспут «Мыла» бааһынай хаһаайыстыба (салайааччы Дмитрий Назаров) дьиэ кэргэн хаһаайыстыбатын тэриниигэ 3,5 мөлүйүөн суумалаах субсидия ылан базатыгар хотонун саҥардыбыт, саҥа техника атыыласпыт. Кэлэр сыллартан сүөһүлэрин эбии аһылыгынан хааччыйар сыалтан сири оҥоруунан өссө ылсан дьарыктанар, бааһынатын кэҥэтэр соруктаах. Хаһаайыстыба салайааччыта Дмитрий Назаров сэлиэһинэй бурдуктан оҥоһуллубут саламаатынан күндүлээтэ. Иван Аргунов Дмитрий Михайловичка эдэр бааһынайдарга холобур буолан таһаарыылаахтык үлэлииригэр баҕа санаатын эттэ.
Үс оҕолоох эдэр ыал Анна, Иван Петровтар тыа сиригэр эдэр специалистары дьиэнэн хааччыйыы программанан субсидияҕа тиксэннэр, саҥа дьиэ туттан киирдилэр. Икки этээстээх, 110 кв.м иэннээх дьиэ ‒ толору хааччыллыылаах, гаас ситимигэр холбоммут буолан сылаас, үөһэ этээскэ балконнаах. Аҕалара Иван Петров «Чүүйэ» МУП-ҕа зоотехнигынан үлэлиир. Онон Үрдьүҥэхтээххэ өссө биир саҥа тупсаҕай көстүүлээх дьиэ дьэндэйдэ. Кэлэр сылга эдэр ыал агрокластерынан хаһаайыстыбаларыгар Солуур диэн сири анатан хотон туттуохтара. Ынах сүөһүнү иитэн эдэр хаһаайын эт бородууксуйаны дэлэччи атыыга таһаарарга былааннанар.
Онон Хараҕа агрокластер ситиминэн түөрт хаһаайыстыба тигинэччи үлэлиэ-хамсыа. Сыллата өссө иккилии саҥа тэринэр бааһынай хаһаайыстыбаны холбоон улууска, республикаҕа тыа хаһаайыстыбатын сайдыытыгар төһүү буолар бигэ соруктаахтар. Онуоха олохтоох дьаһалта болҕомтотун, өйөбүлүн уурарга бэлэм.
‒ Агрокластерга холбоһуон баҕалаахтар баалларын үөрэ көрөбүт. Маннык хайысханы тутустахпытына инникитин нэһилиэккэ, улууска, республикаҕа даҕаны тыа хаһаайыстыбата сайдан барыа, көрдөрүүбүт түһүө суоҕа этэ диэн толкуйдуубут. Быйыл нэһилиэккэ үс кырдьаҕас ыал сүөһүлэрин-астарын эстилэр, ол гынан баран үс саҥа хаһаайыстыба үөскээбитэ үөрүүлээх. Сүөһү ахсаана кыратык эбилиннэ. Урукку сылларга нэһилиэк тыа хаһаайыстыбатыгар үрдүк көрдөрүүлээх этэ, инникитин ол холобурунан сайдан иһэр баҕалаахпыт. Билигин да сөргүтүллүбэккэ турар бааһыналарбыт элбэхтэр. Хаптаҕайга тутуллуохтаах сибиинньэ комплексыгар бааһыналарбытын сыһыаран сөргүтэр бүччүм санаалаахпыт, ‒ диэн баһылык Дария Назарова санаатын үллэһиннэ.
Харалар «Туйгун» агрокластер тэриллибитин эһиил үрдүк таһымнаахтык бэлиэтиир былааннаахтар.
Комментарии
Авторизация на сайте через социальные сети