Суут быһаарбытынан, бу дьыл бэс ыйын 14 күнүгэр 5 саастаах уолчаанын ийэ Өлүөхүмэ улууһун Бэс Күөл сэлиэнньэтигэр олорор аймахтарыгар сайылата ыыппыт. Ыал аҕата оҕону сөбүлээбэккэ, бэс ыйын 26 күнүттэн саҕалаан (уолчаан ол кэмҥэ 6 сааһын туолбут), араастаан муҥнаан барбыт -- тирии курунан, тимир буруһуунанан, электрическэй быанан төбөҕө, этигэр-сиинигэр бүтүннүү кырбыыр эбит. Ойоҕо киниттэн куттанар буолан, ону кимиэхэ да тыллаабакка, оҕону быраастарга көрдөрбөккө сылдьыбыт. Бу дьиккэр оҕону туох баар күүһүн туттан сордообут-атаҕастаабыт. Онуоха бары барыта сылтах буолар эбит – оҕо бытааннык аһыыра, математика суотун сыыһа ааҕара, киниттэн көҥүллэппэккэ эрэ аһыыра... Биирдэ уолчааны күүскэ анньыбытыгар, кэтэҕинэн туумбаҕа баран түспүт.
Атырдьах ыйын 6 күнүгэр уолчааҥҥа эмиэ хара күн үүммүт. Ылбыт эчэйиилэриттэн оҕо эрэйдээх сарсыныгар сырдык тыына быстаахтаабыт... Судмедэкспертиза быһаарбытынан, оһоҕоһо хайдан өлбүт.
Дьыаланы силиэстийэлээһин кэмигэр психолого-психиатрическай экспертиза ыытыллан, буруйданааччы психическэй өттүнэн доруобай, тугу гынарын өйдүү-өйдүү оҥорбут диэн быһаарыы тахсыбыт. Бу киһийдэх кырбаабыт оҕотун туруга мөлтөөбүтүгэр, куоттаҕа аатыран, ойуурга саһа сылдьыбыт. Ол эрэн, сотору тутуллан хаайыллыбыт.
Суут мунньаҕын кэмигэр буруйун толору билиммит. 53 саастаах сууттанааччы РФ Холуобунай кодексатын 117-с ыст. 2-с чааһын “г” пуунунан (сокуоннай сааһын ситэ илик оҕону муҥнааһын) уонна 111-с ыст. 4-с чааһынан (киһи доруобуйатыгар ыарахан эмсэҕэлээһини оҥорон, сэрэҕэ суохтан өлүүгэ тиэрдии) буруйдааҕынан билиниллэн, 13 сылга кытаанах режимнээх холуонньаҕа көҥүлэ быһыллыбыт.
Оттон кини ойоҕун дьайыыларыгар туспа процессуальнай сыанабыл бэриллиэхтээх. Ол матырыйааллар бу холуобунай дьыалаттан араарыллан, Өлүөхүмэтээҕи ис дьыала отделыгар ыытыллыбыттар. Дьахтар оҕо кырыктаахтык атаҕастанарын көрө-билэ, истэ сылдьан туох да хамсаныы оҥорботоҕор Холуобунай кодекс 125-с (киһини кутталга хаалларыы) уонна 156-с ыстатыйаларынан (сокуоннай сааһын ситэ илик оҕону иитиигэ эбээһинэһи толорбот буолуу) көрүллэр буруйдар бэлиэлэрэ бааллар дуо диэн боппуруоһу быһаараары.
Ааспыкка суруйбуппун хатылаатахха, маннык буруйдары сэрэтэр, эрдэттэн бохсор, төрөппүт эппиэтинэһин күүһүрдэр сыалтан биһиги өрөспүүбүлүкэбитигэр “Төрөппүттэр оҕону хааччыйыы, иитии, үөрэтии, оҕо доруобуйатын, быраабын уонна сокуоннай интэриэһин көмүскэлин иһин эппиэтинэстэрин туһунан” диэн ааттаах сокуон ылыллыахтаах. Бу сокуон ылыллан олоххо киирдэҕинэ, оҕону атаҕастааһын, көрбөккө-истибэккэ соҕотохтуу хаалларыы лаппа аҕыйыаҕа диэн эрэл суох да буоллар, кэм бэйэ бодотун тардыныа этилэр.
Комментарии
Авторизация на сайте через социальные сети