Маннык санаалар от ыйын 10 күнүгэр Дьокуускайга «Гражданскай уопсастыба институттарын сайдыытыгар ийэ оруола» регионнар икки ардыларынааҕы конференция пленарнай мунньаҕар этилиннэ. Конференцияны Прасковья Борисова салайааччылаах регионнааҕы отделение көҕүлээн тэрийдэ.
Улахан дьаһалга РФ Федеральнай Мунньаҕын Федерациятын Сэбиэтин кэмитиэтин чилиэнэ, киһи быраабыгар боломуочунайы кытары хардарыта бииргэ үлэлээһиҥҥэ Федеральнай Мунньах Федерациятын Сэбиэтин боломуочуйалаах бэрэстэбиитэлэ, «Россия ийэлэрэ» Бүтүн Россиятааҕы уопсастыбаннай хамсааһын бэрэссэдээтэлэ Валентина Петренко уонна Ингушетияттан, Дагестантан, Бурятияттан, Приморье кыраайыттан, Архангельскай уобаластан, Мокваттан, Воронежтан, Ростовтан уо.д.а. регионнааҕы отделениелар бэрэстэбиитэллэрэ кытыннылар.
СӨ Судаарыстыбаннай Мунньаҕын (Ил Түмэн) вице-спикерэ Ольга Балабкина Саха сирэ оҕо быраабын туһунан сокуону ылыммыт Россия субъектарыттан биир бастакылара буоларын тоһоҕолоон бэлиэтээтэ. Вице-спикер эппитин курдук, төһө да уустуктар баалларын иһин, өрөспүүбүлүкэ бюджета мэлдьи социальнай хайысхатын сүтэрбэт.
«Россия ийэлэрэ» Бүтүн Россиятааҕы хамсааһын бэрэссэдэээлэ Валентина Петренко: «Саха сиринээҕи отделение сүҥкэн бырайыактары тылынан эрэ буолбакка, дьыаланан көрдөрөр. Биһиги төрөппүт эппиэтинэһин туһунан эһиги көҕүлээһиннэргитин өйүүбүт. Уопсастыбанньыктаргыт айымньылаахтык үлэлииллэр. Кинилэр баар кыһалҕаны ис-иһиттэн билэллэр, сиһилии үөрэтэллэр, ол иһин, чопчу этиилэри киллэрэллэр. Уопсастыбаннай хамсааһыннар сокуону оҥорор уорганнары кытары бииргэ үлэлиэхтээхтэр дии саныыбын», – диэтэ.
Валентина Петренко бэйэтин этиитигэр Украина боппуруоһугар абаран-сатаран туран тохтоото. Регионнааҕы отделениелар (ол иһигэр, Саха сиринээҕи) Украинаҕа оҕолор өлүүлэрин тохтоторго көрдөһөр илии баттааһыннары хомуйар Бүтүн Россиятааҕы акцияҕа кыттыбыттара.
СӨ бырабыыталыстыбатын бэрэссэдээтэлэ Галина Галина Данчикова эппитинэн, оҕо төрөөһүнүн ахсаанынан Саха Өрөспүүбүлүкэтэ Уһук Илиҥҥэ бастакы миэстэҕэ сылдьар. Саха сиригэр 17 тыһыынчаттан тахса элбэх оҕолоох ыал баар. Кэнники сылларга үстүү-түөртүү игирэни төрөтөр ийэлэр баар буоллулар. Кинилэри өрөспүүбүлүкэ өй-санаа уонна үп-харчы өттүнэн өйүүр. Саха сиригэр 20-тэн тахса уопсастыбаннай тэрилтэ ийэ уонна оҕо-аймах боппуруоһунан дьарыктанар, үлэлиир.
Дьиэ кэргэн, оҕо-аймах боппуруостарыгар ситиһиилээхтик үлэлиир ийэлэр, уопсастыбанньыктар үрдүк наҕараадалары туттулар. Кинилэр ортолоругар «Стерх» страховка компаниятын салайааччыта Галина Варфоломеева, доруобуйа харыстабылын куораттааҕы управлениетыттан Федора Бурнашева, Амматтан тыа хаһаайыстыбатын бэтэрээнэ Галина Лукина, территориятааҕы быыбар хамыыһыйатын бэрэссэдээтэлэ Алла Самойлова, «Россия ийэлэрэ» Мирнэйдээҕи салаатын кэллэктиибэ, Дьокуускайтан 10 оҕолоох ийэ Розалия Белолюбская, элбэх оҕолоох дьиэ кэргэттэр тэрилтэлэрин бэрэссэдээтэлэ Римма Горохова уо.д.а. бааллар.
2016 сылы Оҕо сылынан биллэрэргэ
Конференция түмүгэр ылыллыбыт этиилэртэн сорохторун кытта билистэххэ:
– «Россия ийэлэрэ» регионнааҕы отделение 2016 сылы РФ субъектарыгар Оҕо сылынан биллэрэри өйүүргэ;
– дьиэ кэргэн институтун бөҕөргөтүүгэ, тулаайах хаалыыны сэрэтиигэ хайысхаламмыт коммерческайа суох тэрилтэлэр үлэлэрин өйүүргэ;
- сокуоннай саастарын ситэ илик оҕолор, ийэлэр доруобуйаларын харыстабылын уонна олорор усулуобуйаларын тупсарыы боппуруоһун олохтоох салайыныы уорганнарын үлэлэлэрин дьоһун суолталаах хайысхаларынан ааҕарга уо.д.а.
Комментарии
Авторизация на сайте через социальные сети