Александр Богомоев тренерэ Валерий Иванов: «Балаҕан ыйыгар Лас-Вегаска буолар аан дойду чемпионатыгар бэлэмнэниини саҕалаатыбыт, онно үчүгэй түмүгү ситиһэн биир дойдулаахтарбытын, ыалдьааччыларбытын, спонсордарбытын үөрдүөхпүтүн баҕарабыт», - диэтэ.
Бурятия тустууга федерациятын президенэ Борис Будаев: «Бу чаҕылхай кыайыы. 1983 сылтан биһиэннэриттэн ким да Европа сүрүн күрэхтэһиилэригэр маннык ситиһиилэнэ илигэ. Саша куруутун кэриэтэ эриэ-дэхси тустууну көрдөрөр. Улахан түһүлгэлэргэ кыайыылартан кынаттанан кини аан дойду чемпионатыгар бэйэтигэр эрэллээх буолла», - диэн суруналыыстарга эттэ.
Физическэй культураҕа уонна спортка республикатааҕы агенство салайааччытын эбээһинэһин быстах кэмҥэ толорооччу Дмитрий Штепа Европа оонньууларын кыайыылаахтарыгар 500 тыһ. солк. бириэмийэ көрүллэрин иһитиннэрдэ. Бу Европа уонна Азия чемпионаттарын кыайыылаахтарын биһирээһин сууматын кытта тэҥ. Оттон аан дойду чемпионатыгар кыһыл көмүс, үрүҥ көмүс уонна боруонса мэтээллэри ылбыттарга республика бюджетыттан туһааннааҕынан 750, 500, 300 тыһ. солк. көрүллэр.
Baikal-daily.ru портал иһитиннэрэринэн, боксер Батор Сагалуевка Европа оонньууларыгар ситиһиитин иһин харчынан бириэмийэни сэргэ «Лада Гранта» массыына күлүүһэ туттарыллыбыт. Массыынаны Тункинскай оройуон олохтоохторо бэлэхтээбиттэр.
Бу иннинэ Россия чемпионатыгар кыайыытын иһин Александр Богомоевка спорт мецената Лев Асалханов саҥа биир хостоох квартираны бэлэхтээн турар.
Санатар буоллахха, Батор Сагалуев 49 кг диэри ыйааһыҥҥа биһиги Василий Егоровпытын кытта дойду сүүмэрдэммит хамаандатыгар сүрүн кандидатынан буолар.
Комментарии
Авторизация на сайте через социальные сети